Փաստ ինֆո

Գրիգորի Խաչատուրովի անունը շահարկվում է այն համատեքստում, որ 2018-ից ի վեր և՛ Գրիգորի, և՛ Յուրի Խաչատուրովներն իրենց ակտիվ քաղաքացիական դիրքորոշումն արտահայտել են երկրում ստեղծված իրավիճակի, ԶՈՒ-ում առկա տարբեր գործընթացների վերաբերյալ և բնականաբար իշխանության համար այս պահին թիրախ են: Այս մասին այսօր՝ փետրվարի 7-ին, ԱԺ-ում լրագրողների հետ ճեպազրույցում ասաց «Պատիվ ունեմ» խմբակցության քարտուղար Տիգրան Աբրահամյանը:

«Չեմ կարծում, որ Խաչատուրովները չեն գիտակցել, որ իրենց դիրքորոշումների արտահայտումը նման իրավիճակ կարող է ստեղծել, սակայն, դա նրանց տեսակն է, և նրանք կանգնած լինելով ԶՈՒ ստեղծման, կայացման գործում, բնականաբար, չէին կարող նման իրավիճակներում զերծ մնալ գնահատականներ չհնչեցնելուց»,- նշեց ընդդիմադիր խմբակցության քարտուղարը:

Աբրահամյանի կարծիքով՝ իշխանությունը ակնհայտորեն շարունակում է թիրախավորել վերջին 3 տասնամյակում աչքի ընկած, ԶՈՒ ակունքներում կանգնած , ԶՈՒ-ն կայացրած հրամանատարներին ու զինվորականներին են: Մի իշխանություն, որը նախորդ տարի Կառավարության որոշմամբ ՊՆ բալանսում գտնվող 71 ռազմական օբյեկտներ հանել էր աճուրդի, այսօր փորձում է քննարկում ծավալել այն հարցի շուրջ, թե ինչքան վտանգավոր քայլ է իրականցվել 10-12 տարի առաջ, երբ զորամասերից մեկի զորանոց հանդիսացող տարածքը, որը 90-ականներին իրավիճակի բերումով որպես զինծառայողների կացարան է ծառայել, վաճառվել է:

Հիշեցնենք, որ այսօր ԱԺ-ն քննարկում է «Հայաստան» խմբակցության պատգամավորներ Սեյրան Օհանյանի և Արմեն Չարչյանի նկատմամբ հանրային քրեական հետապնդում հարուցելու մասին ՀՀ գլխավոր դատախազ Աննա Վարդապետյանի միջնորդությունները։

Սեյրան Օհանյանի նկատմամբ ներկայացված 3 միջնորդություններից միայն մեկն է ԱԺ-ն քննարկել բաց ռեժիմով, մյուս երկուսը քննարվում է դռնփակ նիստում:

Առաջին միջնորդությամբ Օհանյանը մեղադրվում է չգործող զորամասի տարածքի ապօրինի օտարման համար, որը ըստ գլխավոր դատախազի, ձեռք է բերել Գրիգորի Խաչատուրովը, սակայն ձեւակերպվել է երրորդ անձի անունով։ Գ. Խաչատուրովն այս պահին գործով անցնում է որպես վկա, սակայն, ինչպես ԱԺ-ում հայտարարեց գլխավոր դատախազը, նրա մասով դեռ քննություն պետք է իրականացվի։

Աղբյուր` Փաստինֆո