Փաստ ինֆո

Սյունիքի մարզի ընդհանուր իրավասության դատարանի դատավոր (լիազորությունները կասեցված են) Բորիս Բախշիյանի արդարացման դատավճռի դեմ դատախազության բողոքը մերժվել է։ Վերաքննիչ քրեական դատարանը՝ դատավոր Գրիգոր Հովհաննիսյանի նախագահությամբ, կազմով դատավորներ՝ Լուսինե Աբգարյանի և Կարեն Ամիրյանի, անփոփոխ է թողել Սյունիքի մարզի ընդհանուր իրավասության դատարանի արդարացման դատավճիռը, որով հռչակվել և ճանաչվել էր Բորիս Բախշիյանի անմեղությունը։ Այս մասին

«Փաստինֆո»-ն տեղեկանում է փաստաբան Երեմ Սարգսյանից։

Վերաքննիչ քրեական դատարանի որոշումը պաշտպանության կողմը դեռևս չի ստացվել։ Ենթադրվում է, որ դատարանը մերժել է նաև պաշտպանության կողմի բողոքը՝ Բախշիյանին նաև հանցադեպի բացակայության հիմքով արդարացնելու պահանջով։

Հիշեցնենք, որ դատավոր Բորիս Բախշիյանի նկատմամբ քրեական հետապնդում էր իրականացվում Նիկոլ Փաշինյանի աջակից Նվեր Մկրտչյանին կալանավորելու որոշում կայացնելու համար։ Ըստ նախաքննական մարմնի նախնական վարկածի, Մկրտչյանին դատավորն ակնհայտ ապօրինի կալանավորելու որոշում է կայացրել, թեեւ ամբաստանյալն ինքը չէր ներկայացել դատական նիստին՝ դրսևորելով ոչ պատշաճ վարքագիծ։ Ավելին, դատախազությունը չէր բողոքարկել դատական նիստերին չներկայացվող ամբաստանյալի խափանման միջոցը փոխելու ու կալանավորելու որոշման դեմ։ Դատավորին ի սկզբանե մեղադրանք էր առաջադրվել ՀՀ քրեական օրենսգրքի 348-րդ հոդվածի 3-րդ մասով՝ անձին ապօրինի կալանավորելու հատկանիշներով, որն առաջացրել է ծանր հետևանք։ Վարույթն իրականացնող մարմինը որպես ծանր հետևանք էր դիտարկել այն հանգամանքը, որ ամբաստանյալ Մկրտչյանի նկատմամբ, «Գորիս» ՔԿՀ-ում, իբրև ազդեցություն է գործադրվել՝ հարկադրելով փոխել ցուցմունքը, ինչն էլ հանգեցրել է նրան, որ Քաջարանի համայնքապետ Մանվել Փարամազյանի խափանման միջոց կալանավորումը փոխարինվի գրավով։ Քրեական գործով նախաքննության ավարտ է հայտարարվել, ու նախաքննական մարմինը հրաժարվել է իր նախնական մեղադրանքից, Բախշիյանի մեղադրանքը վերաորակվել և մեղադրանք է առաջադրվել ՀՀ ՔՕ 348-րդ հոդվածի 2-րդ մասով՝ ակնհայտ ապօրինի կալանավորելու հատկանիշներով։

Սյունիքի մարզի ընդհանուր իրավասության դատարանը՝ դատավոր Լուսինե Սեփխանյանի նախագահությամբ, սեպտեմբերի 28-ին հրապարակել էր արդարացման դատական ակտը՝ ճանաչելով և հռչակելով Բախշիյանի անմեղությունը։ Դատավորն արդարացվել է հանցակազմի բացակայության հիմքով։

ՀՀ գլխավոր դատախազ Աննա Վարդապետյանի անունից արդարացման դատական ակտի դեմ վերաքննիչ բողոք է ներկայացվել, որը որով դատախազությունը պահանջում է բեկանել առաջին ատյանի դատարանի որոշումը և մեղավոր ճանաչել Բախշիյանին՝ որպես պատիժ նշանակելով հանրային ծառայության պաշտոններ և հանրային պաշտոններ զբաղեցնելու իրավունքից զրկելը՝ 5 տարի ժամկետով, ՀՀ քրեական օրենսգրքի 79-րդ հոդվածի համաձայն մեղմացնել նշանակված պատիժը և վերջնական պատիժ սահմանել հանրային պաշտոն զբաղեցնելու իրավունքից զրկելը՝ 4 տարի ժամկետով: Արդարացման դատական ակտի դեմ վերաքննիչ բողոք ներկայացրել է նաև Բորիս Բախշիյանի պաշտպանները՝ պահանջելով արդարացնել Բախշիյանին նաև հանցագործության դեպքի բացակայության հիմքով, ինչպես նաև՝ անթույլատրելի ճանաչել փաստաբան Յուրա Ավայանի ցուցմունքները։

Վերաքննիչ քրեական դատարանն անփոփոխ է թողել առաջին ատյանի դատարանի որոշումը։

Հեղինակ՝ Իզաբել Սահակյան

Աղբյուր` Փաստինֆո