Փաստ ինֆո

«ռեԱրմենիա» համագործակցության և դրամահավաքի հարթակի տնօրեն Գևորգ Պողոսյանը, ով Արցախ էր տեղափոխվել 2022թ. ամռանը, մեկն է այն հազարավոր մարդկանցից, որ արդեն 58 օր է՝ Արցախ վերադառնալ չի կարողանում։

«Շրջափակումից մեկ օր առաջ եմ եկելԵրևան՝ այն մտադրությամբ, որ երեք օրից ընտանիքիս հետ պետք է վերադառնամ Արցախ՝ Նոր տարին այնտեղ նշելու։ Բայց եկա ու, փաստորեն, այստեղ մնացի շրջափակման մեջ»,- «Փաստինֆո»-ի հետ զրույցում ասում է Գևորգը։

Արցախի Մարտունու շրջանի Հաղորտի գյուղում Գևորգի վերադարձին անհամբերությամբ են սպասում։ Ավելի քան կես տարի ապրելով արցախյան այս փոքրիկ գյուղում՝ «ռեԱրմենիա»-ի տնօրենը ոչ միայն մտերմացել, այլև սեփական փորձով ու կապերով նպաստել է, որ բազմաթիվ խոստումնալից ծրագրեր կյանքի կոչվեն։

««ռեԱրմենիա»-ում ներկայացված պրոյեկտների մի զգալի մասն Արցախում են իրականացվում։ Պատերազմից հետո բավականին հաճախակի էի Արցախ գնում-գալիս, որպեսզի հետևեմ ծրագրերի ընթացքին, իմ գիտելիքով ու փորձով օգտակար լինեմ դրանց իրագործմանը։ Զուգահեռ էլ անընդհատ ասում էի, որ Արցախը պահելու համար այնտեղ ապրել է պետք։ Թերևս, այդ երկու հանգամանքով է պայմանավորված, որ որոշել եմ Արցախ տեղափոխվել։ Մտադիր եմ նաև ընտանիքս այնտեղ տեղափոխել։ Մի քանի ընկերներով արդեն իսկ այդ ուղղությամբ աշխատում ենք. Ծաղկաշատ գյուղում, որտեղ Նիկոլ Դումանն է ապրել, տներ ենք ուզում կառուցել և հաստատվել այնտեղ»,-պատմում է Գևորգը։

Մինչ Ծաղկաշատում սեփական տունն ունենալը, Գևորգը Հաղորտիում է ապրում։ Հաղորտիի ընտրությունը ևս պատահական չի եղել. այնտեղ գործող «Մունք» տեխնոդպրոցի կյանքի կոչմանը մեծապես նպաստել է «ռեԱրմենիա»-ն. Հարթակում մեկնարկած դրավահավաքի արդյունքում մոտ երկու ամսում շուրջ 70 մլն դրամ է հանգանակվել, որն էլ ուղղվել է տեխնոդպրոցի կայացմանը։

«Որոշեցի Հաղորտի գնամ, որ տեսնեմ՝ ինչով կարող եմ սատար կանգնել տեխնոդպրոցի երեխեքին։ «Մունք»-ի փորձառությունը հիմք է հանդիսացել, որ մարդիկ այստեղ սկսեն աշխատել ինքնաբավ համայնք ձևավորելու ուղղությամբ։ Ու հիմա ակտիվ աշխատանքներ են ընթանում։ Ճիշտ է, շրջափակումը բավականին դանդաղեցրել է ծրագրերի ընթացքը, բայց արդեն 30 ծրագիր են մշակել, որոնք ծառայելու են գյուղի ինքնաբավության հասնելուն։ Ավելի պարզ եթե ասեմ, ապա հիմա մի խումբ մարդիկ մշակել են 21-րդ դարի հայկական ինքնաբավ համայնքի մոդել՝ Արարավանը, որը ներառում է թե՛ կրթական, թե՛ առողջապահական, թե՛ տնտեսական ու թե մյուս ոլորտները։ Ծրագրերից մեկով, օրինակ, նախատեսվում է տների վրա արևային ջրատաքացուցիչներ տեղադրել, մեկ այլ ծրագրով, որն ինքնաբավ գյուղատնտեսության ծրագրի մաս է կազմում, ջերմոցներ պետք է կառուցվեն և այդպես շարունակ»,-ասում է Գևորգն ու վստահեցնում, որ այդ մոդելը պետք է որ կյանքի կոչվի Արցախի մյուս գյուղական համայնքներում ևս ու հետզհետե ընդգրկի ՀՀ ամբողջ տարածքը։

Գևորգը համոզված է՝ Արարավանի մոդելով ամբողջ Հայաստան-Արցախն ինքնաբավ կարող է դառնալ, այսինքն՝ ավելի շատ արժեք ստեղծվի, քան՝ սպառվի։

«30 ծրագրերից 5-ը գրեթե պատրաստ են, վերջնական տեսքի են բերվել, 1-ի իրականացման համար անհրաժեշտ գումարի մեծ մասն էլ՝ 10 մլն-ից 8.8 մլն-ը, արդեն «ռեԱրմենիա»-ով հավաքվել է, բայց ծրագրեր կան, որ շրջափակման պատճառով զգալի դանդաղել են։ Լուրջ լոգիստիկ խնդիրներ են առաջացել, օրինակ, արևային պանելները չենք կարողանում տեղափոխել, որ տեղում հավաքվեն ու նման բազմաթիվ խնդիրներ»,-նշում է Գևորգն ու ևս մեկ անգամ շեշտում՝ ինքնաբավ երկիր դառնալու համար Հայաստանը` ներառյալ Արցախը, բավարար ներուժ ունի։

Աղբյուր` Փաստինֆո