Փաստ ինֆո

Թուրքիայի ու Սիրիայի սահմանին  գիշերը հզոր երկրաշարժ է տեղի ունեցել: Զոհերի թվի մասին տարբեր տվյալներ են հաղորդվում: Ռիա նովոստին հայտնում է շուրջ  200 զոհի մասին:

7.8 մագնիտուդով երկրաշարժը տեղի է ունեցել տեղական ժամանակով 04.17-ին, Գազիանթեփ քաղաքի մերձակայքում: Փլուզվել է ավելի քան 100 շինություն:

 
«Քահրամանմարաշ-Պազարչիկ կենտրոնում 7,4 մագնիտուդով երկրաշարժը, որը տեղի է ունեցել 04.17-ին (Երևանի ժամանակով 05.17), ինտենսիվորեն զգացվել է մերձակա նահանգներում, հատկապես Հաթայում, Ադանայում, Օսմանիեում, Դիարբեքիրում, Մալաթիայում և Շանլըուրֆայում», - ասված Է Թուրքիայի արտակարգ իրավիճակների կանխարգելման և հետևանքների վերացման վարչության հայտարարության մեջ:

Շանլըուրֆա քաղաքում, տեղի քաղաքապետի խոսքով, փլուզվել է 16 շենք, զոհվել է 15 մարդ։ Օսմանիե նահանգում, նախնական տվյալներով, փլուզվել է 34 շենք, զոհվել է 5 մարդ, իսկ Մալաթիայում ՝ 130 շենք, հայտնաբերվել են երեք զոհերի մարմիններ:

Փլուզումներ են տեղի ունեցել նաև Քահրամանմարաշում, Ադըյամանում, Դիարբեքիրում և Մալաթիայում, հաղորդում է NTV հեռուստաալիքը:

Ուժեղ ավերածություններ են տեղի ունեցել նաեւ  Սիրիայում։ Ինչպես հաղորդում է «Սուրիա» պետական հեռուստաալիքը, երկրի հյուսիսում գտնվող Հալեպ քաղաքի որոշ շրջաններում բազմաթիվ շենքեր են փլուզվել: Սիրիական «Ալ Վաթան» թերթը հայտնել է, որ Համայի Ալ Արբաին թաղամասում մասամբ փլուզվել են մի քանի շենքեր։

Սիրիայում, Ռիա Նովոստիի փոխանցմամբ,  հաղորդվում է 111 զոհի, ավելի քան  500 տուժածի մասին:

Թուրքիայում` Դիարբեքիրում,  տեսագրվել է բազմահարկ շենքի փլուզման կադրերը:

Տեսանյութը` «Փաստինֆո»-ի տելեգրամի ալիքում:

Աղբյուր` Փաստինֆո