Փաստ ինֆո

Այսօրվա մարտահրավերներն ու վտանգները լի են պետականակործան ու ազգակործան հետևանքներով: Այս մասին այսօր հրավիրած համագումարում հայտարարեց ՀՅԴ բյուրոյի անդամ, երիտասարադական հարցերի պատասխանատու Հովսեփ Տեր-Գևորգյանը:

Նրա խոսքով՝ Հայաստանում և Արցախում ստեղծված ծանր իրավիճակը հաղթահարելու համար մեր իրականությունից պետք է արմատախիլ անել հարմարվողականությունը և պարտվողական մոտեցումները, իսկ ՀՅԴ երիտասարդությունը պետք է շարունակի դիմակայել և իր կտրուկ դիմադրությունն արտահայտել Հայաստանի գործող իշխանության նկատմամբ:

«Վերջին ամիսներին դաշնակցական ընկերների և երիտասարդների մուտքն արգելելով Նիկոլ Փաշինյանի վարչախումբը իր հակադաշնակցական մոլուցքով փորձեք հարվածել հայկական հիմնական երիտասարդական կազմակերպությանը, որը պայքարում է թուրքերի և ադրբեջանցիների նկրտումների դեմ: Այո՛, մենք խանգարում ենք այս իշխանությունների քաղաքականությանը, արգելք ենք որ Հայաստանը դառնա թուրքական վիլայեթ և այս գծով մեր պայքարը պետք է կանգ չառնի և ոչինչ չի կարող մեզ շեղել մեր նպատակներից»,- ասաց նա:

Տեր-Գևորգյանը նշեց, որ հրավիրված համագումարում բացակայում ենք միայն Արցախում շրջափակման մեջ ընկած դաշնակցականները: Ոչ միայն դաշնակցական ընկերները, նաև արցախցի մեր հայրենակիցներն այսօր կանգնած են ցեղասպանության վտանգի առաջ, հետևաբար՝ Արցախում նոր ցեղասպանությունը կանխելու և հավելյալ տարածքներ չկորցնելու, գրավված Շուշին և Հադրութն ազատագրելու համար նորօրյա ազատագրական պայքարի կազմավորումը հրամայական է դրաձել:

«Արցախը Հայաստանի զրահաբաճկոնն է, խաբկանք է այն գաղափարը, թե առանց Արցախի հնարավոր է խաղաղ ու հանգիստ ապրել ՀՀ-ում: Հակական պետությունը հրաժարվել է այդ պատասխանատվությունից: Այս համատարած անտարբերության և հուսալքության պայմաններում այս խոսքերը կարող են իրական չթվալ, սակայն, եթե չենք ուզում Արցախի հայաթափումը, Սյունիքի կորուստը և Երևանի թրքացումը պարտավոր ենք շրջել այս իրավիճակը»,- ընդգծեց Տեր-Գևորգյանը:

Աղբյուր` Փաստինֆո