Փաստ ինֆո

Երևան համայնքի ավագանու օրակարգում այս պահին քաղաքապետի հրաժարականի և արտահերթ ընտրություններ անցկացնելու քննարկումներ չկան: Տեղեկությունը «Փաստինֆո»-ի հետ այդ մասին հայտնեցին և՛ «Լույս» խմբակցության ավագանու անդամ Դավիթ Խաժակյանը, և՛ ավագանու անկախ անդամ Իզաբելլա Աբգարյանը:

Գործող քաղաքապետ Հրաչյա Սարգսյանի հրաժարականի և արտահերթ ընտրությունների մասին տեղեկություններ Խաժակյանը ժամանակ առ ժամանակ հանդիպում է մամուլում, որոնք համարում է չճշտված տեղեկություններ:

«Չգիտեմ, թե մամուլը ինչ աղբյուրների հիման վրա է գրում այդ մասին, գուցե ինչ-որ պլաններ, խոսակցություններ կան, ամեն դեպքում քաղաքապետարանի ներսում ավագանու լայն շրջանում նման բան դեռևս չկա»,- ասաց «Լույս» խմբակցության ավագանու անդամը:

Իզաբելա Աբգարյանը, սակայն, չի բացառում, որ մի օր էլ շրջանառվող խոսակցությունները կարող են օրակարգ մտնել և հանկարծակիի բերել քաղաքապետի պաշտոնում առաջադրվելու հայտ ներկայացրած քաղաքական ուժերին:

«Շատ քաղաքական ուժեր հանկարծակիի կգան: Արտահերթ ընտրությունների քարոզարշավն ավելի կարճ է տևում, կարծում եմ՝ դժվար կլինի մյուս ուժերի համար», -նկատեց նա:

Աբգարյանի կարծիքով՝ Ավինյանը քաղաքապետարան ոտք դնելու առաջին իսկ օրից իր բոլոր ելույթները, հանդիպումներն ու գործողություններն իրականացնում է քարոզարշավային տրամաբանության մեջ, բայց զարմանալի է՝ ինչո՞ւ այդպես էլ որևէ քաղաքական ուժի կողմից չի արձանագրվում այն հանգամանքը, որ Ավինյանը վարչական ռեսուրսի խախտմամբ փորձում է երևանցիների բարեհաճությանն արժանանալ և գալիք ընտրություններում իր համար ցանկալի վարկանիշ ձևավորել:

Ավինյանը մեկ քվե ավել վաստակելու համար պատրաստ է անգամ նախկին քաղաքապետ Հայկ Մարությանին կրկնօրինակել:

«Երբ Մարությանը նստում էր ավտոբուսի ղեկին և ցուցադրում էր նոր ավտոբուսները, նա քաղաքապետ էր, և դա չէր անում ձայներ հավաքելու համար: Եթե դա աներ Հրաչյա Սարգսյանը, ես ինչ-որ առումով կհասկանայի, առավելևս գիտեմ, որ տրանսպորտի հարցը ինքն էր համակարգում դեռ վաղուց, իսկ երբ դա անում է քաղաքապետի մի տեղակալը, իսկույն այլ հետևություններ են առաջնում»,- ընդգծեց Ավագանու անդամը:

Խաժակյանն այս հարցում չի կիսում գործընկերոջ տեսակետը: Ասում է՝ տարին նախընտրական է և ոչ միայն փոխքաղաքապետը, այլև մյուս քաղաքական ուժերը ևս աստիճանաբար սահուն անցում են կատարում քարոզարշավի փուլ:

«Ավինյանը իշխող ուժի հայտարարված թեկնածուն է, տեսանելի է, որ բոլոր ուժերը սկսել են չհայտարարված քարոզարշավ, և այս տարի սպասվող ընտրությունների իմաստով սա բնականոն է»,- նշեց Խաժակյանը:

Եվ, չնայած գործադրվող ջանքերին, սպասվող քաղաքապետի ընտրություններում, լինի դա արտահերթ, թե հերթական, իշխող քաղաքական ուժի թեկնածուի՝ Տիգրան Ավինյանի, վարկանիշն օրեցօր անկում է ապրում, որովհետև Ավինյանին ոչ թե երևանցիներն են ընտրել, այլ գործադիրը, որն ամեն գնով փորձում է թաղապետերի և վարչության պետերի անմիջական աջակցությամբ առաջ բրդել մեկին, որը չունի երևանցու քվեն:

Աղբյուր` Փաստինֆո