Փաստ ինֆո

Գեղարքունիքի մարզի Ազատ գյուղի զորամասում տեղակայված ինժեներասակրավորական վաշտի կացարանում 15 զինծառայողի մահվան ելքով հրդեհի գործով մեղադրյալ կապիտան Եղիշե Հակոբյանը ցուցմունք չի տվել՝ առողջական վիճակով պայմանավորված։ Այս մասին «Փաստինֆո»-ի հետ զրույցում ասաց Եղիշե Հակոբյանի պաշտպան Հովսեփ Սարգսյանը` նշելով, որ նա դեռևս ի վիճակի չէ ցուցմունք տալ։

Սարգսյանի գնահատմամբ՝ Հակոբյանին առաջադրված մեղադրանքը խիստ նախնական է, չի կարող փաստարկված լինել, քանի որ գործի քննությունն ամբողջական չէ, դեպքի հանգամանքներն ամբողջական բացահայտված չեն, ինչի վառ ապացույցն է երեկ Հանրային ՀԸ-ում դատախազ Արշակ Մարտիրոսյանի ելույթը, որն, ըստ էության, նշում էր, որ դեպքի հանգամանքները պարզելու ուղղությամբ դեռևս քննություն է կատարվում, այսինքն, ցանկացած դետալ կարևոր նշանակություն ունի մեղադրանքի կողմի համար։

«Մոտ 20 օր է անցել, այդ օրերի ընթացքում փաստորեն քննություն իրականացնող քննիչները բամբասանքի մակարդակի լուրերի կապակցությամբ են սկսել քննություն կատարել, որ դեպքի հանգամանքները հստակեցնեն։ Ի սկզբանե ասել եմ՝ պետք չէ խանգարել քննությանը, ցանկացած անզգույշ խոսք կարող է վնասել գործի քննությանը։ Ինչևէ, ԱԻ պաշտոնատար անձի կողմից արված հայտարարությանը, թե զինծառայողների դիակները հայտնաբերվել են մահճակալների վրա՝ պառկած վիճակում, մեծ աժիոտաժ առաջացրեց։ Դեռևս գործի փաստական հանգամանքները պետք է վերհանվեն, որից հետո այդ մեղադրանքները կամ կվերհաստատվեն, կամ կհերքվեն»,- նշեց փաստաբանը՝ հավելելով, որ Եղիշե Հակոբյանը դիրքորոշում չի հայտնել և շահագրգիռ է, որ դեպքի բոլոր հանգամանքները վեր հանվեն, քննության առարկա դառնան։ Նա պատրաստակամ է ցուցմունք տալ, բայց այս պահին դեռևս առողջական վիճակը թույլ չի տալիս։ Սարգսյանի խոսքով՝ միայն Եղիշե Հակոբյանի ցուցմունքը չէ, որ էական նշանակություն ունի, բազմաթիվ գործողություններ կան իրականացվելու, բազմաթիվ ականատեսներ կան, գործընթացներ են նախորդել, վարույթն իրականացնող մարմինը շատ անելիք ունի։ Ինչ վերաբերում է զինծառայողների հետ փոխհարաբերություններին, պաշտպանը վստահեցրեց, որ Եղիշե Հակոբյանը որևէ զինծառայողի հետ որևէ խնդիր չի ունեցել, առավել ևս, որ ծառայության բերումով Հակոբյանն առնչություն չի ունեցել զինծառայողների հետ. «Զինվորներն ունեցել են իրենց դասակի հրամանատարը, վաշտի հրամանատարը, միայն ինքը չէ կապիտան։ Կապիտան էր նաև վաշտի հրամանատարը, որը եղել է զինվորների անմիջական հրամանատարը և առավոտից երեկո եղել է այնտեղ»։ Որքանով հայտնի է փաստաբանին՝ վաշտի հրամանատարը մեղադրյալի կարգավիճակ չունի։

Եղիշե Հակոբյանը, փաստաբանի փոխանցմամբ, 44-օրյա պատերազմի ընթացքում ծառայել է Ջաբրայիլում՝ որպես վաշտի հրամանատար, որն իր տրամադրության տակ ունեցել է զինվորական տեխնիկա, մեքենաներ, որոնցով նաև մասնակցել է պատերազմին, երբևէ զոհեր չի ունեցել ունեցել է վիրավորներ, պատերազմից հետո հաստիքը կրճատվել է, նրան տեղափոխել են գումարտակի շտաբի պետի տեղակալ, սակայն այդ հաստիքը նույնպես կրճատվել է, ապա տեղափոխել են ոչ իր մասնագիտացմամբ՝ ինժեներական ծառայության սպա, որտեղ կոնկրետ աշխատանք չի ունեցել, կատարել է պետի հանձնարարականները։

«Հետևաբար, նա չէր կարող զինծառայողների հետ անմիջական կապ ունենալ։ Բացի այդ, դեպքից երեք շաբաթ առաջ զորացրվելու դիմում է գրել, քանի որ հաստիքներն արդեն կրճատվում էին, ինքը՝ չէր հասկանում ինչ է կատարվում։ Ըստ էության, ինքը կադրային սպա է եղել, բայց իր աշխատանքով չի զբաղվել։ Զորացրման դիմում է գրել, բայց քանի որ դեռևս ութ տարի կար, որ իր ծառայության ժամկետն ավարտվի, ակադեմայի շրջանավարտ է, ուրեմն պետք է գումար վճարի՝ յուրաքանչյուր տարվա համար 1 մլն դրամի չափով, բայց ինքը չուներ այդ գումարը, զեկուցագիրը փոխել է և ներկայացրել տեղափոխման զեկուցագիր, որի մասին տվյալներ չունի»,- պատմեց փաստաբանը։

Իսկ թե արդյո՞ք Եղիշե Հակոբյանն ընդունում է, որ ավտոբենզինով փորձել է միացնել վառարանը, չէ՛ր գիտակցում դրա հնարավոր հետևանքները՝ փաստաբանը զերծ մնաց մանրամասնելուց, նշեց՝ խնդիրները տարբեր են, իր պաշտպանյալը դեռևս ցուցմունք չի տվել և փաստաբանական էթիկայից ելնելով՝ չի կարող ասել։

«Համենայն դեպս, իմ պատկերացմամբ, Եղիշե Հակոբյանը չէ այս դժբախտության պատճառը։ Ավելի հստակ պատասխանելու համար ձեռքիս տակ պետք է լինեն գործի քննության տվյալներ, մասնավորապես, բազմաթիվ փորձաքննությունների եզրակացությունները, առաջնային գոնե մահվան պատճառների վերաբերյալ, թմրաբանական, արյան, հիստոլոգիական փորձաքննությունների, հրդեհատեխնիկական, նյութագիտիական համալիր փորձաքննությունների եզրակացություններ, ցուցմունքներ։ Բացի այդ, տվյալ իրադրության մեջ՝ մինչև դեպքը եղած իրավիճակը և տվյալ իրադրության մեջ զինծառայողների փոխհարաբերությունները, ինչպես նաև՝ կապված մնացած բոլոր իրավահարաբերությունները, որոնք կարգավորվում են թե՛ հրամաններով, թե՛ օրենքներով։ Միայն այս բոլոր հանգամանքների առկայության պայմաններում հնարավոր կլինի ասել՝ ով է մեղավոր, ով մեղավոր չէ, ում մեղքի բաժինն ինչքան էր, ով է նպաստել և ինչ պատճառահետևանքային կապ ունի ենթադրյալ անձանց գործողության կամ անգործության միջև»,- նշեց փաստաբանը։
Ինչ վերաբերում է շրջանառվող լուրերին, որ կապիտանի արյան մեջ թմրանյութ էր հայտնաբերվել, ինչպես նաև՝ նշանակված փորձաքննությանը, փաստաբանը նշեց, որ առաջին անգամ է նման բան լսում, բամբասանքներ չի ցանկանում մեկնաբանել, դրանք բոլորը սիրողականից ցածր մակարդակի մեկնաբանություններ են. «Այդպես չի կարելի։ Այս դեպքը ալեկոծել է ամբողջ հանրությանը, յուրաքանչյուր անզգույշ խոսք տուժողների ցավին լրացուցիչ ցավ է պատճառում, չի կարելի սիրողական մակարդակով ինչ-որ բաներ անել և փորձել երևալ ավելի կաթոլիկ, քան՝ Հռոմի Պապն է»։

Անդրադառնալով զինծառայողների միջանձնային փոխհարաբերություններին, ինչ-որ իրադարձություններ եղել են արդյոք, թե ոչ՝ փաստաբանը զերծ մնաց մանրամասնելուց՝ նշելով, որ տեղեկություններ կան, որ ինչ-որ բաներ եղել են, որոնց վերաբերյալ տեղեկությունների տիրապետում է թե՛ Ռազմական ոստիկանությունը, թե՛ Քննչական մարմինը։

Դիտարկմանը, որ ի սկզբանե բարձրաձայնվել էր, որ կապիտանն է ավտոբենզինով փորձել միացնել վառարանը, արդյո՞ք դրանով ի սկզբանե չի խախտվել անմեղության կանխավարկածը, փաստաբանը նշեց, որ անմեղության կանխավարկածը խախտվել է նաև մեղադրանքի որոշմամբ, սակայն, հաշվի առնելով գործի հնչեղությունը, հանգամանքները, այն, որ մահացել են 15 զինծառայող, պաշտպանության կողմը և Եղիշե Հակոբյանը ձեռնպահ են մնում այդ տեսակի իրավունքների խախտումների մասին շահարկումից կամ բարձրաձայնումից։

«Գիտակցաբար լռում ենք, որ չխանգարենք։ Մենք սրանով նաև, ինչ-որ տեղ, թե՛ հասարակությանը, թե՛ քննությանը հնարավորություն ենք տալիս, որ անկաշկանդ՝ առանց որևէ այլևայլության, դետալային քննություն կատարվի, թեկուզ՝ եթե այդ քննությունը լինի Եղիշե Հակոբյանի խիստ նախնական մեղադրանք ներկայացնելու ճանապարհով։ Բոլորս էլ հասկանում ենք, որ դա արվել է նրա համար, որ ժամանակավորապես հագուրդ տրվի այն բամբասանքներին, որ Եղիշե Հակոբյանը վառարան է վառել և այլն։ Խիստ նախնական տեղեկություններ են։ Տպավորություն է, որ Եղիշե Հակոբյանը բոցերի մեջ է գցել տունը, որտեղ զինծառայողները քնած են եղել։

Ցանկացած բաց կրակ, որը կարող է տարածվել, ժամանակ է պահանջում։ Պետք է քննությանը հնարավորություն տալ՝ աշխատելու և բացահայտելու դեպքի հանգամանքները։ Եղիշե Հակոբյանը շահագրգիռ է, որ դեպքի բոլոր հանգամանքները բացահայտվեն, անկախ նրանից՝ ինքը դրա արդյունքում կհայտնվի մեղադրյալի կարգավիճակում, կփոխվի մեղադրանքը, թե կմնա նույնը, էական չէ, որովհետև այստեղ խոսք է գնում 15 զինծառայողի մահվան մասին »,- եզրափակեց փաստաբանը։

Հիշեցնենք, որ ողբերգական դեպքը տեղի է ունեցել հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։ Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական վարույթի շրջանակներում ձերբակալվել, ապա կալանավորվել էր զորամասի թիկունքի պետ-հրամանատարի թիկունքի և կոմունալ շահագործման ծառայության գծով տեղակալ Գոռ Աղեկյանը, որը մեղադրվում է զինվորական պաշտոնեական անփութություն կատարելու մեջ, որն անզգուշությամբ առաջացրել է մարդու մահ։

Նույն մեղադրանքով ձերբակալվել, ապա կալանավորվել է նաև զորամասի կոմունալ շահագործման ծառայության պետ, զորամասի հակահրդեհային պաշտպանության և փրկարար աշխատանքների ծառայության պետ, մայոր Մ.Ս.-ն։ Վարույթի շրջանակներում մեղադրանք է ներկայացվել նաև այրվածքներով հոսպիտալացված կապիտանի նկատմամբ՝ ՀՀ քրեական օրենսգրքի 532-րդ հոդվածի 4-րդ մասի հատկանիշներով, այն է՝ զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու կամ ավելի անձանց մահ:

Հեղինակ՝ Իզաբել Սահակյան

Աղբյուր` Փաստինֆո