Փաստ ինֆո

Հանրային խորհրդի նախկին նախագահ Ստյոպա Սաֆարյանը գտնում է՝ իր պատիվն ու արժանապատվությունն արատավորող հայտարարություններով վնաս է պատճառվել Հայաստանի Հանրապետությանը։ Այս մասին նա հայտարարել է այսօր՝ ընդդեմ Իգոր Խաչատուրովի ներկայացված հայցադիմումի քննության ժամանակ։

Հիշեցնենք, որ Ստյոպա Սաֆարյանը ներկայացած հայցադիմումով պահանջում է, որ կրտսեր Խաչատուրովը ներողություն խնդրի իր կողմից վիրավորանք գնահատված արտահայտությունների համար, ինչպես նաեւ փոխհատուցել ենթադրյալ պատճառված բարոյական վնասը՝ 500.000 դրամի չափով։ Հայցադիմում ներկայացնելու հիմք է հանդիսացել «Իգոր Խաչատուրովի պատասխանը՝ Ստյոպա Սաֆարյանին» վերտառությամբ հրապարակումը։ Խաչատուրովը, պատասխանելով իր հոր՝ ՀՀ ԶՈՒ ԳՇ նախկին պետ Յուրի Խաչատուրովին ուղղված Սաֆարյանի «զրպարտչական, վիրավորական մեղադրանքներին, մասնավորապես նշել էր. «Բաղանիս Այրումի հարբած թուրք քիրվայի դուրսպրծուկ, էս անիմաստ երկար տեքստդ հանկարծ չջնջես, որ պատասխան ես տալու, տող առ տող: Մեկ է, քեզ էդ անկարայի չվերթին տեղ չեն տալու»։ Նշված արտահայտություններն` ըստ Սաֆարյանի, վիրավորանք է, ինչի համար վերջինս պահանջել է ներողություն խնդրել, ինչպես նաև՝ դրամական փոխհատուցում տալ։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Մուրադ Հովակիմյանի նախագահությամբ, այսօր կայացել է Հանրային խորհրդի նախկին նախագահ Ստյոպա Սաֆարյանն ընդդեմ ՀՀ ԶՈՒ ԳՇ նախկին պետ Յուրի Խաչատուրովի որդու՝ Իգոր Խաչատուրովի գործով 4-րդ դատական նիստը, որի ընթացքում կողմերը ներկայացրել են իրենց դիրքորոշումը՝ ապացույցների բաշխման և ներկայացված ապացույցների վերաբերյալ։

Հայցվոր կողմի վրա դրված էր պարտավորություն՝ ապացուցելու, որ Իգոր Խաչատուրովը հայտարարությունն արել է հրապարակային, այն արատավորել է Սաֆարյանին, եղել է դիտավորություն՝ նրան արատավորելու, ինչպես նաև՝ պահանջվող գումարի իրավաչափության հարցը։ Որպես հրապարակայնության հիմնավորում հայցվոր կողմը մատնանշեց հայցադիմումի պատասխանում տեղ գտած ձևակերպումները՝ նշելով, որ պատասխանողն ինքն ընդունել է, որ հայտարարությունն արվել է հրապարակային, ինչպես նաև, նշեց, որ նշված հայտարարությունը տեղադրված է եղել ոչ միայն «168 Ժամ» լրատվականում, այլև՝ մի քանի այլ լրատվամիջոցներով՝ առանց հղման, ինչից հայցվոր կողմը ենթադրել է, որ Իգոր Խաչատուրովն այդ արտահայտություններն արել է մի քանի ԶԼՄ ներկայացուցիչների ներկայությամբ՝ հրապարակային։ Բացի այդ, նշված արտահայտությունները, ըստ հայցվորի, արատավորել են Սաֆարյանի բարի համբավը՝ որպես մարդու և հանրային գործչի։

Փաստաբան Դիանա Վարդանյանը, անդրադառնալով Ստյոպա Սաֆարյանի հեղինակությանը, պատճառված վնասի փոխհատուցման պահանջի իրավաչափությանը, նշեց, որ փաստերն ուղղակիորեն խոսում են այն մասին, թե որքան մեծ է հայցվորի հեղինակությունը՝ ոչ միայն ՀՀ տարածքում, այլև՝ միջազային կառույցնեում, այնքան մեծ վնաս է պատճառվել նրա պատվին ու արժանապատվությանը։ Բացի այդ, ՀՀ իշխանությունները Ստյոպա Սաֆարյանին բազմիցս գործուղել են՝ տարբեր միջազգային կառույցներ, հարթակներ, ինչը, ևս ըստ հայցվոր կողմի վկայում է նրա հեղինակության մասին։ Շարունակելով փաստաբանի միտքը՝ Ստյոպա Սաֆարյանը հայտարարեց,թե իր մասին արված հայտարարություններով նաեւ պետությանն է պատճառվել վնաս և, որ պահանջվող գումարն իրականում դեռ քիչ է։ Ստյոպա Սաֆարյանը հիշեցրեց, որ ինքը հանդիսանում է միջազգային խորհրդատվական խոշորագույն ընկերության փորձագետ, որը նաև Մյունխենի անվտանգության կոնֆերանսի կազմակերպիչն է, առանցքը։

«Այդ նույն ժամանակահատվածում, երբ իմ հասցեին հնչեցվում և տարածբվում էին վիրավորական արտահայտություններ, ես զբաղված էի պատերազմի թատերաբեմի ընդլայման վերաբերյալ աշխարհաքաղաքական ռիսկի գնահատման զեկույցի պատրաստմամբ, որովհետև ես եմ հանդիսանում այդ կազմակերպության միակ փորձագետը, որը պատասխանատու է Բալկաններից մինչև Հարավային Կովկաս աշխարհաքաղաքական ռիսկի գնահատման համար և, թերևս այդ գործունեության շնորհիվ է, որ Հայաստանում պատերազմի ընթացքում մնացել են մի շարք խոշորագույն ընկերություններ, որոնք պատրաստվում էին ռիսկի մեծացման դեպքում դուրս գալ Հայաստանից։ Հյուրընկալվել են խոշորագույն ընկերությունների ներկայացուցիչները, տնօրենները ՀՀ-ում, որ նրանք չհեռանան Հայաստանից, չհանեն կազմակերպությունները ՀՀ-ից և որ ՀՀ-ն տնտեսական ահռելի վնասներ չկրեն։ Ահա, թե ինչու, սահմանված գումարը, եթե անկեղծ լինենք, շատ ավելի փոքր է, քան պատճառված վնասը, որը հասցվել է պատասխանողի կողմից այս անպարկեշտ, վիրավորական արտահայտությունները թույլ տալով՝ նսեմացնելով իմ հանրային հեղինակությունը, իմ գործունեությունն այլ ճակատներում թուլացնելու և այսպիսի դատական քաշքշուկներում ներգրավելու պատճառով։ Կարծում եմ՝ սա Հայաստանի Հանրապետությանը պատճառված վնասի մասին է խոսքը, բայց եկեք այդքան չծավալվենք»,- նշեց Ստյոպա Սաֆարյանը։

Պատասխանող կողմի ներկայացուցիչ, փաստաբան Անահիտ Սարգսյանը նախ ներկայացրեց փաստաթուղթ՝ Իգոր Խաչատուրովի գույքային դրության վերաբերյալ, ապա հիշեցրեց, որ Իգոր Խաչատուրովի՝ վիճարկվող այդ արտահայտությունը եղել է քաղաքական լարված իրավիճակում՝ հայ-թուրքական հարաբերությունների հիմնահարցերի քննարկումների ֆոնին և, որ նշված գրառումը պայմանավորված է եղել հանրային գերակա շահով։ Ինչ վերաբերում է գրառմամբ արատավորման վերաբերյալ պնդումներին, Անահիտ Սարգսյանը նշեց, որ այդ արտահայտությունները գնահատողական դատողություններ են եղել՝ «այսինքն թուրքերի հետ բարեկամություն անող և ինչ-որ մեկի հովանու ներքո լինել»։ Սարգսյանի խոսքով՝ Իգոր Խաչատուրովը որևէ նպատակ չի ունեցել վիրավորելու Ստյոպա Սաֆարյանին, ունեցել է մի շարք շարժառիթներ՝ Ստյոպա Սաֆարյանին արձագանքելու, որը ֆեյսբուքյան գրառում է կատարել՝ Իգոր Խաչատուրովի հոր՝ Յուրի Խաչատուրովի վերաբերյալ, թույլ տվել զրպարտչական և վիրավորական հայտարարություններ, մեղադրել ինչ-ինչ հանցանքների մեջ՝ իմանալով, որ դա անպատասխան չի մնալու, ինչով սադրել է Իգոր Խաչատուրովին։ Բացի այդ, փաստաբանն արձանագրեց նաև այն փաստը, որ Հանրային խորհրդի նախագահը համերաշխության քննարկումներ կազմակերպելու իր գործառույթն իրականացնելու փոխարեն էլ ավելի է լարել իրավիճակը։ Ինչ վերաբերում է հրապարակայնությանը, փաստաբանը հիշեցրեց, որ որևէ հրապարակման մեջ հղում չի արվել աղբյուրին, որևէ ասուլիս, հայտարարություն չի եղել։

Հայցվորի ներկայացուցիչը միջնորդեց՝ պատասխանողի ներկայացրած բանավոր դիրքորոշումը, ինչպես նաև, գույքային դրության վերաբերյալ ներկայացված ապացույցն անընդունելի ճանաչել։ Դատարանը պարզաբանեց, որ ներկայացված փաստերին կանդրադառնա վերջնական դատական ակտում։

Դատարանն անցավ դատաքննության փուլին։ Հաջորդ դատական նիստը նշանակվել է ապրիլի 6-ին, ժամը՝ 15.00-ին։

Հեղինակ՝ Իզաբել Սահակյան

Մանրամասները՝ տեսանյութերում

Աղբյուր` Փաստինֆո