Փաստ ինֆո

Հայաստանի բոլոր իշխանությունները բանակցությունների սեղանի շուրջ ընդունել էին, որ Արցախին հարակից յոթ շրջանները պետք է վերադարձվեն, ուղղակի պայման կար, որ դրանք պետք է տրվեին Ադրբեջանին Արցախի կարգավիճակը ճանաչելու դիմաց։ Այդ առումով ՌԴ արտգործնախարար Սերգեյ Լավրովը հայկական քաղաքականությանը հակասող հայտարարություն չի արել։ «Փաստինֆո»-ի հետ զրույցում նման տեսակետ հնչեցրեց քաղաքական վերլուծաբան Ստեփան Դանիելյանը։

«Այստեղ խնդիրը յոթ շրջանները վերադարձնելու պայմանին է վերաբերում, որի մասին Լավրովը չի խոսել։ Իսկ Լավրովի հնչեցրած այն պնդումը, թե, իբր, Ալմաթայի պայմանագրով Հայաստանը ճանաչել է Արցախը որպես Ադրբեջանի մաս, սխալ է։ Այդտեղ Լավրով ասածը հակասում է իրականությանը։ Երբ Խորհրդարանը վավերացնում էր այդ պայմանագիրը, Հայաստանը հատուկ կարծիքով է հանդես եկել, որում ամրագրված էր, որ չի ճանաչում Արցախն Ադրբեջանի մաս»,-ասաց քաղաքագետն ու հռետորական հարց տվեց՝ իսկ ինչո՞ւ Հայաստանի ներկա իշխանությունը չի բարձրաձայնում, որ ՀՀ-ն այդ պայմանագրին հատուկ կարծիքով է միացել։

Լավրովի՝ Արցախի հետ կապված իրավիճակն աղճատված ներկայացնելու փորձը, ըստ Դանիելյանի, ինքնարդարացման նպատակ ունի։

«Շեշտադրումն անելով յոթ շրջանների վրա, իմ կարծիքով, Լավրովը փորձում է արդարացնել ՌԴ-ին։ Չէ՞ որ ՀՀ-ն մեղադրում է Ռուսաստանին՝ որպես դաշնակից երկիր, որը պատերազմի ընթացքում էլ, դրանից հետո էլ, երբ արդեն ՀՀ սուվերեն տարածք էր ներխուժել Ադրբեջանը, չօգնեց իրեն։ Մյուս կողմից, անգամ ՀՀ իշխանությունը չի խոսում այն մասին, որ Արցախից տարածքներ է օկուպացրել Ադրբեջանը, ԱԺ-ում վարչապետը հայտարարում է, թե ինքը տեր է 29,8 հազար քառ․ կմ-ին ու Արցախը համարում Ադրբեջանի տարածք։ Էլ ինչո՞ւ ենք նեղանում դրսի խաղացողներից»,-ասում է վերլուծաբանը։

Արցախի հարցում Հայաստանի որդեգրած սխալ քաղաքականության հիմքը, Դանիելյանի համոզմամբ, 1994-ից է դրվել, երբ չի ճանաչվել Արցախի անկախությունը։

«Հայաստանն Արցախի անկախությունը պետք է ճանաչեր 1994թ․ զինադադարից առաջ դեռևս, ինչպես Ռուսաստանն է ճանաչել Հարավային Օսիայի և Աբխազիայի անկախությունը։ Դա չի արվել, և այն ժամանակվա իշխանությունների մեծագույն սխալն էր դա»,-նշեց քաղաքագետը՝ հավելելով, որ ճիշտ դիվանագիտություն վարելու ու բանակն արդիականացնելու դեպքում նաև վիճահարույց դարձած յոթ շրջանները կարելի կլիներ պահել։

Աղբյուր` Փաստինֆո