Փաստ ինֆո

Որպես ահաբեկչություն կարելի է որակել Իրանի որոշակի ռազմավարական նշանակության օբյեկտների վրա հարձակումը, բայց փաստն այն է, որ Իրանը պաշտոպանպես ընդունել է միայն Սպահանում գտնվող ռազմաարդյունաբերական օբյեկտներից մեկի վրա կատարված հարձակումը: Ազարշահրինն էլ որակել, կամ հայտարարել են որպես տեխնիկական պատճառներով առաջացած հրդեհ:

«Փաստինֆո»-ի եթերում ասել է իրանագետ, ԵՊՀ իրանագիտության ամբիոնի դասախոս Ահարոն Վարդանյանը:

Նրա փոխանցմամբ՝ փոքր դեպքին փորձեցին մեծ հնչեղություն հաղորդել, և փորձում էին Իրանի վրա հսկայական մեդիա գրոհ կազմակերպել: Սա էլ ցույց է տալիս, որ դեպքերը պատահական չեն, քանի որ նմանօրինակ մեդիա գրոհը պետք է որ բավական ժամանակ պահանջեր կազմակերպվելու համար: Խնդիրը դրված էր ոչ թե հարվածներով Իրանին վնաս հասցնելու վրա, այլ այդ հարվածներից հետո տեղեկատվական գրոհը ճիշտ կազմակերպելու և ուղղորդելու վրա:

«Այն, որ Իսրայելը Իրանի դեմ հատուկ գործողություն է սկսել՝ հիմնականում տարածում էին սաուդական կայքերը՝ փորձելով որոշակի խուճապ առաջացնել: Եթե Իրանում նշում են, որ դեպքը տեղի է ունեցել Ադրբեջանական Հանրապետությունից, ապա դա չի բացառում Իսրայելի վարկածը, քանի որ նրանք նշում են, որ Ադրբեջանից են արձակվել ԱԹՍ-ները, բայց Իսրայելի ուղղորդմամբ»,- հավելեց Ա. Վարդանյանը:

Իրանագետի խոսքերով, Իրանը մշտապես նշել է, որ իր տարածքի վրա ցանկացած հարձակում ստանալու է նմանատիպ, և դրանից էլ հզոր պատասխան: Այդ պատասխանը կարող է լինել ոչ թե վաղը կամ այսօր, այլ հարմար պահի, և հարվածն էլ կլինի անսպասելի և ոչ համաչափ: Իրանը ոչինչ անպատասխան չի թողնի:

Թեհրանում Ադրբեջանական Հանրապետության դեսպանատան վրա հարձակման հետ կապված բանախոսը նկատեց, որ դրանից անմիջապես հետո Ադրբեջանը խիստ կազմակերպված դեսպանատունը էվակուացնում է Իրանից: «Թվում էր, թե Ադրբեջանում սպասում էին նմանատիպ գործողության: Ադրբեջանը երբեք չէր հանդգնի, եթե չունենար Թուրքիայի պաշտպանությունը, Իսրայելի և եվրոպական այլ պետությունների հովանավորչությունը: Ադրբեջանը պետք է հաշվի առնի, որ տուժողը Ադրբեջանական Հանրապետությունն է լինելու»,- եզրափակեց իրանագետը:

Մանրամասները՝ տեսանյութում։

Աղբյուր` Փաստինֆո