Փաստ ինֆո

Գեղարքունիքի մարզի Ազատ գյուղի տարածքում տեղակայված զորամասի ինժեներասակրավորային վաշտի կացարանում հրդեհի հետևանքով ստացված վնասվածքներով հոսպիտալացված կապիտանը, որն ըստ մեղադրանքի, ավտոբենզինով միացրել է վառարանը, հրաժարվել է ցուցմունք տալ՝ առաջադրված մեղադրանքի շուրջ։

Նշենք, որ տարբեր աստիճանի, այդ թվում՝ շնչուղիների այրվածքներ ստացած կապիտանը միայն օրերս է վերակենդանացման բաժանմունքից տեղափոխվել հիվանդասենյակ և շարունակում է բուժումը։ Այրվածքաբանության ազգային կետրոնից լրատվամիջոցներին հայտնել էին, որ վերակենդանացման բաժանմունքից հիվանդասենյակ տեղափոխված երկու զինծառայողների բուժումը շարունակվում է, վիճակը գնահատվում է միջին ծանրության, հնարավոր է՝ ենթարկվեն պլաստիկ վիրահատության, իսկ մյուս զինծառայողը՝ Գարուշը, որն ի սկզբանե հիվանդասենյակում էր, առաջիկայում դուրս կգրվի և կտեղափոխվի հոսպիտալ։

Քրեական վարույթի շրջանակներում Գարուշը և մյուս զինծառայողը հարցաքննվել են, տուժող ճանաչվել, իսկ կապիտանին մեղադրանք է առաջադրվել, ինչպես արդեն նշվեց՝ նա հրաժարվել է ցուցմունք տալուց։

ՀՀ քննչական կոմիտեից «Փաստինֆո»-ի հարցին ի պատասխան հայտնեցին, որ նրա նկատմամբ որևէ խափանման միջոց ընտրված չէ։

Նշենք, որչ մամուլում տեղեկություններ են շրջանառվել, թե կապիտանի արյան մեջ հայտնաբերվել են թմրանյութի տարրեր և որ կապիտանը վառարանը վառելիս եղել է ոչ սթափ վիճակում։ Քրեական վարույթի շրջանակներում նշանակված փորձաքննությունների, այդ թվում, դատաբժշկական փորձաքննության եզրակացությունները, ինչպես «Փաստինֆո»-ին հայտնեցին ՔԿ-ից, դեռևս չի ստացվել։ Իսկ թե արդյո՞ք տվյալներ կան՝ թմրանյութի տարրեր հայտնաբերված լինելու վերաբերյալ, ՔԿ-ից նշեցին, որ վարույթով նման տվյալներ չկան, փորձաքննության արդյունքները դեռևս չեն ստացվել։

Հիշեցնենք, որ ողբերգական դեպքը տեղի է ունեցել հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։ Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։

Դեպքի օրը կառավարության նիստին Նիկոլ Փաշինյանի կողմից շրջանառության մեջ է դրվել ավտոբենզինի միջոցով վառարանը միացնելու հետեւանքով հրդեհի բռնկման վարկածը, ինչը հետագայում արտացոլվել է նաև ՔԿ տարածած հաղորդագրությամբ։ Դասակի հրամանատարը, սակայն, թյուրիմաց է գնահատել նշված վարկածը՝ նշելով, որ հունվարի 18-ի երեկոյան ինքը կացարանում բենզին չի տեսել, մեկ այլ զինվորական հայտնել է, որ վառարանը միացնում են առավոտյան ու բացառել գիշերվա կեսին, երբ արդեն քնում են, առավել եւս բենզինով թեժացնելը։ Հունվարի 26-ի՝ կառավարության նիստում Նիկոլ Փաշինյանը շարունակեց առաջ մղել իր կողմից ավելի վաղ շրջանառության մեջ դրվող վարկածը՝ հրապարակելով նաև վկաների ցուցմունքները, որն իրեն ի պաշտոնե հասանելի չեն կարող լինել։

Քրեական վարույթի շրջանակում արդեն կա երեք մեղադրյալ. զորամասի թիկունքի պետ-հրամանատարի թիկունքի և կոմունալ շահագործման ծառայության գծով տեղակալ Գոռ Աղեկյանին, ինչպես նաեւ զորամասի կոմունալ շահագործման ծառայության պետ, զորամասի հակահրդեհային պաշտպանության և փրկարար աշխատանքների ծառայության պետ, մայոր Մ.Ս.-ին մեղադրանք է առաջադրվել զինվորական պաշտոնեական անփութություն կատարելու համար, որն անզգուշությամբ առաջացրել է մարդու մահ։ Նրանց նկատմամբ որպես խափանման միջոց է ընտրվել կալանավորումը։ Վարույթի շրջանակներում հանրային քրեական հետապնդում է հարուցվել նաև այրվածքներով հոսպիտալացված կապիտանի նկատմամբ՝ ՀՀ քրեական օրենսգրքի 532-րդ հոդվածի 4-րդ մասով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու կամ ավելի անձանց մահ):

Հեղինակ՝ Իզաբել Սահակյան

Աղբյուր` Փաստինֆո