Փաստ ինֆո

Գեղարքունիքի մարզի Ազատ գյուղի տարածքում տեղակայված ինժեներասակրավորային վաշտի կացարանում բռնկված հրդեհի վերաբերյալ լրագրողներին հարցազրույց տալուց հետո պաշտոնից ազատված դասակի հրամանատարից գումարային պահանջ կներկայացվի։ Այս մասին «Փաստինֆո»-ի հետ զրույցում ասաց փաստաբան Արսեն Բաբայանը։

Ինչպես արդեն տեղեկացրել ենք՝ ողբերգական դեպքի օրը դասակի հրամանատարը լրագրողների հետ զրույցում թյուրիմաց էր գնահատել վառարանը ավտոբենզինով միացնելու հետևանքով հրդեհի բռնկման մասին վարկածը, ինչը շրջանառության մեջ էր դրել Փաշինյանը՝ կառավարության նիստում։ Հարցազրույցից անմիջապես հետո տեղեկություններ շրջանառվեցին առ այն, որ իրավապահները պատրաստվում են ձերբակալել դասակի հրամանատարին, իսկ իշխանական քարոզչամեքենան թիրախավորել էր զինծառայողին՝ կապելով նրան տարբեր ընդդիմադիր քաղաքական ուժերի հետ։

Հետագայում արդեն հայտնի դարձավ, որ հարցազրույցի հենց հաջորդ օրը դասակի հրամանատարն ազատվել է պաշտոնից և, թեև ազատումը եղել է սեփական դիմումի համաձայն, այդուհանդերձ, ճնշումների ներքո, ասել են՝ ազատվի, նա էլ՝ ազատվել է։ Ճնշումների հանգամանքը, ամենայն հավանականությամբ, որոշիչ կարող է և չլինել՝ նրան ներկայացվելիք գումարային պահանջի դեպքում։ Խնդիրն այն է, որ դասակի հրամանատարն ունի 10 տարի ժամկետով կնքված պայմանագիր և սեփական դիմումի համաձայն աշխատանքից ազատվելու դեպքում տուգանք պետք է վճարի՝ յուրաքնաչյուր չծառայած տարվա համար 1 մլն դրամի չափով, ըստ այդմ, գումարային պահանջ կներկայացվի, թե որքան՝ Արսեն Բաբայանն այս պահին դեռևս չի կարող ասել, քանի որ ՊՆ-ի կողմից դեռևս հաշվարկ չի կատարվել։ Խոսքը մոտավորապես 6 մլն դրամի մասին է։

Նշենք, որ դասակի հրամանատարը քրեական վարույթի շրջանակներում հարցաքննվել է մեկ անգամ՝ վկայի կարգավիճակով։ Նրան երկրորդ անգամ հարցաքննության դեռևս չեն հրավիրել։

Վարույթի շրջանակներում հարցաքննվել են նաև հրդեհի հետևանքով Այրվածքաբանության կենտրոնում գտնվող երեք զինծառայողներից երկուսը։ Կապիտանը, որը նախօրեին էր տեղափոխվել հիվանդասենյակ, և, ըստ մեղադրանքի, փորձել է 5 լիտրանոց ավտոբենզինով միացնել վառարանը, պաշտոնական աղբյուրների փոխանցմամբ դեռևս չի հարցաքննվել, հրաժարվել է ցուցմունք տալուց։

Նկատի ունենալով նրա առողջական վիճակը՝ առ այժմ նրա խափանման միջոցի հարցը չի բարձրացվել։

Ինչ վերաբերում է երեկ ձերբակալված մայորին, ապա դատախազությունից «Փաստինֆո»-ի հարցին ի պատասխան հայտնեցին, որ մայորը կալանավորվել է։

Հիշեցնենք, որ ողբերգական դեպքը տեղի է ունեցել հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։ Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։

Դեպքի օրը կառավարության նիստին Նիկոլ Փաշինյանի կողմից շրջանառության մեջ է դրվել ավտոբենզինի միջոցով վառարանը միացնելու հետեւանքով հրդեհի բռնկման վարկածը, ինչը հետագայում արտացոլվել է նաև ՔԿ տարածած հաղորդագրությամբ։ Դասակի հրամանատարը, սակայն, թյուրիմաց է գնահատել նշված վարկածը՝ նշելով, որ հունվարի 18-ի երեկոյան ինքը կացարանում բենզին չի տեսել, մեկ այլ զինվորական հայտնել է, որ վառարանը միացնում են առավոտյան ու բացառել գիշերվա կեսին, երբ արդեն քնում են, առավել եւս բենզինով թեժացնելը։ Հունվարի 26-ի՝ կառավարության նիստում Նիկոլ Փաշինյանը շարունակեց առաջ մղել իր կողմից ավելի վաղ շրջանառության մեջ դրվող վարկածը՝ հրապարակելով նաև վկաների ցուցմունքները, որն իրեն ի պաշտոնե հասանելի չեն կարող լինել։

Քրեական վարույթի շրջանակում օրերս ձերբակալվել, ապա կալանավորվել էր զորամասի թիկունքի պետ-հրամանատարի թիկունքի և կոմունալ շահագործման ծառայության գծով տեղակալ Գոռ Աղեկյանը։ Նա մեղադրվում է զինվորական պաշտոնեական անփութություն կատարելու մեջ, որն անզգուշությամբ առաջացրել է մարդու մահ։ Նույն մեղադրանքով ձերբակալվել, ապա կալանավորվել է նաև զորամասի կոմունալ շահագործման ծառայության պետ, զորամասի հակահրդեհային պաշտպանության և փրկարար աշխատանքների ծառայության պետ, մայոր Մ.Ս.-ն։ Վարույթի շրջանակներում հանրային քրեական հետապնդում է հարուցվել նաև այրվածքներով հոսպիտալացված կապիտանի նկատմամբ՝ ՀՀ քրեական օրենսգրքի 532-րդ հոդվածի 4-րդ մասով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու կամ ավելի անձանց մահ):

Հեղինակ՝ Իզաբել Սահակյան

Աղբյուր` Փաստինֆո