Փաստ ինֆո

ՀՀ կառավարությունը հրաժարվում է զբաղվել բռնի տեղահանված արցախցիների խնդիրներով։ Մեզ փախստականի կարգավիճակ տալու համար բազմիցս թե՛ բանավոր, թե գրավոր դիմել ենք Կառավարությանը, բայց ամեն անգամ լղոզված պատասխաններ են տվել։ Այդ մասին «Փաստինֆո» -ի հետ զրույցում ասաց «Հանուն Հադրութի» ՀԿ նախաձեռնող խմբի անդամ Լևոն Հայրյանը։

«ՀՀ իշխանությունը եթե ցանկանա, ապա միջազգային հանրության աջակցությամբ կհասներ նրան, որ մենք կարողանայինք վերադառնալ մեր հայրենիք՝ Հադրութ։ Այսինքն՝ խնդիրը ոչ թե այն է, որ չկա դրա հնարավորությունը, այլ Կառավարությունը չունի ցանկություն՝ զբաղվելու մեր խնդիրներով»,-նկատեց Հայրյանը։

Բռնի տեղահանվածներին ապաստարան տալու խնդրանքով էլ ՀԿ անդամները Ֆրանսիայի դեսպանատուն են դիմել։ Ինչպես մեզ հետ զրույցում նշեց Հայրյանը, դեսպատանանն իրենց վստահեցրել են, որ Արցախից տեղահանվածների խնդիրներին քաջածանոթ են և օերնքի շրջանակում ամեն ինչ անելու են՝ վերջիններիս օգնելու համար։

«ՀՀ կառավարությանն ուղղված մեր նամակներից մեկում մենք հստակ պահանջներ ենք ներկայացրել։ Առաջին կետով պահանջել ենք աշխատել Հադրութը վերադարձնելու ուղղությամբ։ Ամենաշատը դա ենք ուզում, ամենանախընտրելի, ցանկալի տրբերակը դա է։ Եթե չեն կարող, չեն ուզում, ապա ուզում ենք հասկանալ, թե ինչու գոնե փախստականի կարգավիճակ չեն տալիս։ Երրորդ երկրում ապաստարան ստանալու տարբերակն ամենավերջինն է, բայց դարձյալ քննարկում ենք․ ինչպես նշեցի, Ֆրանսիայի դեսպանատան հետ աշխատում ենք, շփումները շարունակվում են»,-ասաց Հայրյանը՝ հավելելով, որ կառավարությունն անգամ տեղահանվածների համար համայնք կառուցելու առաջարկը չի քննարկել։

Լևոն Հայրյանի խոսքով՝ տեղահանվածերին փախստականի կարգավիճակ տալու համար իրենք տարբեր գերատեսչություններում են եկել՝ այդ թվում ԱԳՆ-ում։

«ԱԳՆ-ում էլ մեզ փորձեցին համոզել, թե ՀՀ օրենսդրությամբ չեն կարող մեզ փախստականի կարգավիճակ տալ։ Մենք էլ ասացինք՝ օրենսդրությամբ չեք կարող, քաղաքական որոշումով տվեք»,-ասաց Հայրյանն ու կրկին վերահաստատեց այն համոզմունքը, որ ՀՀ իշխանությունն ուղղակի ցանկություն չունի զբաղվելու Արցախից տեղահանվածների հարցերով։

Աղբյուր` Փաստինֆո