Փաստ ինֆո

«Սուրմալու»-ի և սահմանամերձ Ազատ գյուղի դեպքերը ահազանգ են, որ մենք ավելի խստացնենք պահանջվող չափորոշիչներին համապատասխան ստուգումները և այնպես անենք, որ անվտանգային բոլոր ստանդարտները պահպանվեն նմանատիպ առևտրային կենտրոններում: Այս մասին այսօր՝ փետրվարի 1-ին, ԱԺ-ում լրագրողների հետ զրույցում ասաց ՀՀ էկոնոմիկայի նախարար Վահան Քերոբյանը՝ մեկնաբանելով ՀՀ ՔՀՏԱ տեսչական մարմնի՝ «Մալաթիա» տոնավաճառ փետրվարի 1-ից փակելու որոշումը:

«Օրենքի սահմաններում ընդունվել է ամենախելամիտ որոշումը, այնտեղ աշխատող մարդկանց համար վատ աշխատանքային պայմաններ են ապահովված: Մոտակայքում կան առևտրի կենտրոններ, այդ առևտրի կենտրոններում հանգիստ կարող են տեղ ճարել և շարունակել իրենց բիզնես գործունեությունը»,- նշեց Քերոբյանը:

Նրա կարծիքով՝ բոլոր խոշոր առևտրի կենտրոններում պետք է ստուգումներ անցկացվեն և ամեն ինչ պետք է անենլ, որ ՀՀ բոլոր քաղաքացիները՝ թե բիզնեսմենները, թե այդ առևտրի կենտրոնների այցելուներն ամբողջությամբ պաշտպանված լինեն:

«Այդ ամենը պետք է ավելի խստացվի, տուգանքների, պատասխանատվության չափը պետք է փոխվի որ մենք կարողանանք հասնել մարդկանց կյանքի որակի փոփոխության և ներքին անվտանգային կարևոր ստանդարտներին»,- ընդգծեց նախարարը:
Նրա խոսքով՝ տոնավաճառի աշխատակիցները տարիներով աշխատել են անվտանգության նորմերին չհամապատասխանող տարածքում և դա նորմալ է համարվել, այսօր, երբ պատկան մարմինները այն փակելու որոշում են կայացրել՝ անակնկալի են եկել ու զարմացել:

«Վաղ թե ուշ այդ օրը գալու էր, ավելի լավ է, որ եկել է այս օրը, և ոչ թե ասենք, «Սուրմալու»-ի պես օր: Շատ մարդիկ իրենց անվտանգության մասին չեն մտածում, ամեն օր փողոցով քայլելիս ես տեսնում եմ մարդկանց, թե ինչպես են կարմիր լույսի տակով անցնում, մի քանի անգամ էլ տեսել եմ՝ ինչպես են կարմիր լույսի տակով անցնող մարդկանց վրաերթի ենթարկել»,- հավելեց Քերոբյանը:

Աղբյուր` Փաստինֆո