Փաստ ինֆո

Երևանի ընդհանուր իրավասության դատարանում՝ դատավոր Աննա Դանիբեկյանի նախագահությամբ, ավելի քան մեկ ամիս տևած ընդմիջումից հետո կայացավ ՀՀ երկրորդ նախագահ Ռոբերտ Քոչարյանի և ՀՀ նախկին փոխվարչապետ, ԱԺ «Հայաստան» խմբակցության պատգամավոր Արմեն Գևորգյանի գործով դատական նիստը, որը կրկին հետաձգվեց։

«Փաստինֆո»-ի թղթակցի հաղորդմամբ՝ դատական նիստին չէր ներկայացել թարգմանիչը՝ առողջական խնդիրների պատճառով, սակայն, նկատի ունենալով, որ թարգմանված նյութերում եզրույթների հետ կապված դատարանը պարզաբանումների անհրաժեշտություն է տեսել, թարգմանիչը դատարան է ուղարկել թարգմանված եզրույթների իմաստաբանական յուրահատկությունների վերաբերյալ պարզաբանումներ։ Թարգմանչի պարզաբանումները կողմերին ոչինչ այդպես էլ չտվեց։ Մեղադրող դատախազ Գևորգ Բաղդասարյանը նշեց, որ, եթե դատարանը գտնում է, որ փաստաթուղթը պետք է հետազոտվի թարգմանի ներկայությամբ, ուրեմն այդպես պետք է լինի, սակայն իրենց դիրքորոշումն այն է, որ խոտան փաստաթղթի հետազոտումը չի կարող համարվել հետազոտում, դա սպառնում է այդ ապացույցի թույլատրելիությանը։
«Մենք գտնում ենք, որ ապացույցը պետք է հետազոտվի սկզբից՝ պատշաճ թարգմանված»,-նշեց Բաղդասարյանը։
Պաշտպան Հայկ Ալումյանն արձանագրեց՝ եզակի դեպքերից մեկն է, երբ կիսում է մեղադրողի կարծիքը, թարգմանիչը պարզաբանումներով էլ ավելի է խճճել և նրա ներկայությունը փաստաթղթի հետազոտմանը պարտադիր է։ Արմեն Գևորգյանի պաշտպան Լուսինե Սահակյանը հայտնեց, որ փետրվարի 7-ին Արմեն Գևորգյանը պետք է առցանց ձևաչափով մասնակցի ԵԽԽՎ նիստին, ըստ այդմ, խնդրում են նիստը չնշանակել այդ օրը։ Դատական նիստը հետաձգվեց՝ մինչև փետրվարի 14-ին։

Ըստ մեղադրական եզրակացության՝ Ռոբերտ Քոչարյանը մեղադրվում է այն բանի համար, որ նա, 1998-2008թ զբաղեցնելով ՀՀ նախագահի պաշտոնը, իր պաշտոնեական դիրքն օգտագործելով Սիլվա Համբարձումյանի օգտին գործողություններ կատարելու, նպաստելու, այն է՝ ընկերությանը տրամադրված ընդերքն օգտակար հանածոների շահագործման համար հատուկ լիցենզիաներով ընկերության 100 տոկոս բաժնեմասերի ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար 2008թ փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով 927 մլն ՀՀ դրամին համարժեք 3 մլն ԱՄՆ դոլարի չափով կաշառք։ Ըստ մեղադրական եզրակացության՝ Արմեն Գևորգյանը մեղադրվում է այն բանի համար, որ նա, 2006թ փետրվարից մինչև 2008թ ապրիլի 21-ը զբաղեցնելով ՀՀ նախագահի աշխատակազմի ղեկավարի և ԱԽ քարտուղարի պաշտոնները, օգտագործելով իր պաշտոնեական դիրքը, Սիլվա Համբարձումյանի օգտին գործողություններ կատարելուն նպաստելու համար 2008թ ապրիլին Սամվել Մայրապետյանի օժանդակությամբ ստացել է 309 մլն ՀՀ դրամին համարժեք 1 մլն ԱՄՆ դոլար կաշառք, ինչպես նաև՝ խեղաթյուրելով և թաքցնելով նման գումարի իրական բնույթն ու ծագումը, օրինականացրել է առանձնապես խոշոր չափերով հանցավոր ճանապարհով ստացված եկամուտները։

Հեղինակ՝ Իզաբել Սահակյան

Աղբյուր` Փաստինֆո