Փաստ ինֆո

Վարչական դատարանում՝ դատավոր Մհեր Պետրոսյանի նախագահությամբ, այսօր ավարտվեց Արցախյան երրորդ՝ 44-օրյա պատերազմում զոհված զինծառայող Դավիթ Ուզունյանի հորը՝ Բագրատ Ուզունյանին վարչական պատասխանատվության ենթարկելու մասին ոստիկանության հայցադիմումի քննությունը։

Հիշեցնենք, որ սեպտեմբերի 21-ին՝ ՀՀ Անկախության օրը՝ վաղ առավոտյան ոստիկանության ծառայողներն անհամաչափ բռնի ուժի գործադրմամբ «Եռաբլուր»-ից բերման են ենթարկել 37 քաղաքացու՝ զոհված զինծառայողների ծնողներին, որոնք ցանկանում էին թույլ չտալ Նիկոլ Փաշինյանին՝ մուտք գործել պանթեոն՝ նշելով, որ նա է իրենց որդիների մահվան մեղավորը։ Ոստիկանությունից հայտնել են, որ նրանք բերման են ենթարկվել՝ Վարչական իրավախախտումների վերաբերյալ օրենսգրքի 182-րդ հոդվածի հիմքով՝ ոստիկանների օրինական պահանջը չկատարելու համար, թեեւ տեսանյութերում պարզ երեւում է, որ ոստիկանները որեւէ պահանջ չեն ներկայացրել, նախ ուժի գործադրմամբ բերման են ենթարկել հայրերին, ապա նաեւ՝ մայրերին։ Ոստիկանների գործողությունների հետևանքով զոհված զինծառայողների մայրերից մի քանիսը ստացել են տարբեր աստիճանի մարմնական վնասվածքներ, որը հետագայում հաստատվել է նաև դատաբժշկական փորձաքննության եզրակացությամբ։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 441-րդ հոդվածի 2-րդ մասի 1-ին կետի հատկանիշներով, այն է՝ պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը, որը կատարվել է բռնություն գործադրելով։

Քրեական գործին զուգահեռ ոստիկանությունը հայցադիմումներ է ներկայացրել Վարչական դատարան՝ պահանջելով վարչական պատասխանատվության ենթարկել զոհված զինծառայողների ծնողներին։ Այս ընթացքում դատարանում քննվել է ներկայացված հայցադիմումներից միայն երկուսը։

«Փաստինֆո»-ի թղթակցի հաղորդմամբ՝ այսօր Վարչական դատարանում՝ դատավոր Մհեր Պետրոսյանի նախագահությամբ, այսօր կայացել է Բագրատ Ուզունյանի դեմ ներկայացված հայցադիմումի քննությունը։ Հայցվոր կողմը՝ ոստիկանությունը, չէր ներկայացել այսօրվա նիստին։ Ծնողների ներկայացուցիչ Ներսես Հարությունյանն ամբողջությամբ առարկեց հայցի դեմ՝ պնդելով, որ այն ենթակա է մերժման։ Նրա խոսքով՝ Ուզունյանն ամեն օր առանց բացառությունների այցելում է «Եռաբլուր» զինվորական պանթեոն՝ որդու շիրիմին, իսկ դեպքի օրը լուսացրել է հենց պանթեոնում՝ մյուս ծնողների հետ միասին, քանի որ Անկախության օրն էր, ծնողները որոշել էին լինել որդիների շիրիմների մոտ։ Ծնողները հավաքվել էին հարցեր քննարկելու, իրենց դժգոհություններով կիսվելու համար։

«Առավոտյան պանթեոն են այցելել ոստիկանները՝ իրենց պահելով լկտի, հայտնել, որ տարածքը պետք է ազատեն։ Երբ ծնողներն ասել են, որ որևէ մեկն իրավունք չունի իրենց արգելել գտնվել որդիների շիրիմների մոտ, ոստիկաններն առանց զգուշացնելու, քաշքշելով, կոպտորեն, նվաստացուցիչ վերաբերմունքով բերման են ենթարկել ծնողներին, այդ թվում՝ Բագրատ Ուզունյանին»,- նշեց Հարությունյանը։

Նրա դիտարկմամբ՝ ծնողների՝ մի քանի հարցի շուրջ հավաքվել քննարկելը դեռևս հանրահավաք չէ, ընդ որում, հանրահավաքի դեպքում էլ ոստիկանությունը նախ պետք է կապ հաստատի կազմակերպիչների հետ՝ հայտնելով, որ պահանջում են դադարեցնել հավաքը, իսկ պահանջը չկատարելու դեպքում ոստիկանը պետք է առնվազն երկու անգամ բարձրախոսով մասնակիցներին զգուշացնի՝ հավաքը դադարեցնելու պահանջի մասին՝ դրա համար ողջամիտ ժամանակ տրամադրելով, ինչն այս դեպքում չի կատարվել։

Պատասխանող կողմի պնդմամբ՝ Բագրատ Ուզունյանը թույլ չի տվել այնպիսի արարք, որը կարող էր հիմք լինել վարճական ձերբակալման համար, իսկ ոստիկանության կողմից ուժի գործադրումն անհրաժեշտություն չէր։

Գործի քննությունն ավարտվեց։ Վարչական դատարանը որոշումը կհրապարակի փետրվարի 20-ին՝ «Դատալեքս» համակարգում։ Նիստի ավարտից հետո Ներսես Հարությունյանը լրագրողների հետ զրույցում նշեց՝ համոզված է՝ ոստիկանության հայցը պետք է մերժվի, ապացուցել են, որ ծնողները որևէ վարչական իրավախախտում թույլ չեն տվել, հակառակը, ապացուցել են, որ ոստիկանության ծառայողներն են թույլ տվել քրեական օրենսգրքով սահմանված արարք։

Հեղինակ՝ Իզաբել Սահակյան

Աղբյուր` Փաստինֆո