Փաստ ինֆո

Նիկոլ Փաշինյանի՝ Կառավարության նիստին հնչեցրած ելույթի՝ Բերձորի միջանցքին վերաբերող հատվածը հակասությունների և անտրամաբանությունների թանձրույթ է։ Իր ձևակերպումներով ու հայտարարություններով նա թյուրիմացության մեջ է գցում ողջ հայությանն ու շեղում ստեղծված վիճակից։ Այդ մասին «Փաստինֆո»-ի հետ զրույցում ասաց ռազմական պատմաբան Արմեն Այվազյանը։

«Փաշինյանը խոսում է Բաքվի պլանի մասին, որն է՝ տարատեսակ ճնշումների միջոցով հայաթափել Արցախը, ասում, որ դա էթնիկ զտման քաղաքականություն է, որից հետո ասում, թե Ադրբեջանի նպատակը խաղաղության օրակարգը խափանելն ու տարածաշրջանում նոր պատերազմ հրահրելն է։

Ադրբեջանն արդեն թե՛ խաղաղության օրակարգն է խափանել, թե՛ պատերազմ է իրականացնում՝ առայժմ Արցախի ժողովրդի նկատմամբ։ 46 օր է, ինչ Ադրբեջանը պաշարված է պահում Արցախը, իսկ պաշարումը պատերազմական բավականին արդյունավետ միջոց է, ինչը թույլ է տալիս առանց լուրջ բախումների ոչնչացնել ներսում գտնվող բնակչությանը, կայազորին։ Դա ցույց է տվել ռազմական արվեստի պատմությունը»,-շեշտեց պատմաբանը։

Փաշինյանի արած մեկ այլ հայտարարություն, որով, ըստ էության, պետական պաշտոնյաներին արգելվեց կոշտ բառապաշար օգտագործել Ադրբեջանի գործողությունները որակելիս, որպեսզի չվնասեն, այսպես կոչված, խաղաղության օրակարգին, Այվազյանի գնահատմամբ, դարձյալ միտված է մարդկանց ուշադրությունն իրականությունից շեղելուն։

«Երբ խաղաղության օրակարգ չկա, իսկ դու կիրառում ես խաղաղության օրակարգի բառապաշար, նշանակում է, որ դու սխալ են ներկայացնում իրականությունը, խաբում քո ժողովրդին։ Լաչինի միջանցքի փակումը սադրանք որակելը դարձյալ հասարակությանը թյուրիմացության մեջ գցելու նպատակ ունի։ Փաշինյանն առաջարկում է Ադրբեջանի էթնիկ զտման քաղաքականությանը պատասխանել միջազգային հանրության ուշադրությունը կենտրոնացնելով ու դրանով բավարարվել։ Խնդիրն այն է, որ երբ քո դեմ պատերազմ են մղում, դու պետք է մտածես հակահարվածի մասին։ Եթե հրաժարվում ես պատերազմին մասնակցել, դու ջախջախվում ես, և մենք հիմա ջախջախվում ենք՝ հույսներս դնելով միջազգային հանրության արձագանքի վրա»,-ասում է ռազմական պատմաբանը և հավելում, որ որևէ երկիր կամ միջազգային խոշոր կառույց մինչև հիմա Ադրբեջանի նկատմամբ որևէ լուրջ ճնշում չի գործադրել և հայտարարել են, որ պատժամիջոցներ չեն էլ կիրառելու։

Մեր զրուցակիցն ահազանգում է՝ ևս 40 օր այդպես պաշարած պահելով Արցախը՝ Ադրբեջանը կհասնի իր նպատակին՝ Արցախի հայաթափմանն ու հայրենազրկմանը, իսկ Արցախից հետո միանշանակ կանցնի Սյունիքին ու մյուս մարզերին։

«Փաշինյանն ասում է՝ մեր տարածաշրջանում առկա խնդիրների խաղաղ կարգավորումն այլընտրանք չունի․ սուտ է, ունի այլընտրանք․ դա ցեղասպանությունն է, որն Ադրբեջանը մասամբ արդեն իրականացրել է․ տասնյակ հայկական գյուղեր արդեն հայաթափվել են։ Խաղաղության օրակարգի մասին ժամանակավրեպ թեզը դարձյալ հասարակության գլխի տակ փոփուկ բարձ դնել է նշանակում»,-եզրափակեց Այվազյանը։

Աղբյուր` Փաստինֆո