Փաստ ինֆո

Ազատ գյուղի տարածքում տեղակայված զորամասի հրդեհի դեպքից ժամեր անց Նիկոլ Փաշինյանը կառավարության նիստում հետաքննության ընթացքը կանխորոշեց և ներկայացրեց իր տարբերակը, որ դժբախտ պատահարը տեղի է ունեցել սպայի կողմից բենզին լցնելու արդյունքում: Դրանով այդ մեծ դժբախտությունը վերածվեց մի միջադեպի, մինչդեռ շատերը արձագանքեցին, որ այս դժբախտությունը համակարգային պրոբլեմի արդյունք է, և այդ համակարգային պրոբլեմը հենց Նիկոլ Փաշինյանն է և իր կառավարումը: Խնդիրը կայանում է նրանում, որ մեր զինվորները չպետք է լինեին այնպիսի պայմաններում, որը զորանոցային չէր: «Փաստինֆո»-ի եթերում ասել է ԵՊՀ դոցենտ, պ.գ.թ., «5165» շարժման անդամ Մենուա Սողոմոնյանը:

Բանախոսի խոսքերով, սա կառավարման և վերահսկողության խնդիր է: «Մենք տեսել ենք, որ չորս ու կես տարվա ընթացքում չորս պաշտպանության նախարարներ են իրար հաջորդել: Նման բան չի լինում՝ սա համակարգի դեմ ուղղված գործողություն է: Հետևապես, խնդիրների խնդիրը կառավարման ամենաբարձր օղակի մեջ է՝ Նիկոլ Փաշինյանի մեջ է»,- հավելեց Մ. Սողոմոնյանը:

Նրա խոսքերով՝ նման պայմանները նշանակում են, որ դրա համար կա՛մ անհրաժեշտ միջոցներ չեն հատկացրել, կա՛մ այդ փողը այլ ոլորտների վրա են ծախում՝ թանկարժեք գործուղումներ, ավտոմեքենաներ, և այն: Եթե բանակը անհրաժեշտ գումար ստանում է, ապա ինչու՞ բանակի համար նախատեսված 50 միլիարդ դրամը 2022թ. հունվար-սեպտեմբեր ամիսների համար չի ծախսվել:

Ժողովրդի գումարը, որը Ն. Փաշինյանը խոստացել էր կոպեկ առ կոպեկ հետ բերել պետբյուջե և վերադարձնել ժողովրդին՝ հինգ տարին շուտով կլրանա՝ վերադարձ չենք տեսնում, եղածն էլ ինքն է թալանում և վերաբաշխում են իրենց թիմի բարեկեցության համար:

Ադրբեջանը տարածաշրջանի խաղի կանոններով շարժվելու խնդիր է դնում և առաջ շարժվում: Մեր պարագայում գլխավոր խնդիրը դրվում է ոչ թե պետություն պահպանելը, այլ իշխանությունը պահպանելը: Դրա համար քայլեր են արվում, որոնք ակնահաճո և ականջահաճո են: Նեղ վերնախավը պետականակիր մարդիկ չեն՝ նրանք ժամանակին պետության և պետականության դեմ են հանդես եկել:

«Կարճ ժամանակում հնարավոր է ուղղել մեր բանակի ողնաշարը: Ճիշտ կառավարման և ճիշտ բարոյահոգեբանական աջակցության պարագայում մեր բանակը կվերականգնի իր նախկին մարտունակությունը՝ մի բան էլ ավելին»,- եզրափակեց բանախոսը:

Մանրամասները՝ տեսանյութում

Աղբյուր` Փաստինֆո