Փաստ ինֆո

Ամենավառ երևակայության դեպքում անգամ շատ դժվար է մի քանի նախադասությամբ գնահատել ՀՀ արդեն նախկին ՄԻՊ Քրիստինե Գրիգորյանի գործունեությունը: Այս մասին «Փաստինֆո»-ի հետ զրույցում ասաց «Անվտանգություն և ժողովրդավարություն» իրավապաշտպան ՀԿ–ի նախագահ, նախկին պատգամավոր Նաիրա Զոհրաբյանը՝ անդրադառնալով Քրիստինե Գրիգորյանի մեկամյա գործունեությանը:

«Կարող եմ ընդամենը մեկ բառով բնութագրել՝ «զրո»: Նա եղել է Նիկոլ Փաշինյանի անձնական օգտագործման մարդու իրավունքների պաշտպանը և նրա օրակարգում բացի Նիկոլի, նրա կլանի, թավշյա խունտայի պաշտպանությունից որևէ այլ օրակարգ չի եղել»,- նշեց Զոհրաբյանը:
Նրա կարծիքով՝ ծիծաղելի են նաև շրջանառվող տեղեկությունները, թե որտեղ և ինչ պաշտոններում կարող են նշանակել Գրիգորյանին: Կես կատակ, կես լուրջ՝ Զոհրաբյանը խոստովանում է՝ չի զարմանա, եթե մի օր էլ գործող իշխանությունները որոշեն Գրիգորյանին, օրինակ, առաջին կին տիեզերագնաց նշանակել:

Նախկին պատգամավորը թերահավատ է նաև հաջորդ օմբուդսմենի ընտրության հարցում. նրա խոսքով՝ նոր նշանակումը կլինի հերթական «պռավալը», քանի որ Փաշինյանին հաջողվել է շատ կարճ ժամանակում ամեն ինչ ավիրել, զրոյացնել և երկիրը իջեցնել Ջոնի Բրջոնիի մակարդակի, հետևաբար, ըստ Զոհրաբյանի, ով էլ լինի հաջորդ ՄԻՊ-ը չի կարող այնքան վճռականություն ունենալ, որ չճկվի Փաշինյանի առաջ:

«Նա մշտապես ընտրելու է պաշտոնյաներ, ովքեր պետք է պաչեն իր խաչը և ոչ միայն իր խաչը, ինձ համար իր նշանակած բոլոր պաշտոնյանները Ջոնի Բրջոնի են. Ջոնի Բրջոնի՝ երկար մազերով, կարճ մազերով, բլանդինկա, բրունետկա, բեղերով, առանց բեղերի՝ մեծ առումով դա ոչինչ չի փոխում»,- հավելեց Զոհրաբյանը:

Հիշեցնենք, որ Քրիստինե Գրիգորյանը հրաժարականի առաջին դիմումը ներկայացրել էր Ազգային ժողով հունվարի 23-ին, իսկ երեկ` երկրորդը։ Պաշտպանի լիազորությունները դադարում են հրաժարականի դիմումը ներկայացնելուց ոչ ուշ, քան 1 շաբաթվա ընթացքում կրկին հրաժարականի դիմում ներկայացնելու դեպքում։

Նշենք, որ մամուլում արդեն ՄԻՊ հնարավոր թեկնածուի անուն է շրջանառվում: Որոշ տեղեկություններով՝ Փաշինյանն այդ պաշտոնում մտադիր է նշանակել աշխատանքի եւ սոցիալական հարցերի փոխնախարար Տաթեւիկ Ստեփանյանին, ով, ըստ մամուլի հրապարակումների, 2004-2020 թվականներին աշխատել է որպես հագուստի խանութի մենեջեր:

Մանրամասները՝ տեսանյութում։

Աղբյուր` Փաստինֆո