Փաստ ինֆո

Գեղարքունիքի մարզի Ազատ գյուղում տեղակայված ինժեներասակրավորային վաշտի կացարանում կացարանում բռնկված հրդեհի հետևանքով այրվածքներ ստացած երեք զինծառայողների առողջական վիճակում դրական դինամիկա ունենք: Տեղեկությունը «Փաստինֆո»-ի հետ զրույցում հայտնեց ՀՀ Ան մամուլի խոսնակ Հռիփսիմե Խաչատրյանը:

«Զինծառայողներից 2-ը շարունակում են բուժումը վերակենդանացման բաժանմունքում, երրորդն էլ իսկզբանե հիվանդասենյակում է: Ամեն բան արվում է յուրաքանչյուրին անհրաժեշտ բուժօգնությունն ու միջամտությունները ժամանակին, գրագետ, ճիշտ ձևով իրականացնելու համար: Դրա շնորհիվ է, որ այս կարճ ժամանակահատվածում վերակենդանացման բաժանմունքում գտնվող երկու տղաների մոտ դրական տեղաշարժ ունենք»,- ասաց Խաչատրյանը:

Ան խոսնակի փոխանցմամբ՝ թեև տղաների գիտակցությունը տեղն է, բայց անհանգստացնել չի թույլատրվում: Խաչատրյանի գնահատմամբ՝ զինծառայողների վիճակը շարունակում է մնալ կայուն ծանր:

Հիշեցնենք, որ հունվարի 19-ին՝ ժամը 01:30-ի սահմաններում, դեռևս չպարզված հանգամանքներում` Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել է 15 զինծառայող, եւս 3 հոգի տարբեր աստիճանի այրվածքներով տեղափոխվել հիվանդանոց, նրանց վիճակը գնահատվում է ծանր։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։

Հունվարի 20-ին կառավարության նիստին Նիկոլ Փաշինյանի կողմից շրջանառության մեջ է դրվել ավտոբենզինի միջոցով վառարանը միացնելու հետեւանքով հրդեհի բռնկման վարկածը, ինչը հետագայում արտացոլվել է նաև ՔԿ տարածած հաղորդագրությամբ։

Դասակի հրամանատարը, սակայն, թյուրիմաց է գնահատել նշված վարկածը՝ նշելով, որ հունվարի 18-ի երեկոյան ինքը կացարանում բենզին չի տեսել, մեկ այլ զինվորական հայտնել է, որ վառարանը միացնում են առավոտյան ու բացառել գիշերվա կեսին, երբ արդեն քնում են, առավել եւս բենզինով թեժացնելը։

Աղբյուր` Փաստինֆո