Փաստ ինֆո

Ազատ գյուղում տեղի ունեցած ողբերգական հրդեհից հետո ՀՀ վարչապետ Նիկոլ Փաշինյանի վարքագիծը բացարձակապես անընդունելի է և խստորեն դատապարտելի : Այս մասին «Փաստինֆո»-իհետ զրույցում ասաց քաղաքական վերլուծաբան Արմեն Բաղդասարյանը՝ արձանագրելով, որ ողբերգական դեպքից հետո երկրի ղեկավարն այդպես էլ չայցելեց դեպքի վայր, իսկ ողբերգությունից 5 օր անց երկրում սուգ չի հայտարարվել:

«Կարծում եմ՝ հասարակությունը պետք է իր արձագանքը տա այդ վարքագծին: Դա վկայում է այն մասին, որ այս իշխանությունները բացարձակապես չեն գիտակցում իրենց պատասխանատվությունը, չեն գիտակցում իրենց մեղքը, ավելին՝ ցանկացած նման իրադարձության ժամանակ փորձում են պատասխանատվությունը գցել այլոց վրա: Հասկանալի է, որ ինքը և՛ թիվ մեկ մեղավորն է, և՛ պատասխանատուն է»,- նշեց քաղաքական վերլուծաբանը:

Նրա կարծիքով՝ ողբերգական հրդեհին պետք է հաջորդեր երկրի քաղաքական ղեկավարության պատասխանատվության հարցը, ինչը ենթադրում է իշխանությունների հրաժարական, ընդ որում՝ ոչ միայն պաշտպանության նախարարի, այլ Կառավարության հրաժարական՝ ամբողջ կազմով, որից հետո միայն կարելի էր խոսել քրեական պատասխանատվության մասին՝ հստակեցնելով, թե որ պաշտոնյան մեղավորության ինչ բաժին ունի:

«Առաջնահերթ եմ համարում քաղաքական պատասխանատվության հարցը, քանի դեռ այդ հարցը չի լուծվել, քրեական պատասխանատվության մասին խոսք լինել չի կարող, որովհետև իշխանություններն իրենք մեղավորներ կնշանակեն, քավության նոխազներ կգտնեն, բայց իրենց ամբողջական մեղքը չեն ընդունի և կմնան անպատիժ»,- ընդգծեց Բաղդասարյանը:

Իսկ ի՞նչ արեցին իշխանությունները. վերլուծաբանի խոսքով՝ շատ հմտորեն խոսակցություններն ու քննարկումները տեղափոխեցին մեղավորներին բացահայտելու և կոնկրետ պատասխանատուներ նշանակելու դաշտ՝ իրենց վրայից թոթափելով քաղաքական պատասխանատվության բեռը: Թե ինչ կլինի այս ամենից հետո՝ Բաղդասարյանը դժվարանում է ասել:

«Ինձ համար ակնհայտ է, որ իրավիճակի պատճառը այդ համընդհանուր «բառդակն է», որը տիրում է բանակում և դրա հիմնական պատասխանատուն առաջին հերթին Նիկոլ Փաշինյանն է, երկրորդ հերթին պաշտպանության նախարարը, երրորդ հերթին՝ կառավարությունն իր ամբողջ կազմով»,- եզրափակեց քաղաքական վերլուծաբանը:

Նշենք, որ Ազատ գուղում բռնկված ողբերգական հրդեհից 5 օր անց ՀՀ վարչապետ Նիկոլ Փաշինյանն այդպես էլ չի այցելել դեպքի վայր: Մինչ այս պահը երկրում սուգ չի հայտարարվել, փոխարենը՝ Փաշինյանն այս օրերին Աշտարակում հետևել է Կոմիտասի անվան քաղաքային զբոսայգու բարեկարգման աշխատանքների ընթացքին, Կոտայքի և Տավուշի մարզերում մասնակցել է պարեկային ծառայության ստորաբաժանումների աշխատանքի մեկնարկի միջոցառումներին:

Ավելին, «Հրապարակ»-ի տեղեկություններով՝իշխանական ներկայացուցիչները՝ Փաշինյանի գլխավորությամբ կերուխում են կազմակերպել ՆԳՆ նախարարին պատկանող իջևանայան ռեստորաններից մեկում՝ «Դոկ»-ում, ասես՝ ոչինչ չի եղել:

Հիշեցնենք, որ հունվարի 19-ին Գեղարքունիքի մարզի Ազատ գյուղում՝ զորամասերից մեկի տեղակայման կացարանում բռնկված հրդեհի հետևանքով զոհվել է 15 զինծառայող, եւս 3 հոգի տարբեր աստիճանի այրվածքներով տեղափոխվել հիվանդանոց, նրանց վիճակը գնահատվում է ծանր։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։

Հունվարի 20-ին կառավարության նիստին Նիկոլ Փաշինյանի կողմից շրջանառության մեջ է դրվել ավտոբենզինի միջոցով վառարանը միացնելու հետեւանքով հրդեհի բռնկման վարկածը, ինչը հետագայում արտացոլվել է նաև ՔԿ տարածած հաղորդագրությամբ։

Դասակի հրամանատարը, սակայն, թյուրիմաց է գնահատել նշված վարկածը՝ նշելով, որ հունվարի 18-ի երեկոյան ինքը կացարանում բենզին չի տեսել, մեկ այլ զինվորական հայտնել է, որ վառարանը միացնում են առավոտյան ու բացառել գիշերվա կեսին, երբ արդեն քնում են, առավել եւս բենզինով թեժացնելը։

Աղբյուր` Փաստինֆո