Փաստ ինֆո

ՀՀ պաշտպանության նախարարությունում գնումների գործընթացները ծայրահեղ բյուրոկրատացված են: Ցանկացած գնում, որն իրականացվում է, իրականացվում է շատ երկար, անհեթեթ, տարբեր տեսակի պահանջներով: Այս մասին այսօր՝ հունվարի 23-ին, լրագրողների հետ զրույցում ասաց Կառավարության դիմաց բողոքի ակցիայի մասնակիցներից Ավետիք Չալաբյանը:

«Օրինակ՝ տեղական ընկերություններից գնում են բարձր տեխնոլոգիական սարքավորում, պահանջում են, որ այդ ընկերությունների տնօրեններն իրենց անձնական գույքը գրավադրեն՝ որպես պայմանագրերի կատարման պայման, որն աբսուրդ է: Մարդիկ գնում են, ասում են, որ դուք Ռուսաստանից սպառազինություն եք գնում, Ռուսաստանից պահանջում եք, որ իրենք գույք գրավադրե՞ն, թե գնում, խնդրում եք, որ այդ սպառազինությունը ձեզ վաճառեն»,- ընդգծեց նա:

Չալաբյանի խոսքով՝ այդպիսի բազմաթիվ սահմանափակումներ կան, բացի դրանից, տպավորություն է, որ ՀՀ պաշտպանության նախարարությունը և բանակն իրար հետ շատ աղոտ կապ ունեն, չնայած բյուջեի ամենամեծ մասը տրամադրվում է պաշտպանության ոլորտին:

«Ասենք՝ բանակին պետք է շինարարական տեխնիկա, որ նոր ճանապահներ սարքեն, դիրքեր փորեն, բունկեռներ սարքեն, բետոնապատեն դիրքերը և այլն, այդ ամեն ինչը չկա, ու մենք գիտենք, որ էդ գումարով առանձնապես սպառազինություն էլ չեն առել, աշխատավարձերը համակարգում ցածր են շատ, ուր եք ծախսում այդ փողը»,- նշեց Չալաբյանը:

Նա լրագրողների ուշադրությունը հրավիրեց նաև ֆիննախի կայքում ներկայացված պետբյուջեի կատարողականին, որտեղ բոլոր ուղղություններով շատ մանրամասն ներկայացված են բոլոր ծախսերը, մինչդեռ պաշտպանության ուղղությամբ ծախսերը, որն ընդհանուր բյուջեի 20 տոկոսն է կազմում, կես էջ է, կես էջ՝ 200 էջի մեջ:

«Ենթադրենք պետական գաղտնիք է, բայց այդ պետական գաղտնիքը ծածկելով մարդիկ ըստ էության չեն և քանի որ պետական գաղտնիք է, մենք էլ չենք կարող ասել՝ բա էս ինչ եք արել, ուր եք խածսել այդ փողը»,- ասաց հասարակական-քաղաքական գործիչը:
Նշենք, որ այսօր մի խումբ հասարակական-քաղաքական գործիչներ բողոքի ակցիա էին անցկացնում Կառավարության շենքի դիմաց: Նրանք պահանջում էին ՀՀ վարչապետ Նիկոլ Փաշինյանի և ՀՀ պաշտպանության նախարար Սուրեն Պապիկյանի հրաժարականը:

Աղբյուր` Փաստինֆո