Փաստ ինֆո

Ամեն օր և ամեն ժամ այս իշխանությունը ցույց է տալիս ոչ միայն իր անկարողությունը, այլև՝ հանցավոր վարքագիծը՝ մեր երկրի պաշտպանության, անվտանգության վերաբերյալ։ Եթե դինամիկայով նայենք, կտեսնենք, թե որ պայմաններում են այս մարդիկ՝ իշխանությունները, դաշտ նետում նման հարցերը։ Այս մասին լրագրողների հետ զրույցում ասաց ԱԺ «Հայաստան» խմբակցության պատգամավոր Արծվիկ Մինասյանը՝ անդրադառնալով Սեյրան Օհանյանի և Արմեն Չարչյանի նկատմամբ քրեական հետապնդում հարուցելու համաձայնություն ստանալու վերաբերյալ դատախազի կողմից ԱԺ միջնորդագրեր ներկայացնելուն։

Խմբակցության քարտուղարի գնահատմամբ՝ փորձ է արվում հանրության ուշադրությունը շեղել Ազատ գյուղի զորամասում հրդեհի ողբերգական դեպքից, ինչպես նաև՝ Լաչինի միջանցքի փակ լինելու և ՀՀ իշխանության կողմից Արցախի ժողովրդի նկատմամբ անվտանգության հանձնառությունը չկատարելուց։

Մինասյանի խոսքով՝ հայրենիքի համար նվիրաբերված մարդկանց վարկաբեկման հստակ քաղաքականությունը շարունակվում է:

«Ակնհայտ է, որ սրա հիմքում քաղաքական շարժառիթն է: Ակնհայտ է, որ սրա հիմքում հանրության ուշադրությունը շեղելու, սեփական հանցագործությունները թաքցնելուն, քողարկելուն միտված գործընթաց է։ Իրենք հերոսներին ոչնչացնելով փորձում են ցույց տալ, որ հերոսներն իրենք են: Իսկ իրենց հերոսություն ավարտվում է հայրենիքը հանձնելով»,- նշեց Մինասյանը։

Աղբյուր` Փաստինֆո