Փաստ ինֆո

«Ձուկը գլխից փտում է, և եթե ինչ-որ մեկին պետք է պաշտոնանկ անել, ապա միանգամից Փաշինյանին և նրա ամբողջ կաբինետը։ Իսկ ի՞նչ է կատարվում։ Առանց դատաքննության «գլխատում են» մեր բանակի ամբողջ երկրորդ կորպուսը», - «Փաստինֆո» - ի եթերում հայտարարել է մեդիափորձագետ Տիգրան Քոչարյանը։

«Ի՞նչ է նշանակում գլխատել կորպուսը,- շարունակում է փորձագետը. Դա նշանակում է նրան որոշ ժամանակ անգործունակ դարձնել։ Մինչ նոր կադրերը գործի մեջ կմտնեն, բավական երկար ժամանակ կանցնի։ Նույն խնդիրը Հադրութում էր, երբ պատերազմից կես տարի առաջ (Ինչպես գրում են լրատվամիջոցները) Հադրութի գնդի ողջ հրամանատարությունը փոխեցին՝ նշանակելով նրանց, ովքեր հիմնականում ծանոթ չէին տեղանքին։ Հիմա իրավիճակը կրկնվում է։ Մեղավորներն, անշուշտ, պետք է պատիժ կրեն, բայց միանգամից մեղավոր նշանակել բոլոր այն մարդկանց, որոնցից մի քանիսը, հնարավոր է, ընդհանրապես ոչ մի կապ չեն ունեցել ողբերգական միջադեպի հետ, դա կարելի է դիտարկել որպես նվեր Ադրբեջանին» ։

Խոսելով Լաչինի միջանցքի շրջափակման մասին՝ Տ. Քոչարյանն ասաց, որ անհասկանալի է, թե ինչ է կատարվում դրա շուրջ: Մի քանի օր է անցել այն բանից հետո, երբ Լավրովը հայտարարել է, որ պայմանավորվածություն է ձեռք բերվել ադրբեջանական կողմի հետ, և միջանցքն ապաշրջափակվելու է, բայց դա տեղի չի ունեցել։

«Տպավորություն է ստեղծվում, որ և Ադրբեջանին, և Հայաստանին ձեռնտու է Ռուսաստանի թույլ դիրքորոշումն այս հարցում։ Նրանք ձգտում են ցույց տալ և արտաքին աշխարհին, և իրենց ընտրազանգվածին, որ Ռուսաստանը չի կարողանում գլուխ հանել այդ տարածաշրջանի պատասխանատուի դերից, նա թուլացել է, նրան կարելի է չենթարկվել և նույնիսկ հակառակ գնալ նրա ցանկություններին ու խնդրանքներին։ Ես այնպիսի տպավորություն ունեմ, որ հակառուսական տրամադրությունների հարցում Հայաստանն ու Ադրբեջանը հիմա իրավիճակային դաշնակիցներ են»,- կարծում է մեդիափորձագետը։

Տ. Քոչարյանը նշեց, որ Հայաստանի իշխանությունները չեն պաշտպանում Արցախի, Արցախի պետականության շահերը և նրա անկախությունը: Նրա խոսքով՝ գլոբալ առումով, բացառությամբ Ռուբեն Վարդանյանի, Հայաստանի իշխանությունները հակասություն չունեն Լեռնային Ղարաբաղի ղեկավարության հետ։

Զրուցակցի կարծիքով, Հայաստանի ընդդիմությունը պատրաստ է կտրուկ քայլերի, որոնք այսօր անհրաժեշտ են, բայց լիակատար դեպրեսիայի մեջ հայտնված հայկական հասարակությունը պատրաստ չէ դրանց: «Հայկական ընդդիմության դերն այսօր պետք է լինի փորձել վերականգնել սեփական արժանապատվության զգացումը հայ ժողովրդի մեջ, որպեսզի վերջինս իրեն անօգուտ դերակատար չզգա։ Միայն հանրահավաքներով հիմա չես կարող բավարարվել, պետք է աշխատել հասարակության հետ, որպեսզի նա տեսնի ու գիտակցի, որ տեղի ունեցածի համար ոչ նախկինները, ոչ ռուսները մեղավոր չեն։ Մեղավոր են կոնկրետ մարդիկ, իսկ գլխավոր պատասխանատուն Նիկոլ Փաշինյանն է», – հայտարարել է մեդիափորձագետը։

Հեղինակ` Լանա Մշեցյան

Աղբյուր` Փաստինֆո