Փաստ ինֆո

ԱԺ-ն ստացել է Պաշտպանության նախկին նախարար, ԱԺ «Հայաստան» խմբակցության պատգամավոր Սեյրան Օհանյանի նկատմամբ քրեական հետապնդում հարուցելու համաձայնություն ստանալու վերաբերյալ ՀՀ գլխավոր դատախազի ներկայացրած միջնորդագրերը։ Այս մասին «Փաստինֆո»-ին հայտնեցին ԱԺ-ից։

Հիշեցնենք, որ ՀՀ գլխավոր դատախազ Աննա Վարդապետյանը երեք քրեական վարույթներով միջնորդագրեր է ներկայացրել ԱԺ՝ Սեյրան Օհանյանի նկատմամբ քրեական հետապնդում հարուցելու թույլտվություն ստանալու վերաբերյալ։

«Առաջին քրեական վարույթով ձեռք բերված փաստական տվյալների համաձայն՝ ՀՀ պաշտպանության նախկին նախարարը, օգտագործելով պաշտոնեական դիրքը կատարել է առանձնապես խոշոր չափերով վատնում (երկու դրվագ), ինչպես նաև՝ անձնական այլ շահագրգռվածությունից և խմբային շահերից ելնելով, իր պաշտոնեական դիրքն օգտագործել է ծառայության շահերին հակառակ, որն անզգուշությամբ առաջացրել է ծանր հետևանքներ (երկու դրվագ)։

Երկրորդ քրեական վարույթով ձեռք բերված փաստական տվյալների համաձայն՝ ՀՀ պաշտպանության նախկին նախարարը, հանդիսանալով պաշտոնատար անձ, խմբային շահերից ելնելով, պաշտոնեական դիրքն օգտագործել է ծառայության շահերին հակառակ, նաև չի կատարել ծառայողական պարտականությունները, որն անզգուշությամբ առաջացրել է ծանր հետևանքներ, ինչպես նաև՝ վատնելու եղանակով հափշտակել է առանձնապես խոշոր չափերի գույք:

Երրորդ քրեական վարույթով ձեռք բերված փաստական տվյալների համաձայն՝ ՀՀ պաշտպանության նախկին նախարարը վատնելու եղանակով հափշտակել է առանձնապես խոշոր չափերի գույք»,- հայտնում են դատախազությունից:
ԱԺ-ից մեզ հետ զրույցում հայտնել են, որ միջնորդագրերն արդեն ստացել են։ Հարցը նախ կներառվի ԱԺ խորհրդի նիստի օրակարգում, ապա՝ հերթական նիստի օրակարգում։

Աղբյուր` Փաստինֆո