Փաստ ինֆո

Տարոն Ղարիբյանը ընտանիքի 3-րդ երեխան էր, երկու եղբայրները ծառայել, վերադարձել են, ինքը փետրվարին պետք է զորացրվեր: Այս մասին «Փաստինֆո»-ի հետ զրույցում ասաց Ուրցաձոր համայնքի նախկին ղեկավար Ռաֆիկ Անդրեասյանը:

«Շատ համեստ, պատկառելի, օրինակելի երիտասարդ էր՝ իր համեստությամբ, իր կեցվածքով, ընտանիք սիրող, ծնողին հարգող երիտասարդ էր: Շատ խելացի, համեստ ընտանիք են, իրենց քրտինքով աշխատող, արարող մարդիկ են»,-նշեց Անդրեասյանը:

Նրա փոխանցմամբ՝  ընտանիքի հիմնական զբաղմունքը գյուղատնտեսությունն է: Տարոնն էլ դպրոցն ավարտելուց հետո որոշ ժամանակ օգնել է ծնողներին գյուղատնտեսական աշխատանքներում, ապա՝ զորակոչվել:

«Կատարվածը շատ ծանր ողբերգություն է: Ցավակցում եմ նաև մնացած զոհերի հարազատներին: Այս անիրավ իշխանությունների գալուց հետո Տարոնը մեր համայնքում արդեն 4-րդ զոհն է»,- ասաց Ուրցաձորի նախկին համայնքապետը:

Հիշեցնենք, որ հունվարի 19-ին՝ ժամը 01:30-ի սահմաններում, դեռևս չպարզված հանգամանքներում` Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել է 15 զինծառայող, 3 զինծառայողի վիճակը գնահատվում է ծանր:

Աղբյուր` Փաստինֆո