Փաստ ինֆո

Ի սկզբանե նախաքննության ընթացքում կալանավորվել եմ և այժմ հանրային մեղադրողը կրկին կալանավորման միջնորդություն է ներկայացնում միայն նրա համար, որ ես հանդիսանում եմ Էրիկ Ալեքսանյանը։ Դատարանում նման հայտարարությամբ է հանդես եկել ինքը՝ փաստաբան Էրիկ Ալեքսանյանը։

Ինչպես արդեն տեղեկացրել ենք՝ Հակակոռուպցիոն դատարանում՝ դատավոր Վահե Դոլմազյանի նախագահությամբ, ընթանում է դատավոր Արուսյակ Ալեքսանյանի, փաստաբան Էրիկ Ալեքսանյանի և դատավորի օգնական Թամարա Պետրոսյանի գործով դատական նիստը, որի ընթացքում քննարկվում է Էրիկ Ալեքսանյանի խափանման միջոցի հարցը։ Դատախազը միջնորդել է կրկին կալանավորել նրան՝ հայտարարելով, թե Ալեքսանյանի նկատմամբ ընտրված խափանման միջոց գրավը և բացակայելու արգելքն իրավաչափ չէ։

«Իմ նկատմամբ հարուցված քրեական հետապնդումը և ամենախիստ տեսակի խափանման միջոցի ի սկզբանե ընտրության և այժմ նման դիրքորոշման միակ նպատակը պայմանավորված է բացառապես իմ անձով։ Ես հասկանում եմ, մեծ հաշվով, թե ինչու եմ կալանավորվում, բայց միևնույն ժամանակ չեմ հասկանում, թե ինչու են նման միջնորդություն ներկայացնում»,- նշեց Ալեքսանյանը՝ հիշեցնելով, որ դատախազը նույնպես ընդունել է, որ մեղադրական եզրակացությունը հատատելով դատախազությունը դիրքորոշում է ունեցել, որ իր նկատմամբ ընտրված երկու ավելի նվազ տեսակի խափանման միջոցներն ի զորու են ապահովելու իր պատշաճ վարքագիծը։ Ինչ վերաբերում է դատախազի պնդմանը, թե առկա է դիրքորոշման փոփոխություն, Ալեքսանյանը նկատեց՝ այդ պարագայում պետք է լինեն ողջամիտ պատճառաբանություններ, որոնք կխոսեն գործում առկա փաստական տվյալներից, մինչդեռ, որևէ նոր հանգամանքներ դրված չեն։ Ալեքսանյանն ուշադրություն հրավիրեց այն հանգամանքին, որ իր կողմից խափանման միջոցի պայման չի խախտվել, դրսևորել է բացառապես օրինակելի և պատշաճ վարքագիծ։

Անդրադառնալով այն հանգամանքին, որ վարույթն իրականացնող մարմին է փոխվել, Ալեքսանյանը նշեց.

«Ավելի վատ։ Իմ ազատության իրավունքի սահմանափակման հարցը կարող է որոշվել դատավարական իրադրության, ոչ թե՝ փաստական իրադրության փոփոխմամբ։ Այսինքն, եթե ֆորմալ առումով վարույթն իրականացնող մարմին է փոխվել, դրանով իսկ կարող է որոշվել կանխորոշիչ և էական ձևով իմ ազատության սահմանափակման հարցը։ Սա ոչ այլ ինչ է, քան՝ իմ ազատության իրավունքի նկատմամբ ինքնանպատակ վերաբերմունք»։

Նրա խոսքերով՝ 2017թվականից աշխատում է որպես փաստաբան, իր ողջ մասնագիտական գործունեության ընթացքում ոչ մի ոչ իրավաչափ գործունեություն չի իրականացրել։

«Աստվածաշնչում գրված է, որ անձն այս աշխարհ գալիս է առանց ոչնչի, բայց՝ կոնկրետ առաքելությամբ։ Իմ առաքելությունն իրավապաշտպան գործունեությունն է, իմ առաքելությունը՝ բեկանված ճակատագրերը վերականգնելն է, որին բազմաթիվ անգամներ, աշխատելով որպես փաստաբան, կարողացել եմ հասնել։ Իմ համեստ փորձը թույլ է տալիս ասելու, որ ես ձեռագիր ունեցող փաստաբան եմ»,- նշեց Ալեքսանյանը՝հավելելով, որ ինքն այս պահին ներգրավված է որպես պաշտպան ավելի քան 50 քրեական գործերով։

Հիշեցնենք, որ հոկտեմբերի 17-ին ԱԱԾ ծառայողները ներխուժել են դատարանի շենք և ձերբակալել դատավոր Արուսյակ Ալեքսանյանին և փաստաբան Էրիկ Ալեքսանյանին։ ՀՀ գլխավոր դատախազը միջնորդություններ էր ներկայացրել ԲԴԽ՝ պահանջելով թույլատրել քրեական հետապնդում հարուցել և ազատությունից զրկել դատավոր Արուսյակ Ալեքսանյանին, որը ժամեր տևած քննության արդյունքում բավարարվել է։ Քրեական վարույթը վերաբերում է քրեական հեղինակությանն առնչվող գործին։

Մասնավորապես, դատարանը որոշել է գրավի դիմաց ազատ արձակել «Ֆազ» մականունով հայտնի քրեական հեղինակություն համարվող Սերգեյ Գրիգորյանին՝ բավարարելով վերջինիս պաշտպան Էրիկ Ալեքսանյանի ներկայացրած միջնորդությունը և այժմ դատավորին մեղադրում են ակնհայտ անարդար դատական ակտ կայացնելու և պաշտոնեական լիազորություններն անցնելու մեջ։ Նույն վարույթի շրջանակներում մեղադրանք է առաջադրվել նաև փաստաբան Էրիկ Ալեքսանյանին, որին ԱԱԾ-ն մեղադրում է դատավոր Ալեքսանյանին պաշտոնեական լիազորություններն անցնելու հարցում օժանդակելու մեջ։ Իսկ որպես «օժանդակություն», ըստ պաշտպանների, դիտարկվել է փաստաբան Էրիկ Ալեքսանյանի կողմից իր փաստաբանական լիազորություններից օգտվելն ու իր պաշտպանյալի նկատմամբ ընտրված խափանման միջոց կալանավորումը վերացնելու և այլընտրանքային խափանման միջոցը թույլատրելի ճանաչելու վերաբերյալ միջնորդություն ներկայացնելը։

Արուսյակ Ալեքսանյանը, դատավորի օգնական Թամարա Պետրոսյանը և Էրիկ Ալեքսանյանն իրենց ներկայացված մեղադրանքը չեն ընդունում։

Հեղինակ՝ Իզաբել Սահակյան

Աղբյուր` Փաստինֆո