Փաստ ինֆո

Կացարանում եղել է 21 մարդ, որից 15-ը զոհվել են, երեքը վիրավորվել են, նրանց թվում մեկ սպա։ Մյուսները գտնվել են դրսում։

Այս մասին լրագրողներին ասել է դասակի հրամանատարը՝ նշելով, որ արդեն զոհված 6-րդ զինվորի ծնողն է գալիս ու իր որդուն պահանջում։

«Քիչ առաջ զոհված զինծառայողներից մեկի հայրն էր այստեղ, ասաց՝ ո՞ւր ա տղես։ Անպատասխան հարց տվեց, չկարողացա պատասխանեմ, դա արդեն 6-րդ ծնողն էր»,- ասել է հրամանատարը՝ նշելով, որ բանակում բարդակ է տիրում։

«Բանակի թուլացումը, այսպես ասած, բառդակը գալիս ա բոլորից՝ Գլխավոր շտաբի պետ, նախարար, վարչապետ, սրանից հետո ինձ ինչ ուզում են թող ասեն կամ անեն, դա ինձ ընդհանրապես չի հետաքրքրում, որովհետև երբ չես կարողանում ծնողներին պատասխան տալ, դրանից վատ բան չկա»,- նշեց նա՝ ավելացնելով, որ այս բարդակի համար պատասխանատուն բոլորն են։

Լրագրողը հարցրեց ՝ արդյոք իրականությանը համապատասխանո՞ւմ է Կառավարության նիստում հնչած վարկածը, ըստ որի՝ փորձ է արվել հինգ լիտրանոց տարայով բենզինը լցնել վառարանի մեջ։

«Դա մենակ վարկած ա, չեմ կարող ասել։ Զոհերի թիվը շատ է, ավելի լավ է՝ կոնկրետ վարկածներով չխոսենք։ Ես ունեմ իմ սուբյեկտիվ վարկածները, որոնք չեմ կարող բարձրաձայնել»,- ասաց դասակի հրամանատարը։

Նշենք, որ ՀՀ վարչապետ Նիկոլ Փաշինյանն այսօր շրջանառության մեջ է դրել ավտոբենզինի միջոցով վառարանը միացնելու հետեւանքով հրդեհի բռնկման վարկածը։ Դասակի հրամանատարը նշել է, որ դա թյուրիմաց վարկած է ու պնդել, որ վառարանը միշտ միացված է եղել։ Այդ վարկածի դեպքում այն օգտագործվել է միայն վառարանը թեժացնելու համար,իսկ որպես վառելիք տրամադրվել էր ցախ ու ածուխ։ Նա պնդել է, որ հունվարի 18-ի երեկոյան բենզին չի եղել կացարանում, եթե լիներ, ինքը թույլ չէր տա։

Աղբյուր` Փաստինֆո