Փաստ ինֆո

Հայաստանի Հանրապետությունը փաստացիորեն գտնվում է պատերազմական վիճակում, և դա մեր կամքով կամ ցանկությամբ չէ, որ սկսվել է: Դա թշնամական գործողություններն են, որ չեն դադարում և ադրբեջանական կողմը, Թուրքիայի անմիջական աջակուցությամբ, ուղղորդմամբ, և հրահրմամբ, ըստ էության, ՀՀ-ի նկատմամբ սողացող քաղաքականություն է իրականացնում:

«Փաստինֆո»-ի եթերում ասել է իրանագետ, ԵՊՀ արևելագիտության ֆակուլտետի իրանագիտության ամբիոնի վարիչ, բ.գ.թ., պրոֆեսոր Վարդան Ոսկանյանը:

Իրանագետի խոսքերով, մենք որևէ պատրանք չպետք է ունենանք, որ թշնամին կանգնելու է, եթե մենք դրան չկանգնեցնենք: Թշնամին պետք է հասկանա, որ նրա յուրաքանչյուր ոտնձգություն արժանանալու է ասիմետրիկ պատասխանի: Այդ ասիմետրիկ պատասխանը պետք է լինի ավելի կոշտ, քան թշնամու գործողությունը, և միայն խնդիրների լուծումը թողնելը բանակի վրա՝ կոպտագույն սխալ է:

«Մեր հանրությունը պետք է հասկանա, որ մեր պետությունը գտնվում է պատերազմական իրավիճակում, և ամեն ինչ պետք է ուղղվի այդ փաստացի պատերազմի սպասարկմանը և այդ պատերազմում հաջողության հասնելուն, հակառակ դեպքում՝ Հայաստանի Հանրապետությունը, որպես այդպիսին, կդադարի գոյություն ունենալուց»,- հավելեց Վ. Ոսկանյանը:

Բանախոսը նշեց, որ Արցախի խնդիրը որևէ կարգավորում չունի: Այս խնդիրը կկարգավորվի այն ժամանակ, երբ կա՛մ Հայաստանը հասնի հաջողության, կա՛մ Ադրբեջանը: Ընդ որում, այդ երկընտրանքը դրել և բացահայտորեն առաջ է մղում նաև Բաքվի բռնապետը: ՀՀ-ն պետք է այնքան ուժեղ լինի, որպեսզի կարողանա ապահովել Արցախի Հանրապետության անվտանգությունը, և դա մեր պարտավորությունն է՝ օրենսդրորեն ամրագրված: Մենք պետք է սահմանենք մեր ազգի տեսլականը որպես պետական ազգ: ՀՀ-ի տեսլականը պետք է ենթադրի և իր մեջ ներառի հայկական պետականության ծրագիրը՝ անվտանգությունը որպես առանցք: Բոլոր գործողությունները պետք է միտված լինեն անվտանգային խնդիրների լուծմանը:

Իրանագետը վստահություն հայտնեց, որ մենք, ապահովելով մեր անվտանգային համակարգի հզորացումը, զուգահեռաբար պետք է աշխատենք թշնամական համակարգի խարխլման և քայքայման ուղղությամբ: Մենք պետք է պատրաստվենք թշնամուն ջախջախելուն: Այս տարածաշրջանում հաշվի են նստում միայն ուժեղի հետ: Կարևորը ծրագիրն է և այդ ծրագրի իրականացումը:

«Այո, Ադրբեջանը ունի բազմաթիվ խոցելի կետեր: Մենք պետք է աշխատենք իր համար վտանգները նկատելի դարձնել և ձևավորենք մի միջավայր, որտեղ Բաքվի բռնապետը խնդիրների հսկայական բույլ կունենա: Մենք նման ծրագիր մշակելու հնարավորություն ունենք: Դա կենտրոնի ու ինստիտուցիոնալ անելիք է, որը իր առջև պետք է նպատակ դնի Ադրբեջան կոչվող արհեստածին պետության չգոյությունը: Մենք չպետք է լուծենք Արցախի խնդիրը, մենք պետք է լուծենք Ադրբեջանի խնդիրը»,- եզրափակեց Վ. Ոսկանյանը:

Մանրամասները՝ տեսանյութում

Աղբյուր` Փաստինֆո