Փաստ ինֆո

Դատախազը պահանջում է կրկին կալանավորել Էրիկ Ալեքսանյանին՝ երեք ամիս ժամկետով։ «Փաստինֆո»-ի թղթակցի հաղորդմամբ՝ Հակակոռուպցիոն դատարանում՝ դատավոր Վահե Դոլմազյանի նախագահությամբ, Երևանի ընդհանուր իրավասության դատարանի դատավոր (լիազորությունները կասեցված են), փաստաբան Էրիկ Ալեքսանյանի և դատավորի օգնական Թամարա Պետրոսյանի գործով դատական նիստի ընթացքում այս պահին քննարկվում է փաստաբան Էրիկ Ալեքսանյանի խափանման միջոցի հարցը։ Հանրային մեղադրողը միջնորդեց Էրիկ Ալեքսանյանի նկատմամբ ընտրված խափանման միջոց գրավը և բացակայելու արգելքը փոխել կալանավորմամբ՝ նշելով, թե փաստաբանը կարող է խոչընդոտել գործի քննությանը, ինչպես նաև՝ դիմել փախուստի՝ նկատի ունենալով նաև այն հանգամանքը, որ փաստաբանը բազմիցս բացակայել է երկրից և Ուկրաինայի քաղաքացի է, ունի կապեր նաև Ուկրաինայում։ Ըստ դատախազի՝ ի սկզբանե դատախազությունը դիրքորոշում են ունեցել, որ Ալեքսանյանի նկատմամբ պետք է կիրառվի կալանավորումը։ Ըստ դատախազի՝ կիրառված խափանման միջոց գրավը և բացակայելու արգելքը իրավաչափ չեն, ի զորու չեն կանխելու ոչ իրավաչափ վարքագիծը, հետևաբար, մեղադրողը միջնորդեց փոփոխել և Էրիկ Ալեքսանյանի նկատմամբ որպես խափանման միջոց կիրառել կալանքը՝ երեք ամիս ժամկետով։ Մեղադրողը նաև նշեց, որ դատախազությունը դիտարկում է նաև Էրիկ Ալեքսանյանի հարցով Փաստաբանների պալատին դիմելու նպատակահարմարության հարցը, ինչը կապ չի ունենա սույն գործով ելքի հետ։

Նախագահող Վահե Դոլմազյանն արձանագրեց, որ դեկտեմբերի 16-ին դատարանը որոշել էր մերժել Ալեքսանյանի կալանավորման ժամկետը երկարացնելու միջնորդությունը, դեկտեմբերի 16-ից հետո վարույթն իրականացնող մարմնի կողմից այլընտրանքային խափանման միջոցներ են ընտրվել, գործը դատարան է ուղարկվել հունվարի 3-ին, մինչդատական վարույթի նկատմամբ հսկողություն իրականացնող գլխավոր դատախազի տեղակալ Արթուր Պողոսյանը հաստատել է մեղադրական եզրակացությունը՝ հիմնավոր համարելով նրանց նկատմամբ ընտրված խափանման միջոցները։

«Այս 16 օրվա ընթացքում ի՞նչ է փոխվել։ Այո, վարույթն իրականացնող մարմինը դատարանն է, բայց դուք որ միջնորդություն եք ներկայացնում, այս 18 օրվա ընթացքում ինչ է փոխվել, արդյոք Ձեր այսօրվա հնչեցրած գնահատականները համահունչ են մեղադրական եզրակացությունը հաստատած գլխավոր դատախազի տեղակալի գնահատականների հետ»,- ասաց Դոլմազյանը՝ հարց ուղղելով դատախազին, ինչին ի պատասխան վերջինս նշեց, որ յուրաքանչյուր նիստերից առաջ քննարկում է ունենում մյուս հանրային մեղադրողների հետ, ունեն միասնական դիրքորոշում, իսկ Էրիկ Ալեքսանյանի խափանման միջոցի հարցի վերաբերյալ դիրքորոշումն անփոփոխ է եղել ինչպես մինչդատական վարությում, այդպես էլ՝ հիմա, ինչի մասին վկայում է նաև խափանման միջոցի փոփոխման վերաբերյալ որոշման դեմ բողոքները։

Հիշեցնենք, որ հոկտեմբերի 17-ին ԱԱԾ ծառայողները ներխուժել են դատարանի շենք և ձերբակալել դատավոր Արուսյակ Ալեքսանյանին և փաստաբան Էրիկ Ալեքսանյանին։ ՀՀ գլխավոր դատախազը միջնորդություններ էր ներկայացրել ԲԴԽ՝ պահանջելով թույլատրել քրեական հետապնդում հարուցել և ազատությունից զրկել դատավոր Արուսյակ Ալեքսանյանին, որը ժամեր տևած քննության արդյունքում բավարարվել է։ Քրեական վարույթը վերաբերում է քրեական հեղինակությանն առնչվող գործին։
Մասնավորապես, դատարանը որոշել է գրավի դիմաց ազատ արձակել «Ֆազ» մականունով հայտնի քրեական հեղինակություն համարվող Սերգեյ Գրիգորյանին՝ բավարարելով վերջինիս պաշտպան Էրիկ Ալեքսանյանի ներկայացրած միջնորդությունը և այժմ դատավորին մեղադրում են ակնհայտ անարդար դատական ակտ կայացնելու և պաշտոնեական լիազորություններն անցնելու մեջ։ Նույն վարույթի շրջանակներում մեղադրանք է առաջադրվել նաև փաստաբան Էրիկ Ալեքսանյանին, որին ԱԱԾ-ն մեղադրում է դատավոր Ալեքսանյանին պաշտոնեական լիազորություններն անցնելու հարցում օժանդակելու մեջ։ Իսկ որպես «օժանդակություն», ըստ պաշտպանների, դիտարկվել է փաստաբան Էրիկ Ալեքսանյանի կողմից իր փաստաբանական լիազորություններից օգտվելն ու իր պաշտպանյալի նկատմամբ ընտրված խափանման միջոց կալանավորումը վերացնելու և այլընտրանքային խափանման միջոցը թույլատրելի ճանաչելու վերաբերյալ միջնորդություն ներկայացնելը։

Արուսյակ Ալեքսանյանը, դատավորի օգնական Թամարա Պետրոսյանը և Էրիկ Ալեքսանյանն իրենց ներկայացված մեղադրանքը չեն ընդունում։

Հեղինակ՝ Իզաբել Սահակյան

Աղբյուր` Փաստինֆո