Փաստ ինֆո

Արցախի ժողովուրդն իր իսկ պատմական տարածքում ապրելու իրավունք ունի, անվտանգ և կայուն զարգացման իրավունք ունի։ ՀՀ իշխանություններն այսօր վախենում են ասել, որ տարիներ առաջ Խորհրդային Միության փլուզմանը զուգընթաց՝ ԽՄ օրենքների համաձայն Արցախն ինքնորոշվել է այնպես, ինչպես Հայաստանը, ինչպես Ադրբեջանը։ Այս մասին խորհրդարանական ճեպազրույցների ընթացքում ասաց «Հայաստան» խմբակցության պատգամավոր Սեյրան Օհանյանը։

«Այս իրավիճակում Արցախի հարցի որոշման ուղին միանշանակ ինքնորոշումն է, անկախ Արցախի Հանրապետություն ունենալն է, որովհետև եթե հարևաններն ուզում են խաղաղ պայմաններում ապրել, ապա նրանք պետք է պատրաստակամ լինեն՝ խաղաղ համակեցությամբ հարևանություն անելու, իսկ Ադրբեջանի ղեկավարությունը, թուրք-ադրբեջանական տանդեմի գործողությունները չեն խոսում դրա մասին։ Նրանց հռետորաբանությունը, գործնական քայլերը, սադրանքները, մարտական գործողություններն, այս նույն շրջափակումը նշանակում է, որ խաղաղության օրակարգը կեղծ է, իսկ ՀՀ իշխանությունները կուրորեն գնում և մտնում են այդ օրակարգի մեջ՝ վախենալով ասել, որ Արցախն ինքնորոշվել է տարիներ առաջ և այս պայմաններում Ադրբեջանի կազմում ապրելու որէ հնարաբորություն չունի և չպետք է լինի Ադրբեջանի կազմում»,- ընդգծեց Օհանյանը։

Լաչինի միջանցքի արգելափակման ցավալի երևույթը Օհանյանի դիտարկմամբ 2020թ նոյեմբերի 9-ի եռակողմ հայտարարության պահանջների խախտում է, այդ խախտումն ակնհայտ է և երևում էր։ «Ադրբեջանը շարունակելու է ճնշումները, պարտադրական գործողությունները և՛ Հայաստանի, և՛ Արցախի ժողովրդի շուրջ՝ ակնհայտ նպատակ ունենալով Արցախը հայաթափելու, բայց այս պայմաններում Ադրբեջանի ղեկավարությունը նաև համապատասխան ազդեցություն է փորձում ունենալ ՀՀ ղեկավարության վրա, ինչպես գիտենք՝ բացի Արցախից նաև Սյունիքում համապատասխան միջանցքի տրամաբանությամբ գործողություններ ծավալելու շրջանակներում։ ՀՀ այսօրվա ղեկավարությունը ասում է, որ դրա պատասխանատուները Ռուսաստանն ու Ադրբեջանն են, բայց չհիշեցնելով ժողովրդին, որ այդ հայտարարության տակ ստորագրել է նաև ՀՀ ղեկավարությունը։ Ակնհայտ է, որ եթե ստորագրել ես այդ հայտարարության տակ, ուրեմն որոշակի պատասխանատվություն նաև դու պետք է զգաս։ Ի վերջո, հայ ժողովրդի նորագույն պատմության ընթացքում Արցախը, Արցախյան շարժումը, Արցախյան ազատագրական գործողությունները նաև հիմք են հանդիսացել ՀՀ անկախ գործունեության, ՀՀ և Արցախի համատեղ զարգացման»,- նշեց Օհանյանը։

Նրա խոսքով՝ այսօր Արցախը հայտնվել է մի այնպիսի իրավիճակում, որ այդ «անկլավային» իրավիճակը միանշանակ թույլ է տալիս, որ Արցախի ղեկավարությունը որոշակի չափով տեղային պայմաններում հարաբերություններ ունենան Ադրբեջանի տեղական ղեկավարների հետ։ Թե ինչ են հանդիպել, ինչ են պայմանավորվել՝ տեղեկություններ չունեմ։

Օհանյանի գնահատմամբ՝ միջազգային հանրությունը, այդ թվում՝ ՌԴ-ն, Մինսկի խմբի համանախագահ բոլոր երկրները պետք է ջանքեր գործադրեն՝ ազդելու Ադրբեջանի իշխանությունների վրա՝ ճանապարհը բացելու և հումանիտար այդ շատ ցավալի իրավիճակը հանգուցալուծելու համար։

Աղբյուր` Փաստինֆո