Փաստ ինֆո

ՊՆ N զորամասի ինժեներասակրավորային վաշտի կացարանում տեղի ունեցածը ներկա իշխանություն կոչվածի իրական դեմքն է։ Այդ զորամասի վիճակը բնութագրում է այս իշխանությունների օրոք մեր պետության և ժողովրդի ողբերգական վիճակը։

Այսպես է լինում, երբ պետություն կառավարելուց, պաշտպանությունից և անվտանգությունից հեռու ողորմելիներն են գալիս իշխանության։ Միայն սեփական գրպանի և հաճույքների մասին մտածող աբիժնիկ չտեսների մի ոհմակ երկիրը կործանման է տանում ու անպետություն ապրելու կենցաղային մտածողությամբ ամբոխը գոռում է կատաղի՝ «միայն նախկինները չգան»։

Հիմա գոնե սույն տկարամիտները փորձ կանե՞ն համեմատելու նախկինների ժամանակվա արցախյան զորամասերը և ՀՀ ՊՆ N զորամասը․․․ «Մեր որդիները պիտի ոչ թե Արցախում, այլ՝ Հայաստանում ծառայեն» ասողները տեսնես տեսե՞լ են, հավանե՞լ են ՀՀ ՊՆ զորամասերը, ուր երկու տարի ծառայում, քնում-արթնանում են մեր զինվորները։ Այ, դրանցից մեկը իրենց աչքի առաջ է։

Պաշտպանության նախարարությունն իրեն հատկացված բյուջեն թերակատարում է, սակայն ՀՀ ՊՆ զորամասերը չեն կահավորվում։ Հարց է ծագում՝ ինչու՞։ Երբ Արցախից մինչև վերջին զինվորը Հայաստան եք բերում, բերում ու «տեղավորում եք» վրանների տակ, ինչ-որ մասնավոր տներում, գոմանման կառույցներում, դրանով ի՞նչ եք ուզում ասել։ ՈՒզում եք ասել ու հասկացնել, որ բանակը երկրորդա՞կան է։ Այդ երբվանի՞ց Հայաստանի իշխանությունը սկսեց առաջնորդվել՝ ոստիկանությանը ամեն ինչ, բանակին՝ ելակ՝ տրամաբանությամբ։ Երևի այն ժամանակվանից, երբ որոշվեց՝ այնպիսի ոստիկանություն բտել, որ գազանաբար կռիվ տա փաշինյանական իշխանության համար։ Քանի որ՝ դրսում կատու, ներսում՝ զինված ոստիկանությամբ առյուծ կտրած են այսօրվա մակաբույծները։

Պատերազմից հետո քանի՞ զորամաս է կահավորվել՝ հարցնում ես, ասում են՝ պետական գաղտնիք է։ Ինչ պետք է անում ենք՝ ասում են։ Հակահետախուզության մասին դեռ չստեղծած՝ ի լուր աշխարհի հայտարարելը գաղտնիք չէ, իսկ սեփական երկրի զորամասերը կահավորելը գաղտնի՞ք է։ Բա ի՞նչի վրա եք օգտագործում պաշտպանության ոլորտի բյուջեն։ Պաշտպանության նախարարությունում տոնածառ դնելու՞, մայկա-տռուսիկի՞, ելակի՞․․․

Գաղտնիք է, քանի որ սարսափու՞մ եք ազարբայջանից, Թե՞ խոսք եք տվել։ Հայաստանի բոլոր ռազմավարական բարձունքները, Սև լիճը թշնամուն նվեր մատուցելուց հետո հիմա էլ պատրաստվում եք ա՞յլ հանձնողական ծրագրեր իրականացնե՞լ։

Բանակում «բարդակ» է՝ ասում է խնդրո առարկա դասակի՝ պաշտոնանկ արված հրամանատարը։ Այսինքն, անունը կա, ամանում՝ չկա՝ իմիտացիոն վիճակ է։ Ի դեպ, որևէ մեկը պատկերացնու՞մ է գիշերվա մեկանց կեսին համատարած քնած զինվորներ։ Դա հնարավոր բան չէ։ Այդ ժամին ամեն զինվոր իր մտքերի մեջ է՝ արթուն, ընկերոջ հետ՝ զրուցելիս, չմանրամասնեմ․․․Այնպես որ, հոգնած-քնած զինվորների վարկածն էլ հանեք մեջտեղից։ Իսկ ընդհանրապես, ցավով եմ ասում, բայց այսօր պարապությունն է իշխում բանակում։ Ավելին ուղղակի չեմ ուզում ասել։

Իսկ ՀՀ վարչապետի աթոռից կառչածի վարկածը անհեթեթագույն է, ի՞նչ ասել է՝ ավտոբենզինի միջոցով վառարանը միացնելու հետեւանքով հրդեհ է բռնկվել։ Արդեն իսկ դասակի հրամանատարը թյուրիմաց վարկած է որակել վերջինս ու պնդել, որ վառարանը միշտ միացված է եղել։

Ապա՝ ավելացրել է, որ այդ վարկածի դեպքում այն օգտագործվել է միայն վառարանը թեժացնելու համար, իսկ որպես վառելիք տրամադրվել է ցախ ու ածուխ։ Նա պնդել է, որ հունվարի 18-ի երեկոյան բենզին չի եղել կացարանում, եթե լիներ, ինքը թույլ չէր տա։

Հարցը, որ շարունակ մնում է առկախ, նորից ենք տալիս՝ ի՞նչն էր պատճառը, որ 44- օրյա պատերազմից հետո Հայաստանի տարածքում նոր զորանոցներ կառուցելու ծրագիրը կասեցվեց, իսկ եղածները՝ նորմալ չկահավորվեցին։ Մինչդեռ, եթե անգամ պետությունը զլանում էր, այդ հարցի լուծման համար շատերն էին պատրաստ․․․

Երբ իշխանությունն առաջնորդվում է ոստիկանությանը ամեն ինչ, բանակին՝ ելակ՝ տրամաբանությամբ, պատկերն այս է լինում․․․

Մեր բոլորի ամոթն է այս իշխանությունը, օր առաջ սրանք պիտի հեռանան։ Հրաժարական տան։

Աղբյուր` Փաստինֆո