Փաստ ինֆո

Բերձորի միջանցքում անցակետի տեղադրման վերաբերյալ զրույցներն ադրբեջանական ցանկությունների և նպատակների դաշտում են: Որևէ իրական և շոշափելի բանակցություն կամ քննարկում այդ թեմայի վերաբերյալ չկա: Այս մասին «Փաստինֆո»-ի հետ զրույցում ասաց Արցախի մարդու իրավունքների պաշտպան Գեղամ Ստեփանյանը:

Արցախի ՄԻՊ-ը հղում է անում երեկ՝ հունվարի 17-ին, տեղի ունեցած Լավրով-Բայրամով հեռախոսզրույցին և ռուսական ԱԳՆ-ի տարածած հայտարարությանը, որում ռուսական կողմն ընդգծել է միջանցքով անխափան, ամբողջական երթևեկության վերականգման անհրաժեշտությունը՝ 2020 թվականի նոյեմբերի 9-ի հայտարարության կետերի պահպանմամբ:

«Այդ կետերի պահպանումը նշանակում է, որ որևէ ձևով միջանցքում ադրբեջանական ներկայություն չպետք է լինի: Գորիս-Ստեփանակերտ ճանապարհին երեխաներին տեղափոխող ավտոբուսն ադրբեջանցիների կողմից կանգնեցնելու սադրանքը ևս մեկ անգամ ապացուցում է, որ ադրբեջանական ներկայությունը Ստեփանակերտ-Գորիս ճանապարհի վրա ուղղակի վտանգավոր է դարձնում այդ տարածքով երթևեկելը»,- նշեց Ստեփանյանը:

Նրա խոսքով՝ եթե ռուս խաղաղապահների ուղեկցությամբ երթևեկելիս են նման դեպքեր գրանցվում, ապա դժվար չէ պատկերացնել, թե ինչպիսի դեպքեր կարող են արձանագրվել երրորդ կողմի բացակայությամբ:

«Պետք է միանշանակ բացառել ադրբեջանցիների ցանկացած ներկայություն այդ ճանապարհի վրա և որևէ վերահսկողություն նրանց կողմից թե՛ բեռնատար, թե՛ մարդատար մեքենաների նկատմամբ, դա ուղղակի շատ մեծ սպառնալիք է Արցախի ժողովրդի և միջանցքով երթևեկող յուրաքանչյուր հայի համար»,- ընդգծեց Արցախի մարդու իրավունքների պաշտպանը:
Նշենք, որ վերջին օրերին մամուլում լուրեր են շրջանառվում, որ Բերձորի միջանցքը բացելու ադրբեջանական պահանջներից մեկն էլ այդ հատվածում անցակետ տեղադրելն է:

Հիշեցնենք, որ երեկ զինված և դիմակավորված ադրբեջանցիները կանգնեցրել էին երեխաներին Գորիսից Ստեփանակերտ տեղափոխող ավտոմեքենան և տեսախցիկներով ներխուժել մեքենայի մեջ: Ադրբեջանական սադրանքի հետևանքով մեքենայում գտնվող աղջիկ երեխաներից մեկն ուշագնաց էր եղել: Երեխային համապատասխան օգնություն էր ցուցաբերվել և ռուս խաղաղապահների միջնորդությամբ միջադեպը հարթվել էր և մեքենան շարունակել ընթացքը:

Աղբյուր` Փաստինֆո