Փաստ ինֆո

ԱԺ կառավարության կողմից բերվում են 1000 ու մի՝ ոչ էական օրենքների նախագծեր, որոնք մեր երկրում էական բան չեն փոխում, իսկ դիրքորոշման առումով հստակ մի բան գիտենք՝ այս կառավարությունն անելիք չունի մեր երկրում: Այս մասին այսօր ԱԺ նիստում հայտարարեց «Հայաստան» խմբակցության պատգամավոր Գեղամ Մանուկյանը՝ արձագանքելով ԱԺ նախագահ Ալեն Սիմոնյանի այն հայտարարությանը, որ տպավորություն է, թե ընդդիմադիր «Հայաստան» դաշինքում բոլոր օրենքների վերբերյալ որդեգրել են «դեմ» կամ «ձեռնպահ» դիրքորոշում:

«Մենք հստակ ցուցանել ենք, որ այս նախագիծը, այս կառուցվածքային փոփոխությունը վտանգավոր է, դրա մասին շատ հստակ ասել ենք, հետո ժամանակը գալու է և դուք մեր այդ դիրքորոշումներին հակառակ՝ կողմ քվեարկելու համար,  զղջալու եք»,- ասաց Մանուկյանը:

Ի լրումն Մանուկյանի՝ «Պատիվ ունեմ» խմբակցության ղեկավար Հայկ Մամիջանյանը նշեց, որ ԱԺ ընդդիմադիր՝ «Պատիվ ունեմ» և «Հայաստան» խմբակցությունները հստակ դիրքորոշում են հայտնել շատ կարևոր մի հարցում, որի վերաբերյալ իշխող խմբակցությունից որևէ մեկը չի համարձակվել կարծիք հայտնել: Խոսքն այն մասին է, որ Արցախը երբեք չպետք է լինի Ադրբեջանի կազմում:

«Երբ այդ հարցի շուրջ ձեր դիրքորոշումը կասեք, մենք ձեր սնդիկ-փարթիների մասին դիրքորոշումը կգրենք, և երկրորդ՝ ես շատ ներողություն եմ խնդրում Արցախի մեր այն քաղաքացիներից, որոնք ընդհատվող ինտերնետի ու շրջափակման պայմաններում, ստիպված են նայել այս նապաստակ նկարոցին»,- արձագանքեց Մամիջանյանը:

«Պատիվ ունեմ» խմբակցության ղեկավարը անդրադարձավ նաև ընտրակեղծիքների վերաբերյալ Ալեն Սիմոնյանի դիտարկմանը և ի պատասխան նշեց, որ իշխող խմբակցությունում սեփական վարչության ընտրության ընտրակեղծարարներին պարզեն հետո մնացածին անցեն:

ԱԺ խոսնակ Ալեն Սիմոնյանն էլ անպատասխան չթողեց ընդդիմադիրների հայտարարություններն ու  ասաց, որ քվեարկվող օրենքները ոչ բոլորն էին միայն կառավարության կողմից բերված օրենքներ և հիշեցրեց, որ կառավարությունը, որի մասին ընդդիմադիրներն իրենց կարծիքն են ասում, «ՀՀ ժողովրդի կողմից ընտրված կառավարությունն է»:

«Ես չեմ հասկանում՝ ինչ կապ ունեն նապաստակ փարթին ու Ձեր նման լուրջ քաղաքական գործիչը», ասաց ԱԺ նախագահը՝ դիմելով Մամիջանյանին:

Աղբյուր` Փաստինֆո