Փաստ ինֆո

ՀՀ ԱԺ պատգամավորները արցախցի գործընկերների հետ կարող էին հանդիպել հոկտեմբերին, նոյեմբերին, կամ մինչև դեկտեմբերի 12-ը։ Երբ ճանապարհը բաց էր, քանի՞ անգամ են հանդիպել։ Այս մասին «Փաստինֆո»-ի հետ զրույցում ասաց «Մարդկային զարգացման միջազգային կենտրոն» ՀԿ նախագահ Թևան Պողոսյանը՝ նշելով, որ անհրաժեշտության դեպքում հնարավոր է այդ հանդիպում-քննարկումը նաև առցանց նախաձեռնել, մանավանդ որ 2020 թվականից հետո՝ կորոնավիրուսի համաճարակով պայմանավորված, միջազգային հարթակներում առցանց քննարկումները բավականին «մոդայիկ» են դարձել։

«Հաշվի առնելով, որ Արցախը շրջափակված է շատ ավելի լավ կլինի այդ քննարկումը հիմա կազմակերպել։ Պատկերացրեք, եթե նաև միջազգային լրատվականներին հրավիրեն և ստեղծված իրավիճակն առցանց քննարկեն։ Դրանից ավելի լավ էլ ինչպես կարելի է նպաստել, որ միջազգային հանրությունում ձևավորվի իրական պատկերը և նաև ԱԺ-ն իր բաժին ներդրումը կունենա»,- ասաց նա։

Նրա խոսքով՝ եթե առաջնորդվում ենք ՀՀ ԱԺ կանոնակարգ օրենքով, ապա այնտեղ հստակ նշված է, որ միջխորհրդարանական հանձնաժողովները պետք է տարեկան 2 անգամ հանդիպեն՝ մեկ անգամ Ստեփանակերտում, մեկ անգամ Երևանում, հիմա ինչումն է խնդիրը, որ այդ հանդիպումը չեն նախաձեռնում։

«Իսկ Ալեն Սիմոնյանը ցանկություն չունի՞ իր նախաձեռնությամբ այդ քննարկումը կազմակերպել և դիմելով արցախցի իր գործընկերներին, միջազգային լրատվամիջոցների ներկայությամբ, և ասի՝ հարգելի ԱԺ պատգամավորներ, դե հիմա ներկայացրեք իրական պատկերը՝ ինչ է կատարվում Արցախում։ Արցախի նախագահը չէր, որ ասել էր՝ Արցախը պատրաստ է զրկանքներ կրել ՝ հանուն նրա, որ Մայր Հայաստանը լավ լինի, իսկ Մայր Հայաստանն ի՞նչ է անում, որ Արցախի համար մի քիչ լավ լինի, ինչ-որ բան պատրաստվում է անել»,- նշեց Պողոսյանը։

Հիշեցնենք, որ ԱԺ նախագահ Ալեն Սիմոնյանն այսօր ԱԺ-ում պատասխանելով «Հայաստան» խմբակցության պատգամավոր Արծվիկի Մինասյանի հարցին՝ նշել էր, որ արցախցի պատգամավորների հետ այս պահին հանդիպում-քննարկումներ նախատեսված չեն։

Աղբյուր` Փաստինֆո