Փաստ ինֆո

Այսօր մենք կարծում ենք այլ ճանապարհներ տեղին չէ կիրառել, քանի դեռ հնարավոր խաղաղության և երկխոսության ճանապարհն ամբողջովին սպառված չէ, քանի դեռ ամեն ինչ չենք փորձել։ Այս մասին այսօր՝ հունվարի 13-ին, Երեւանում ՀՀ ԱԺ նախագահ Ալեն Սիմոնյանի հետ ասուլիսի ընթացքում ասաց Ֆրանսիայի ԱԺ նախագահ Յաել Բրաուն-Պիվեն՝ պատասխանելով հարցին, թե ինչու պաշտոնական Փարիզը քաղաքական հայտարարություններից զատ պատժամիջոցներ չի կիրառում ագրեսոր Ալիևի նկատմամբ, որի գործողությունների հետևանքով զոհվում են խաղաղ բնակիչներ, գրավվում են Հայաստանի ինքնիշխան տարածքները, իսկ արդեն մեկ ամիս է ՝ փակ է արցախցիների համար ճանապարհը։

«Այսօր մենք կարծում ենք, որ ամենից շատ կարևոր է խաղաղ կարգավորումը և երկխոսության վերականգնումը և մեր, հանրապետության նախագահի բոլոր ջանքերն ուղղված են դրան։ Մեր էներգիան 100 տոկոսով դեպի այդ կարգավորմանն է ուղղված»,- նշեց Ֆրանսիայի ԱԺ նախագահը։

Յաել Բրաուն-Պիվենի խոսքով՝ Ֆրանսիան այս հակամարտությունում միջնորդի դեր է խաղում և ծայրահեղ ակտիվ է։ ՄԻնչ այս 2 անգամ դիմել է ՄԱԿ-ի անվտանգության խորհրդին՝ հարցը քննարկելու, Պրահայում հանդիպման նախաձեռնող է եղել, մի շարք նախաձեռնություններ է իրականացնում, որ ԵՄ-ն ևս մեծապես դեր խաղա այս հակամարտությունում։

«Ֆրանսիան ակտիվ է, չի սահմանափակվում միայն հայտարարություններով, և կարծում եմ, որ սա ճիշտ ճանապարհն է, ամեն դեպքում այն ճանապարհն է, որ մենք ենք ընտրել, միջնորդության դերը, հնարավորինս ակտիվ միջնորդության, բնականաբար, ու նաև աջակցության ամենաաներկբա աջակցության ճանապարհը, որն այսօր ևս արտահայտվում է իմ ներկայությամբ Հայաստանում»։

Յաել Բրաուն-Պիվեն հրաժարվեց մեկնաբանել այն հարցը, թե Ադրբեջանի կողմից Հայաստանի նկտամամբ ռազմական էսկալացիայի դեպքում արդյո՞ք Ֆրանսիան միջնորդից կվերածվի աջակցող կողմի՝ նշելով, որ Ֆրանսիայում և ամենուր երբեք չի պատասխանում այնպիսի հարցերի, որոնք «ենթադրական հարցեր են ապագայի վերաբերյալ», այսօր արդեն իսկ առկա փաստերի հետ կապված բավականաչափ անելիքներ կան և անիմաստ է հիպոթետիկ իրավիճակներ պատկերացնել։

Աղբյուր` Փաստինֆո