Փաստ ինֆո

Հակակոռուպցիոն դատարանում՝ դատավոր Վահե Դոլմազյանի նախագահությամբ, այսօր կայացել է Երևանի ընդհանուր իրավասության դատարանի դատավոր (լիազորությունները կասեցված են) Արուսյակ Ալեքսանյանի, փաստաբան Էրիկ Ալեքսանյանի և Արուսյակ Ալեքսանյանի օգնական Թամարա Պետրոսյանի գործով դատական նիստը։

«Փաստինֆո»-ի հաղորդմամբ՝ նիստի ընթացքում Արուսյակ Ալեքսանյանի պաշտպանները դատախազին բացարկ հայտնելու միջնորդություն են ներկայացրել՝ արձանագրելով, որ դատախազը ներկայացված միջնորդություններն անհիմն մերժել է։ Սակայն դատարանը եւս մերժեց բացարկ հայտնելու միջնորդությունը։ Հաջորդիվ՝ ներկայացվել է միջնորդություն՝ Արուսյակ Ալեքսանյանի նկատմամբ քրեական հետապնդումը դադարեցնելու և վարույթը կարճելու մասին։ Պաշտպան Հովսեփ Սարգսյանը «Փաստինֆո»-ի հետ զրույցում հայտնեց, որ մինչդատական վարույթի ընթացքում քննչական ենթակայության կանոնների խախտմամբ է եղել գործի քննությունը։

Մասնավորապես, վարույթն իրականացվել է ոչ լիազորված սուբյեկտի՝ ԱԱԾ քննչական դեպարտամենտի կողմից, մինչդեռ, դատավորի վերաբերյալ գործի քննությունը օրենքով սահմանված կարգով իրավունք ունեն իրականացնելու միայն Հակակոռուպցիոն կոմիտեի քննիչները, իսկ ենթակայություն փոխելու իրավասություն ունի միայն գլխավոր դատախազը, որի որոշումը, ըստ Հովսեփ Սարգսյանի, իրավաչափ չէ, քանի որ դատավարական օրենքի էական խախտմամբ է կայացված, հետևաբար, միջնորդել են դադարեցնել քրեական հետապնդումը։ Նշենք, որ Արուսյակ Ալեքսանյանը մինչև դատավոր նշանակվելը ՀՔԾ քննիչ էր, հենց այդ հանգամանքով պայմանավորված է, անաչառությունն ապահովելու համար, գլխավոր դատախազը որոշել փոխել քննչական ենթակայությունը՝ գործի քննությունը հանձնարարելով ԱԱԾ քննչական դեպարտամենտին, սակայն Հովսեփ Սարգսյանի դիտարկմամբ՝ դա չի կարող հիմք լինել, քանի որ Հատուկ քննչական ծառայություն այլևս գոյություն չունի։

Պաշտպանության կողմի դիտարկմամբ՝ քրեական հետապնդումն իրականացվել է ոչ լիազորված սուբյեկտի կողմից, հետևաբար, դրա արդյունքում ձեռք բերված ապացույցները և փաստական տվյալները որպես «թունավոր ծառի պտուղներ» անթույլատրելի են, հետևաբար՝ հետապնդումը ենթակա է դադարեցման, վարույթը՝ կարճման։

Նախաքննության ընթացքում դատավոր Ալեքսանյանի նկատմամբ ՕՀՄ-ներ են իրականացվել, Սարգսյանի դիտարկմամբ՝ անձեռնմխելիության էական կոպիտ խախտումով. «Քրեական հետապնդում է սկսվել, որովհետև կոնկրետ անվանական հենց Արուսյակ Ալեքսանյանի նկատմամբ է իրականացվել՝ առանց ԲԴԽ համաձայնությունը ստանալու»։ Վերոգրյալ հիմքը, սակայն, չի դրվել կարճման միջնորդության հիմքում, այս պահին բարձրացվել է միայն քննչական ենթակայության հարցը։

Միջնորդության քննությունը կշարունակվի հունվարի 16-ին։ Նշենք, որ Արուսյակ Ալեքսանյանի կալանավորման ժամկետը լրանում է հունվարի 19-ին, նրա խափանման միջոցի հարցը դեռևս չի քննարկվել դատարանում։

Հիշեցնենք, որ հոկտեմբերի 17-ին ԱԱԾ ծառայողները ներխուժել են դատարանի շենք և ձերբակալել դատավոր Արուսյակ Ալեքսանյանին և փաստաբան Էրիկ Ալեքսանյանին։ ՀՀ գլխավոր դատախազը միջնորդություններ էր ներկայացրել ԲԴԽ՝ պահանջելով թույլատրել քրեական հետապնդում հարուցել և ազատությունից զրկել դատավոր Արուսյակ Ալեքսանյանին, որը ժամեր տևած քննության արդյունքում բավարարվել է։ Քրեական վարույթը վերաբերում է քրեական հեղինակությանն առնչվող գործին։

Մասնավորապես, դատարանը որոշել է գրավի դիմաց ազատ արձակել «Ֆազ» մականունով հայտնի քրեական հեղինակություն համարվող Սերգեյ Գրիգորյանին՝ բավարարելով վերջինիս պաշտպան Էրիկ Ալեքսանյանի ներկայացրած միջնորդությունը և այժմ դատավորին մեղադրում են ակնհայտ անարդար դատական ակտ կայացնելու և պաշտոնեական լիազորություններն անցնելու մեջ։ Նույն վարույթի շրջանակներում մեղադրանք է առաջադրվել նաև փաստաբան Էրիկ Ալեքսանյանին, որին ԱԱԾ-ն մեղադրում է դատավոր Ալեքսանյանին պաշտոնեական լիազորություններն անցնելու հարցում օժանդակելու մեջ։ Իսկ որպես «օժանդակություն», ըստ պաշտպանների, դիտարկվել է փաստաբան Էրիկ Ալեքսանյանի կողմից իր փաստաբանական լիազորություններից օգտվելն ու իր իր պաշտպանյալի նկատմամբ ընտրված խափանման միջոց կալանավորումը վերացնելու և այլընտրանքային խափանման միջոցը թույլատրելի ճանաչելու վերաբերյալ միջնորդություն ներկայացնելը։

Արուսյակ Ալեքսանյանը, դատավորի օգնական Թամարա Պետրոսյանը և Էրիկ Ալեքսանյանն իրենց ներկայացված մեղադրանքը չեն ընդունում։

Հեղինակ՝ Իզաբել Սահակյան

Աղբյուր` Փաստինֆո