Փաստ ինֆո

Շրջափակման հետևանքով առաջացած խնդիրներն Արցախի Մարտակերտի շրջանի Հաթերք գյուղում բազմավեկտոր են՝ առողջապահական, տնտեսական, սոցիալական։ Այն պահից ի վեր, ինչ Ադրբեջանն ապօրինաբար փակել է Լաչինի միջանցքը՝ Արցախը Հայաստանին ու արտաքին աշխարհին կապող միակ ճանապարհը, գյուղում երկու հոգի ինֆարկտ են տարել. Նրանցից մեկի մեկի առողջական վիճակը, ինչպես «Փաստինֆո»-ի հետ զրույցում ասաց Հաթերքի համայնքապետ Վարդան Գրիգորյանը, վատ է։

Հաթերքից չեն կարողանում Երեւան տեղափոխել սրտի կաթված ստացած բնակիչներին, դեղատներն ու խանութները դատարկ են, բայց պնդում են՝ գյուղացին ուտելու բան կգտնի, միայն թե ճանապարհը բացվի՝ առանց զիջումների։

Հարազատներն ուզում էին Երևան տեղափոխել, քանի որ սրտի հետ կապված խնդիրները լուրջ են, բայց չեն կարողացել։ Կան նաև մարդիկ՝ այդ թվում անչափահասներ, որոնք պետք է հետազոտվեն Երևանում, բայց նրանք ևս չեն կարողանում այդ հետազոտություններն անցնել»,-ասում է Գրիգորյանը։

Գյուղապետի փոխանցմամբ՝ դեղատներում մի շարք դեղեր սպառվել են ու դա լուրջ խնդիրների առաջ է կանգնեցրել նաև հարևան գյուղերի բնակիչներին, քանի որ նրանք ևս օգտվում են Արցախի այս խոշոր գյուղական համայնքի դեղատներից։

Հարևան շուրջ 10 գյուղ Հաթերքից էր առևտուր անում։ Գյուղի ավելի քան 10 խանութներում հիմա ապրանք չի մնացել համարյա. արագ սպառվում են նաև տնտեսական ապրանքները։ Քանի որ անցած տարի Կարմիր Խաչը կարտոֆիլի սերմ էր տվել բոլոր գյուղացիներին, մարդիկ ցանել էին, որոշակի բերք ունեին, պահեստավորել էին, բայց մնացած մթերքները, որոնք բերվում էին Հայաստանից, ինչպես նաև դեղորայքը, գտնելը շատ է բարդացել»,-նկատում է մեր զրուցակիցը։

Արցախի՝ ավելի քան մեկ ամիս տևող շրջափակումը Մարտակերտի շրջանի Հաթերք գյուղում մյուս տարի ավելի շատ զգացնել կտա։ Գյուղում գյուղատնտեսական աշխատանքները դադարեցված են. վարելահողերի գերակշիռ մասը մշակել չեն կարողանում, քանի որ վառելիք չկա։ Ադրբեջանցիների կողմից Արցախը հայաստանին կապող միակ ճանապարհի արգելափակման պատճառով 33 օր է՝ Արցախ նաև վառելիք չի մտնում։

«Վարելահողերի մի մասում աշնանացան ցորեն ենք ցանել։ Դա էլ ուշացումով ենք արել։ Մոտ 400 հա գարնանացան էինք նախատեսում անել, բայց վառելիք չկա։ Կարող է մի երկու հոգի մի քանի լիտր վառելիք ունենան տանը, բայց ցանքի համար տոննաներով պետք է։ Եթե ճանապարհը չբացվեց, մնալու են անմշակ էդ տարածքները։

Ճանապարհը փակ լինելու պատճառով, բացի վառելիքից, նաև գյուղտեխնիկայի համար պահեստամասեր չենք կարողանում բերել։ Համարյա ամեն տարի գյուղտեխնիկայի հետ խնդիր է լինում. պահեստամասերը Երևանից բերում ենք, սարքում, որ կարողանանք ցանք անել։ Հիմա դա էլ դարձել խնդիր»,- ցավով նշում է համայնքապետը։

Այդուհանդերձ, Գրիգորյանը լավատես է՝ գյուղացին ուտելու բան կգտնի, միայն թե ճանապարհը բացվի՝ առանց զիջումների. 120 հազար մարդու կյանքի ճանապարհը փակված մնալ չի կարող։

Աղբյուր` Փաստինֆո