Փաստ ինֆո

ՀՀ վարչապետ Նիկոլ Փաշինյանը շարունակում է առաջ տանել հակառուսական քաղաքականությունը, որը սկսել է անցած տարվա երկրորդ կեսից, իսկ ավելի ակնառու՝ աշնանից։ Այս մասին «Փաստինֆո»-ի հետ զրույցում ասաց քաղտեխնոլոգ Արմեն Բադալյանը։

«Վերջին ասուլիսի ժամանակ նա մի գաղափար առաջ քաշեց, որը պաշտոնապես չէր բարձրացրել, դա այն էր, որ Հայաստանում ռուսական զորքերի և զինուժի ներկայությունը սկսում է վտանգ սպառնալ հայ ժողովրդին»,-նշեց նա։

Քաղտեխնոլոգի խոսքով՝ Փաշինյանի մյուս բոլոր հայտարարությունները տեղավորվում էին նախկինում տարբեր առիթներով հնչեցրած հակառուսականության գիծն ամրապնդելու տրամաբանության մեջ։ Փաշինյանը մեկ անգամ չէ, որ քննադատել է ՌԴ-ին, ՀԱՊԿ-ին, կասկածի տակ դրել խաղաղապահների գործառույթը, այս անգամ որոշակի տարընթերցման տեղիք տալով, խոսեց նաև ռուսական զորքերը դուրս բերելու մասին։

«Նա այնպիսի տարընթերցման տեղիք տվեց, որ հետո կարողանա ասել, իբր, ես այդ միտքը չեմ ասել, բայց ինքը հենց այդ միտքն էր ասում, որ ռուսական զորքերը Հայաստանում սկսում են վտանգ սպառնալ, որովհետև զորավարժություն կանեն, հետո կգնան, իսկ Ադրբեջանն ու Թուրքիան կտեսնեն, որ այդ զորավարժություններից վտանգ է բխում։ Դա ոչ այլ ինչ էր, քան պարզունակ մանիպուլյացիոն տեխնոլոգիայի կիրառում, որը Փաշինյանը փորձեց հրամցնել լսարանին»,- նկատեց քաղտեխնոլոգը։

Փաշինյանի հայտարարությանն, ի դեպ արդեն իսկ արձագանքել են թե՛ Վլադիմիր Պուտինի մամուլի քարտուղարը, թե՛ ՌԴ ԱԳՆ պաշտոնական ներկայացուցիչ Մարիա Զախարովան։ Վերջինս շատ հստակ նկատեց և Հայաստանի վարչապետի մամուլի ասուլիսում հնչած հայտարարությունները որակեց «սխոլաստիկ ելույթ»։

«Առաջին անգամ ՀՀ վարչապետի հայտարարությունը որակվեց որպես սխոլաստիկ, իհարկե, հիմք ունենալով, որովհետև վարչապետը տարբեր հակադիր դիրքորոշումներ նշեց։ «Սխոլաստիկան» հին հունական փիլիսոփայական տերմին է, որ փիլիսոփայական տերմինաբանությունից դուրս, ժողովրդական լեզվով ասած, իրենց ամեն միտքը հակասում էր մյուս մտքին և այդ երկու հակասող մտքերի միջև նրանք փորձում էին գտնել ճշմարտությունը։ Կարճ ասած՝ Զախարովան ասաց՝ անկապ, անիմաստ խոսում ես»,- մեկնաբանեց Բադալյանը։

Հիշեցնենք, որ ՌԴ ԱԳՆ պաշտոնական ներկայացուցիչ Մարիա Զախարովան՝ պատասխանելով ՀՀ վարչապետ Նիկոլ Փաշինյանի՝ հայ-ռուսական հարաբերություններին մասին հնչեցրած հայտարարություններին, ինչպես նաև պաշտոնական Երևանին և Բաքվին բանակցությունների հարթակ տրամադրելու ռուսական կողմի պատրաստակամությանը, նշել էր, որ եթե հայ գործընկերներն իսկապես շահագրգռված են նշված խնդիրները լուծել բարձր մակարդակով եռակողմ պայմանավորվածությունների համալիր իրականացման հունով, ապա «սխոլաստիկայով» զբաղվելու փոխարեն անհրաժեշտ է շարունակել համատեղ աշխատանքը։

Աղբյուր` Փաստինֆո