Փաստ ինֆո

Դատավոր Արուսյակ Ալեքսանյանի գործի շրջանակներում նախաքննության ընթացքում հարցաքննվել է Երևանի ընդհանուր իրավասության դատարանի նախագահի պաշտոնակատար Գագիկ Պողոսյանը։ Այս մասին լրագրողների հետ զրույցում ասաց փաստաբան Էրիկ Ալեքսանյանը, որը սույն գործով եւս մեղադրյալ է։

Էրիկ Ալեքսանյանն իր նկատմամբ քրեական հետապնդումը պայմանավորեց բացառապես իր մասնագիտական գործունեությամբ։ Ինչ վերաբերում է մեղադրանքին, ապա Է. Ալեքսանյանին մեղսագրվում է Արուսյակ Ալեքսանյանին՝ պաշտոնեական լիազորություններն անցնելու հարցում օժանդակելը։ Քրեական վարույթը վերաբերում է քրեական հեղինակությանն առնչվող գործին. դատարանը որոշել է գրավի դիմաց ազատ արձակել «Ֆազ» մականունով հայտնի քրեական հեղինակություն համարվող Սերգեյ Գրիգորյանին՝ բավարարելով վերջինիս պաշտպան Էրիկ Ալեքսանյանի ներկայացրած միջնորդությունը և այժմ դատավորին մեղադրում են ակնհայտ անարդար դատական ակտ կայացնելու և պաշտոնեական լիազորություններն անցնելու մեջ։

Պաշտոնեական լիազորություններն անցնելու դրվագին անդրադառնալով Էրիկ Ալեքսանյանը նշեց, որ տվյալ պարագայում լիազորություններն անցնելը պայմանավորում են այն հանգամանքով, որ վերամակագրման պայմաններում Արուսյակ Ալեքսանյանը քննել է միջնորդությունը՝ անցնելով իր լիազորությունները, թեև որևէ իրավասություն չուներ վերամակագրման պայմաններում քննելու այդ միջնորդությունը, այսինքն՝ օրինական դատարան չէր հանդիսանում։ Այս առնչությամբ Ալեքսանյանն արձանագրեց անհամապատասխանություն՝ թե՛ իրավական, թե՛ փաստական տեսանկյունից, մասնավորապես, եթե վերամակագրում է եղել, ապա ըստ Ալեքսանյանի՝ այդ վերամակագրումը Արուսյակ Ալեքսանյանին չի հասել, նա տեղեկություն չի ունեցել այդ մասին, ինչը բխում է հենց գործի նյութերից։ Այդ մասին ցուցմունք է տվել նաև Գագիկ Պողոսյանը՝ դատարանի նախագահի պաշտոնակատարը։

Բացի այդ՝ գրասենյակի աշխատակիցների, նրանց ցուցմունքների համակցությունը, ինչպես նաև՝ փաստաթուղթը որպես այդպիսին՝ դատավոր Ալեքսանյանին չհասնելու հանգամանքը վկայում են այն մասին, որ դատավորը չի իմացել, հետևաբար, տվյալ պարագայում հանդիսացել է օրինական դատարան, համենայն դեպս, այդպես մտածել է։

Մանրամասները՝ տեսանյութում։

Աղբյուր` Փաստինֆո