Փաստ ինֆո

Վաղ առավոտից խուզարկություններ են իրականացվում Երևանում և Արարատում բնակվող ՀՅԴ մի շարք անդամների տներում։ ՀՅԴ անդամ, «Հայաստան» խմբակցության պատգամավոր Քրիստինե Վարդանյանը «Փաստինֆո»-ի հետ զրույցում հաստատեց տեղեկությունը՝ նշելով, որ ուժային կառույցները ներխուժել են ՀՅԴ մի շարք անդամների տներ, այդ թվում՝ վեց ամիս ապօրինի կալանքի տակ գտնվող Գերասիմ Վարդանյանի տուն, ով վերջերս էր ազատ արձակվել։

«Խոսքն Արարատի մարզի և Երևանի ՀՅԴ մի շարք անդամների տներ ներխուժումների մասին է, կան նաև բերման ենթարկվածներ։ Այս պահին թիվը կոնկրետ և որ գործի շրջանակներում են գործողություններ իրականացվում, պարզ չէ։ «Հայաստան» դաշինքի մի շարք պատգամավորներ արդեն ուղևորվել են այն ուղղություններով, որտեղ գործողություններ են եղել՝ պարզելու բոլոր հարցերը։ Սա բացառապես քաղաքական ենթատեքստ ունի և հերթական գործողություններն է՝ ինչ-որ քաղաքական գնահատականներով պայմանավորված»,- նշեց Վարդանյանը։

Պատգամավորը տեղեկություններ չունի՝ արդյոք իրականացված խուզարկությունների ժամանակ առգրավումներ եղել են, թե ոչ։ Ինչ վերաբերում է Գերասիմ Վարդանյանին, պատգամավորը նշեց, որ նրա՝ բերման ենթարկված լինելու մասին տեղեկություն չունի, այսօր նրան հրավիրել են հարցաքննության։

ՀՀ քննչական կոմիտեի մամուլի քարտուղար Գոռ Աբրահամյանը տեղեկացրել է, որ վարույթը, որի շրջանակներում խուզարկություններ են իրականացվել, նախաձեռնվել է 2022թ օգոստոսին՝ ՀՀ ՔԿ Արարատի մարզային քննչական վարչության Մասիսի քննչական բաժնում՝ ՀՀ քրեական օրենսգրքի 236-րդ հոդվածի 2-րդ մասի հատկանիշներով, այն է՝ օրինական կամ անօրինական հավաքին մասնակցելուն հարկադրելն անձի կամ նրա մերձավոր ազգականի կամ մերձավորի նկատմամբ բռնություն գործադրելու, գույքը ոչնչացնելու, վնասելու կամ վերցնելու սպառնալիքով կամ շանտաժի միջոցով։

Աբրահամյանը նշել է, որ դատարանի համապատասխան որոշման հիման վրա իրականացվում են խուզարկություններ մի քանի անձանց առնչվող մի քանի հասցեներում, ինչպես նաև իրականացվում են այլ քննչական գործողություններ։

Հեղինակ՝ Իզաբել Սահակյան

Աղբյուր` Փաստինֆո