Փաստ ինֆո

Կանանց հրավիրում են բանակ այն ժամանակ, երբ հայտարարվում է տոտալ մոբիլիզացիա։ Մեզանում կանանց կարող են բանակ զորակոչել այն դեպքում, երբ բոլորս դառնանք զինվորներ և ամուր բռնենք այն նիզակը, որով պետք է խոցենք թշնամուն։ Ամեն ինչը փլուզված, ամեն ինչը տարօրինակ, ես չգիտեմ, թե դա ինչքան օգուտ կտա մեր բանակին։ Ինչքան մոտ է պետության վախճանը, այնքան հիմար և տարօրինակ են նրանց ընդունած օրենքները։ Այս մասին «Փաստինֆո»-ի հետ զրույցում ասաց «Արաբո» ջոկատի հրամանատար Մանվել Եղիազարյանը՝ մեկնաբանելով այս օրերին ՊՆ-ում քննարկվող նախագիծը։

«Կարող ա մեկը գումար է խոստացել, մեկի մտքով անցել է մի հիմար բան, ասել է՝ մեր Սահակը նախագիծ է բերել, բերեք մտցնենք օրակարգ։ Կանանց կանչում են պատերազմ միայն տոտալ մոբիլիզացիայի ժամանակ, որովհետև մեզ մոտ քաղաքականություն, կին, աղջիկ չկա, մեզ մոտ ոչնչացման պատերազմ է, բոլորը պետք է մասնակցեն, թշնամին այդպիսին է, սա ոչնչացման պատերազմ է։ Տոտալ մոբիլիզացիայի ժամանակ բոլորին կարելի է կանչել բանակ, չեմ ասում առաջնագիծ ուղարկել»,- ասաց նա;

Պատերազմական իրավիճակում, ըստ Եղիազարյանի, կանանց համար 1000 ու մի գործ կա՝ բժշկական գործերից մինչև սննդի պատրաստում։ Պատերազմի ժամանակ կանայք կարող են համազգեստը հագնել ու ասել՝ տեսեք, ես ռմբակոծության տակ սնունդ եմ պատրաստում զինվորների համար, որպեսզի ամբողջական լինի հայրենիքի պատկերը, որ բոլորը պարտավորված զգան սեփական երկրի համար կենացմահու կռիվ տալ։ Այդ փորձը, ըստ Եղիազարյանի, այսօր կիրառում է Ուկրաինան։

«Առաջին աշխարհամարտի ժամանակ, երբ ռուսական բանակում բավականին մեծ խուճապ էր և ռուս զինվորները լքում էին մարտի դաշտը, ցարի հրամանով ստեղծվեցին կանացի գումարտակներ և ուղարկեցին առաջին գիծ կռվելու, հաջող էլ կռվում էին։ Դա անում էին նրա համար, որ տղամարդիկ, ինչպես ասումեն՝ փախչողները, զինվորները թասիբի ընկնեին և գային համալրեին բանակը։ Դա դրա համար էին անում, բայց մերոնք այս պարտվողական քաղաքականության մեջ, այդ ղազագիրը ստորագրելուց հետո կանանց կամավոր ուր եք կանչում բանակ, ես չգիտեմ, կինը, կամավոր բանակում ինչ պետք է անի, տղամարդիկ վերջացե՞լ են, հիմա կանանց եք կանչում բանակ»,- նշեց զինվորականը։

Հիշեցնենք, որ օրերս ՀՀ ՊՆ մամուլի քարտուղար Արամ Թորոսյանը «Փաստինֆո»-ի հետ զրույցում հաստատել էր տեղեկությունը, որ ՀՀ ՊՆ-ում քննարկվում է նախագիծ, որով նախատեսվում է իգական սեռի ներկայացուցիչների կամավոր ժամկետային զինվորական ծառայության անցնելու հարցը։

Աղբյուր` Փաստինֆո