Փաստ ինֆո

«Հիմա ո՞րն է լինելու Ձեր պատիժն՝ այս երկրային կյանքում»,- Նիկոլ Փաշինյանի՝ լրագրողների հետ հանդիպման ժամանակ նշեց լրագրողներից մեկը՝ դիմելով Փաշինյանին։

«Պարոն Փաշինյան, երբ Ձեզ ասում էին ժամանակին, որ Դուք Ռուսաստան-Հայաստան հարաբերությունները տապալել եք, Հայաստան-ԵՄ հարաբերությունները ձախողել եք, Դուք պատասխանում էիք՝ դուք ձեր դարդը լացեք, շատ լավ հարաբերություններ են, Հայաստան-ՌԴ հարաբերությունները Երրորդ հանրապետության պատմության մեջ երբևէ այսպիսի բարձր մակարդակի վրա չեն եղել, շատ վստահելի և այլն, հիմա Արցախի շրջափակման պարագայում արցախցիները, Ձեր խոսքով ասած, իրենց դարդն են լացում, մենք այստեղ մեր դարդն ենք լացում և այլն, դա ուղիղ պատասխանն է՝ այդ հարաբերությունների ստացված կամ չստացված լինելուն։ Երբ նախկինում Դուք որոշակի սխալներ էիք թույլ տալիս, դա ներվում էր, որովհետև ասվում էր, որ անփորձ նոր կառավարություն եք՝ ժողովրդի ծոցից դուրս եկած, հիմա Ձեր ոչ մի սխալ այլևս չի ներվում, որովհետև արդեն գրեթե հինգ տարի՝ 4.5 տարուց ավելի իշխանության եք։

Պարոն Փաշինյան, ԱԺ-ում Դուք ամեն կերպ փորձում եք արդարացնել, որ 2010թ փաստաթղթերով, Վարչատարածքային բաժանման մասին օրենքով Ադրբեջանի տարածքային ամբողջականությունը ճանաչվել է և այլն, ինչը քննադատվում է ընդդիմության կողմից, որ Դուք հայատյաց քաղաքականություն է վարում։ Ի վերջո, Դուք ԱԺ ամբիոնից հայտարարեցիք, որ Դուք մեղավոր եք, այսքան զոհեր կարող էր չլինել, ժողովուրդը գուցե պետք է իմանար և այլն։ Ցանկացած մեղավորություն ենթադրում է որոշակի պատիժ, պարոն Փաշինյան։ Անգամ իմ երեխան, երբ սխալ է թույլ տալիս, ես ստիպում եմ, որ որոշ պատիժ կրի, որ հետևություն անի իր սխալներից։ Հիմա ո՞րն է լինելու Ձեր պատիժն՝ այս երկրային կյանքում»,- ասաց լրագրողը՝ դիմելով Նիկոլ Փաշինյանին, ինչին արձագանքելով, վերջինս նշեց, որ պատիժը քրեաիրավական հասկացություն է և եթե պատժի արժանի որևէ գործողություն իրականացրել է, դա վրա է հասնելու ամեն պահի, քանի որ ՀՀ-ում գործում է պատժի անխուսափելիության սկզբունքը։

Աղբյուր` Փաստինֆո