Փաստ ինֆո

ՀՀ իշխանությունը ռուս խաղաղապահներին չի քննադատում, այլ միայն նրանց գործունեության վերաբերյալ իր մտահոգություններն է արտահայտում։ Նման տեսակետ հայտնեց ՀՀ վարչապետ Նիկոլ Փաշինյանը՝ պատասխանելով հարցին, թե պաշտոնական Երևանը որքանո՞վ է ներգրավված ռուսական կողմի հետ բանակցություններում, արդյո՞ք վարչապետն անձամբ հանդիպել ու քննարկել է Լաչինի իրադարձությունները խաղաղապահ զորախմբի հրամանատարի հետ։

«Մենք խաղաղապահներին չենք քննադատում, այլ մեր մտահոգություններն ենք հայտնում, որոնք վաղուցվա ծագում ունեն։ Ես անընդհատ մեր ռուս գործընկերների ուշադրությանն եմ հրավիրել, որ Ադրբեջանում սկսվել է ռուս խաղաղապահների վարկաբեկման պետական արշավ։ Դա ակնհայտ է և շարունակում է ակնհայտ մնալ։ Ոչ ոք չի վիճարկում, որ ռուս խաղաղապահներն են ԼՂ ժողովրդի անվտանգությունն այսօր ապահովում, բայց մենք ունենք Փառուխի դեպքերի նախադեպը, երբ ադրբեջանցիները մուտք են գործել ՌԴ խաղաղապահների պատասխանատվության գոտի և մենք, ըստ էության, ոչ մի արձագանք չենք տեսել: Ուզում եմ նորից վերադառնանք Խծաբերդի դեպքերին, երբ խաղաղապահների պատասխանատվության գոտում` Խծաբերդում, ՀՀ քաղաքացիներ են գերեվարվել»,–ասաց Փաշինյանը։

ՀՀ վարչապետը հիշեցրեց, որ Լաչինի միջանցքում ռուս խաղաղապահների տեղակայումից հետո գերեվարվել են ՀՀ քաղաքացիներ, որոնք առնչություն չունեն ռազմական գործողությունների հետ: Իսկ դրանք հարցեր են, որոնք, ըստ Փաշինյանի,, չպետք է անպատասխան մնան։

«Լավ, մենք բերաններս ջուր առած-նստա՞ծ ենք, թե զբաղվում ենք այս հարցերով։ Մենք այս հարցերով զբաղվում ենք, և ոչ թե ՌԴ խաղաղապահ զորախմբի հրամանատարի, այլ խաղաղապահների գերագույն գլխավոր հրամանատարի հետ»։

Փաշինյանը ընդգծեց, որ եռակողմ հայտարարությամբ հստակ ամրագրված է, որ Լաչինի միջանցքը մնում է ռուս խաղաղապահների վերահսկողության ներքո։

Աղբյուր` Փաստինֆո