Փաստ ինֆո

Խաղաղության կարելի է հասնել դիտանկյունները որոշակիորեն փոխելով, իրողությունները ճիշտ գնահատելով, մաքսիմալ հաշվարկված քայլեր անելով, տարածաշրջանում հարաբերությունները փոխելով։ Այդ մասին լրագրողների հետ ունեցած ասուլիսին ասաց վարչապետ Նիկոլ Փաշինյանը և մանրամասնեց. «Մենք խաղաղություն կունենանք, եթե ի վիճակի լինենք հանդուրժող հարաբերություններ հաստատել Թուրքիայի և Ադրբեջանի հետ, որոշակի համաձայնությունների դաշտ ձևավորելով»։

Լրագրողի դիտարկմանը, որ թուրք-ադրբեջանական զորավարժությունները ՀՀ-ի համար սպառնալիք որակելու պարագայում ինչ տրամաբանությամբ է Հայաստանը հրաժարվում ՀԱՊԿ զորավարժություններն այստեղ անցկացնելու տարբերակից, եթե տրամաբանորեն դա էլ սպառնալիք կլինի Թուրքիայի ու Ադրբեջանի համար, Փաշինյանը պաատսխանեց.

«ՀԱՊԿ-ը կգա, թուրք-ադրբեջանական տանդեմի համար սպառնալիք կստեղծի, հաջորդ օրը կհանգստանա, մյուս օրն էլ կգնա իր գործերին, իսկ մենք կմնանք միայնակ թուրք-ադրբեջանական տանդեմի դեմ։ Մենք պետք է մաքսիմալ պատասխանատու գործենք. կան սպառնալիքներ, հնարավորություններ, որոնց հետ պետք է հարաբերվենք։ ՀԱՊԿ-ին ասում ենք եկեք հասկանանք, թե ձեր պատասխանատվության գոտին որն է, որտեղով է անցնում, չեն ասում, իսկ մենք մինչև չիմանանք, չենք կարող հստակ բան ասել ՀԱՊԿ-ի հետ կապված»։

Փաշինյանը, սակայն, համաձայնվեց լրագրողի այն դիտարկմանը, որ խաղաղության չեն հասնում այն մուրալով։

«Խաղաղության հնարավոր է հասնել այն վաստակելով։ Ցավոք, մեր փորձը ցույց տվեց, որ պարտադրելով էլ չեն հասնում խաղաղության»,-ասաց վարչապետը և կրկին վերադառնալով ՀԱՊԿ-ի ու թուրք-ադրբեջանական տանդեմի թեմային, նշեց. «ՀԱՊԿ-ի վրա հույս դնում եմ, բայց այլ բան, որ կարող է հուսախաբ անել, իսկ Ադրբեջանի ու Թուրքիայի հետ հարաբերությունների կարգավորմանը հավատում եմ մեկ պատճառով. որովհետեւ որեւէ բան անելուց առաջ պետք է հավատալ»։

Մանրամասները՝ տեսանյութում

Աղբյուր` Փաստինֆո