Փաստ ինֆո

Երևանի ընդհանուր իրավասության դատարանում՝ դատավոր Սերգեյ Սահակյանի նախագահությամբ, այսօր կայացել է ՀՀ երրորդ նախագահ Սերժ Սարգսյանն ընդդեմ ԱԺ «Քաղաքացիական պայմանագիր» խմբակցության պատգամավոր, գործարար Խաչատուր Սուքիասյանի՝ «Գռզո»-ի գործով դատական նիստը։

Հիշեցնենք, որ Խաչատուր Սուքիասյանի դեմ հայցադիմում է ներկայացվել դատարան՝ ՀՀ երրորդ նախագահ Սերժ Սարգսյանի պատիվն ու բարի համբավն արատավորող տեղեկատվությունը հերքելու պահանջով։ Հայցադիմումի հիմք է հանդիսացել օգոստոսի 25-ին Սուքիասյանի կողմից՝ ԱԺ ամբիոնի մոտից արված հայտարարությունը, թե «3-րդ նախագահը 100 միլիոն դոլարից ավել կազինոներում կրվել է»։ Սույն գործով Խաչատուր Սուքիասյանից բացի որպես պատասխանող կողմ է նաև ՀՀ-ն՝ ի դեմս ԱԺ աշխատակազմի։

«Փաստինֆո»-ի թղթակցի հաղորդմամբ՝ գործը գտնվում է դատաքննության փուլում, հետազոտվում են ապացույցները։ Նախորդ դատական նիստում հայցվորի ներկայացուցիչների կողմից ներկայացվել էր Սերժ Սարգսյանի՝ Բադեն-Բադեն մեկնելու վերաբերյալ կարճված գործի տվյալները, այդ թվում՝ Խաչատուր Սուքիասյանի ցուցմունքը։ Դատարանը, լսելով կողմերին, որոշեց ներկայացված ապացույցները ճանաչել վերաբերելի և թույլատրելի, ապա հրապարակեց տվյալները, այդ թվում՝ Սուքիասյանի ցուցմունքը։ Պատասխանող Սուքիասյնաի ներկայացուցիչ Աննա Տոնոյանը նշեց, որ քրեական գործը հարուցվել էր ոչ թե Սուքիասյանի, այլ՝ Դանիել Իոաննիսյանի հաղորդման հիման վրա, ինչն էլ հիմնված էր ոչ թե Սուքիասյանի ելույթի, այլ՝ «Փաստերի ստուգման հարթակի» հրապարակման հիման վրա։ Ըստ փաստաբանի՝ ոչ մի կերպ չի կարող հաստատվել, որ Խաչատուր Սուքիասյանի արտահայտություններն արատավորել են հայցվորի պատիվն ու արժանապատվությունը կամ գործարար համբավը, ավելին, առկա է հանրային գերակա շահ, որովհետև փաստորեն այդ ինֆորմացին այնքան կարևոր է եղել հանրության համար, որ քաղաքացիների իրազեկվածության իրավունքների պաշտպանությամբ զբաղվող ընկերությունը հաղորդում է ներկայացրել։ Ներկայացված ապացույցները, ըստ պատասխանողի, առավելապես հիմնավորում են իրենց դիրքորոշումը՝ գնահատողական դատողության և հանրային գերակա շահի առնչությամբ։ Սուքիասյանի ներկայացուցիչ Աննա Տոնոյանը պնդեց, թե «ՖԻՊ» հրապարակման հետ Սուքիասյանն առնչություն չունի։

Աշխատանքային ժամի ավարտով պայմանավորված՝ դատական նիստը հետաձվեց՝ մինչև 2023թ մարտի 20-ը, ժամը՝ 16.00-ն։

Դատական նիստի ավարտից հետո հայցվորի ներկայացուցիչ Վահագն Գրիգորյանը լրագրողների հետ զրույցում արձանագրեց՝ Խաչատուր Սուքիասյանի կողմից ասվել է խոսք, «փաստ», որը պետք է հիմնավորվի։ Գրիգորյանի դիտարկմամբ՝ թեև Խաչատուր Սուքիասյանի փաստաբանը փորձում է պնդել, որ հայտնածը ոչ թե փաստ է, այլ՝ կարծիք, որն արվել է օդում կախված լուրերի, հոդվածների հիման վրա, դրանից, սակայն, արտահայտության բնույթն ըստ էության չի փոխվում։

«Եթե անձի մասին ասում են, որ այս ինչ մարդը այս ինչ տեղում պարտվել է այսքան գումար, ապա դա ապացուցման ենթակա փաստ է։ Այդ փաստը հիմնավորող որևէ ապացույց չի ներկայացվել և չի էլ կարող ներկայացվել։ Այսօր դատարանը հրապարակեց պարոն Սուքիասյանի ցուցմունքը, որը հենց իր ձեռքով ստորագրել էր այն հանգամանքների տակ, որ որևէ կոնկրետ անձի անուն չի կարող նշել, թե ով է իրեն նման տեղեկություններ հայտնել, պարզապես խոսակցություններից է լսել»,- նշեց Գրիգորյանը՝ հավելելով, որ այդ արտահայտությունն իր բնույթով այնքան կոնկրետ և մեղադրական բնույթ ունի, որ սովորական խոսքի ազատության շրջանակներում չի կարող գնահատողական դատողության շղարշի տակ անցկացվել։ Գրիգորյանն ընդգծեց՝ բոլորն էլ հիշում են, թե ինչ է իրականում ասվել, տեսաձայնագրություններում ամեն ինչ առկա է, հաջորդ դատական նիստին կհետազոտվեն նաև տեսագրությունները և իր համար հետաքրքիր է՝ տեսանյութերի հրապարակումից հետո արդյոք Սուքիասյանի ներկայացուցիչը կարող է պնդել, որ նման արտահայտություններ չի արվել։

Հեղինակ՝ Իզաբել Սահակյան

Աղբյուր` Փաստինֆո