Փաստ ինֆո

Երևանի ընդհանուր իրավասության դատարանի դատավոր Մնացական Մարտիրոսյանի անունը Հակակոռուպցիոն դատարանի դատավորների թեկնածուների ցուցակից ԲԴԽ-ն հեռացրել է՝ պարտադրված. արևմուտքի պահանջով:

Հիշեցնենք, որ նոյեմբերի 21-ին ԲԴԽ-ն հայտնել էր, որ կոռուպցիոն հանցագործությունների քննություն իրականացնող դատավորների կազմում ընդգրկվելու համար հարցազրույցի փուլին մասնակցող 2 թեկնածուներից ընտրվել է 1-ը՝ դատավոր Մնացական Մարտիրոսյանը՝ 6 կողմ, 3 դեմ ձայնով, ինչն էլ բավականին մեծ աղմուկ էր բարձրացրել ինչպես մասնագիտական հանրությունում, այնպես էլ՝ քաղաքացիական հասարակությունում, քանի որ Մնացական Մարտիրոսյանը համարվում է համակարգի ամենակոռումպացված դատավորներից մեկը, ինչպես նաև այն անձը, որը ծառայել և ծառայում է յուրաքանչյուր իշխանության՝ կնիքելով նրանց ցանկացած քմահաճույքները:

Ավելին՝ Մնացական Մարտիրոսյանը ոչ միայն պատրաստվում էր տեղափոխվել Հակակոռուպցիոն դատարան, այլև՝ հավակնում էր դատարանի նախագահի պաշտոնին և հենց այդ պայմանով էլ պատրաստ էր տեղափոխվել: Ընդ որում, ԲԴԽ-ն Մնացական Մարտիրոսյանի՝ Հակակոռուպցիոն դատարանի դատավորի թեկնածու էր ընտրել այն բանից հետո, երբ առանց քննության էր թողել Մարտիրոսյանին կարգապահական պատասխանատվության ենթարկելու միջնորդությունը՝ գործի քննությունը ձգձգելով մինչև օրենքով սահմանված ժամկետների ավարտը: Ավելին` նրա բարեվարքության վերաբերյալ եւս տրվել էր բացասական եզրակացություն, այդուհանդերձ իշխանությունները դատական համակարգի թերեւս ամենավարկաբեկված անձին էին տեսնում հակակոռուպցիոն դատարանի ղեկավարի պաշտոնում:

Այս գործընթացները, ինչպես արդեն արձանագրվեց, դժգոհությունների մեծ ալիք էր բարձրացրել, արդյունքում, դեկտեմբերի 30-ին ԲԴԽ-ն հայտնեց, որ Մնացական Մարտիրոսյանը հանվել է կոռուպցիոն հանցագործությունների քննություն իրականացնող դատավորների ցանկից՝ «Հայաստանի Հանրապետության դատական օրենսգիրք» սահմանադրական օրենքի 113-րդ հոդվածի 1-ին կետի 2-րդ մասի հիմքով: Նշված կարգավորումը ենթադրում է, որ Մնացական Մարտիրոսյանն ինքն է դիմում գրել՝ իրենց ցանկից հանելու համար: Միևնույն ժամանակ, Մարտիրոսյանը կշարունակի պաշտոնավարել Երևանի ընդհանուր իրավասության դատարանի դատավորի պաշտոնում:

Մամուլում շրջանառվող տեղեկությունների համաձայն՝ քաղաքական իշխանություններն անձամբ են նրան կանչել ու ասել, որ իր անվան շուրջ հանրային հնչեղությունն այնքան մեծ ու բացասական է եղել, որ լավ կլինի` նա հանի իր թեկնածությունը և դիմում գրի, ինչն էլ Մնացականյանն արել է: «Փաստինֆո»-ի տեղեկություններով, սակայն, քաղաքական իշխանությունները այդ քայլին գնացել են ոչ թե Հայաստանի քաղաքացիական հասարակության կամ մասնագիտական համայնքի դժգոհությունների հետեւանքով, այլեւ` Արեւմուտքի: Մասնավորապես` Մնացական Մարտիրոսյանի թեկնածության դեմ իր հստակ դժգոհությունն է հայտնել Հայաստանում ԱՄՆ դեսպանատունը, որը բավական մեծ գումարներ է ծախսում ՀՀ իշխանությունների, այսպես կոչված, հակակոռուպցիոն պայքարին աջակցելու համար: Ավելին` մշտապես պաշտպանում է իշխանություններին` չնայած կոռուպցիոն աղմկոտ բացահայտումներին, բայց Մնացական Մարտիրոսյանի թեկնածության պարագայում հստակ ասել են, որ աչք չեն փակի ու զգուշացրել, որ հակակոռուպցիոն դատարանի հետ չեն աշխատի, ԲԴԽ-ի հետ կսառեցնեն համագործակցությունը:

Դեկտեմբեր ամսին հանդիպում-քննարկում է տեղի ունեցել, որին մասնակցել են ինչպես ԱՄՆ Միջազգային զարգացման գործակալության Հայաստանյան տնօրենը, դեսպանատան մի շարք աշխատակիցներ, այնպես էլ՝ ՍԴ նախագահ Արման Դիլանյանը, Արդարադատության ակադեմիայի ռեկտոր Սերգեյ Առաքելյանը, ՀՀ արդարադատության նախարար Գրիգոր Մինասյանը, որն այն ժամանակ դեռևս պաշտոնակատար էր, սակայն ԲԴԽ-ի նախագահ Կարեն Անդրեասյանը ներկա չի եղել, այլ միայն ԲԴԽ անդամ Երանուհի Թումանյանցը: Հանդիպման օրակարգում եղել է ԱՄՆ ՄԶԳ-ի կողմից նոր ծրագրի մեկնարկը՝ Հայաստանում արդարադատության ոլորտի աջակցության համար, որի բյուջեն կազմում է 9.9 մլն դոլար, տևողությունը՝ 5 տարի: Շատերի ուշադրությունը գրավել է Կարեն Անդրեասյանի բացակայությունը, ինչը ԱՄՆ դեսպանատան ու ԲԴԽ-ի միջեւ առաջացած լարվածության հրապարակային ցուցիչներից էր: Ի վերջո, իշխանությունները որոշեցին զիջել ու հանուն իրենց սրտի դատավոր Մնացական Մարտիրոսյանի չվատացնել հարաբերությունները ԱՄՆ դեսպանատան հետ, որի ձեռքին առանց այն էլ կա «կոմպրոմատների» մեծ փաթեթ` կոռուպցիոն գործարքների, մարդու իրավունքների խախտումների, քաղաքական հետապնդումների դրսեւորումների ու դրանց ՀՀ իշխանությունների մասնակցության վերաբերյալ, ինչը կարող է բարձրացվել ցանկացած պահի` ըստ քաղաքական անհրաժեշտության:

Աղբյուր` Փաստինֆո