Փաստ ինֆո

Շրջափակման 26-րդ օրն Արցախի Թաղավարդ գյուղում մարդիկ միմյանց հյուր են գնում, իրար հետ մի կտոր հաց կիսում ու հույս տալիս, որ սա էլ կանցնի, ավելի վատ օրեր էլ են ապրել։

«Առավոտյան մի հարևանի տանն են հավաքվում մարդիկ, իրար հետ նախաճաշում, կեսօրին՝ մյուս։ Էդպես՝ միմյանց հույս տալով, զրուցելով, կարծես, ավելի հեշտ է ստացվում շրջափակմանը դիմակայելը։ Ուրիշ տարբերակ չունենք, պիտի դիմանանք»,- «Փաստինֆո»-ի հետ զրույցում ասում է Թաղավարդի բնակիչ Ռուդիկ Բադասյանը։

2020թ․ 44-օրյա պատերազմից հետո կիսված հայկական Թաղավարդի բնակիչների հետ երեկ նաև Արցախի կառավարության ու Խորհրդարանի անդամներն են հանդիպել։ Ստեղծված իրավիճակում ունեցած ռեսուրսները հնարավորինս արդյունավետ բաշխելու ուղղությամբ քննակումներից բացի, ևս մեկ անգամ բոլորը միակամ վերահաստատել են նախապես ընտրված ճանապարհը՝ դիմակայել ու որևէ զիջման չգնալ։

Բադասյանն ասում է՝ թեկուզ գյուղի խանութներում արդեն սննդամթերք չկա, բայց մարդիկ որոշ չափով ձմեռվա պաշար էին հավաքել․ տնտեսելով օգտագործում են հենց դա․ կարտոֆիլ, լոբի, պահածոներ․․․

«Գյուղատնտեսական նշանակության հողերի մեծ մասը գյուղի՝ թշնամու վերահսկողության տակ անցած հատվածում է մնացել, մի մասն էլ նրանց դիրքերին շատ մոտ հատվածում է։ Այդուհանդերձ, ով տնամերձ հող ունի, քիչ քանակությամբ կարտոֆիլ, լոբի, լոլիկ, վարունգ մշակել էր։ Ձմեռվա համար որոշ քանակությամբ մարդիկ հավաքել էին։ Հիմա 80 տոկոսով հենց այդ՝ մի կողմ գցած պաշարով են յոլա գնում»,-ասում է մեր զրուցակիցը։

145 տնտեսություն ունեցող Թաղավարդում 3-4 խանութ է գործում․ բոլոր խանութները մինչև հիմա բաց են, չնայած, ինչպես Բադասյանն է ասում, սննդամթերքից ոչ ձեթ, ոչ շաքարավազ, ոչ նպարեղեն չկա․․․

Հիշեցնենք, որ արդեն 26 օր է, ինչ Ադրբեջանը փակել է Արցախն արտաքին աշխարհին կապող միակ ճանապարհը՝ Լաչինի միջանցքը։ Կյանքի ճանապարհը փակ լինելու պատճառով հումանիտար վիճակն Արցախում ծայրահեղ սրվել է։ Խանութներում սպառվել են սննդամթերքը, առաջին անհրաժեշտության պարագաները, դեղատներում սպառվում է նաև դեղորայքը, մանկական կերերն ու տակդիրները։

Աղբյուր` Փաստինֆո