Փաստ ինֆո

ՀՀ ԱԺ նախագահ Ալեն Սիմոնյանը ևս չի մասնակցել հունվարի 6-ին մատուցված Սուրբ Սուրբ Ծննդյան պատարագին։ Տեղեկությունը «Փաստինֆո»-ի հետ զրույցում հայտնեց ԱԺ նախագահի մամուլի քարտուղար Ծովինար Խաչատրյանը։

«Միայն գիտեմ, որ պարոն Սիմոնյանը երեկ երեկոյան մասնակցել է Ճրագալույցի պատարագին, իսկ թե ինչու այսօրվա Սուրբծննդյան պատարագին ներկա չի եղել` չեմ կարող ասել։ Փորձեք իրենից ճշտել»,- նշեց ԱԺ խոսնակը։

ՔՊ-ական մյուս պատգամավորների` պատարագին մասնակցելու մասին, Խաչատրյանը որևէ տեղեկություն չուներ։

Նշենք, որ 2021 թվականից սկսած` ՀՀ վարչապետ Նիկոլ Փաշինյանը չի մասնակցում Սուրբ Ծննդյան տոներին նվիրված պատարագներին։ ՔՊ-ական վերնախավի մաս կազմող բարձրաստիճան պաշտոնյանները կարծես թե առանձնապես չեն կարևորում հայ ժողովրդի ինքնության մաս կազմող Հայ առաքելական եկեղեցու և քրիստոնեական, հոգևոր արժեքների գաղափարախոսության տարածումն ու պահպանումը։

Հիշեցնենք, որ 2021 թվականի հոկտեմբերի 26-ին, երբ ԱԺ-ում քննարկվում էր ամանորյա տոնական օրերը կրճատելու հարցը, Աժ «Իմ քայլը» խմբակցության պատգամավոր, ՀՀ առողջապահության նախկին նախարար Արսեն Թորոսյանը` հակադարձելով ընդդիմադիրներին, ասաց, որ պետք չէ տոների կրճատումը կապել քրիստոնեական արժեքների հետ և, երբ «Հայաստան դաշինքի» պատգամավոր Գեղամ Նազարյանը տեղից հայտարարեց, թե Թորոսյանն աթեիստ է, դրա համար էլ այդպես է ասում, վերջինս ԱԺ ամբիոնից արձագանքեց. «հա, աթեիստ եմ, հարցեր կա՞ն»։

Հիշեցնենք, որ Հայ առաքելական եկեղեցին հունվարի 6-ին նշում է Հիսուս Քրիստոսի Սուրբ Ծննդյան և Աստվածահայտնության տոնը: Տոնը մեկնարկում է Ճրագալույցի սուրբ պատարագով` հունվարի 5-ին, ժամը` 17:00:

Աղբյուր` Փաստինֆո