Փաստ ինֆո

Սիսիան խոշորացված համայնքի ՏԻՄ ընտրություններում ո՛չ իմ, ո՛չ էլ մեր թիմի մասնակցության հարցը չի քննարկվել։ «Փաստինֆո»-ի հետ զրույցում ասաց ԱԺ «Հայաստան» խմբակցության պատգամավոր, Սիսիան խոշորացված համայնքի նախկին ղեկավար Արթուր Սարգսյանը։

«Այս պահին մեր խնդիրը Արցախում տիրող իրավիճակի հարցն է։ Ընտրությունների մասին ոչինչ չենք քննարկել, որոշում էլ չունենք կայացրած, ինչ են գրել, դա ընդամենն ապատեղեկատվություն է։

Մեր պնդմանը, թե նման մտադրություն այնուամենայնիվ ունե՞ն, Սարգսյանն արձագանքեց.

«Այս պահին ոչ մի նման քննարկում չկա։ Հենց ժամանակը գա, կխոսենք, այդ մասին կհայտարարենք։ Անցած անգամ մեր թիմով` «Արդարություն և աշխատանք» դաշինքով ենք մասնակցել, հիմա դեռ չենք քննարկել թիմը մասնակցելու է և ում գլխավորությամբ է մասնակցելու»,- նշեց Սարգսյանը։
Նշենք, որ «Ժողովուրդ» օրաթերթը գրել էր, որ ԱԺ «Հայաստան» խմբակցության պատգամավոր, Սիսիան խոշորացված համայնքի նախկին ղեկավար Արթուր Սարգսյանը մտադիր է առաջադրվել 2023 թվականի մարտի 26-ին Սիսիան համայնքում կայանալիք ՏԻՄ ընտրություններում։

Հիշեցնենք, որ 2022–ի սեպտեմբերի 25-ին Սիսիանում անցկացված ընտրություններում ավագանու կազմ էին անցել «Աշխատանք և արդարություն» դաշինքը, «Ապրելու երկիր», «Մեկ Հայաստան», «Հանուն հանրապետության ժողովրդավարության պաշտպանների դաշինք» և «Քաղաքացիական պայմանագիր» կուսակցությունները:

Հոկտեմբերի 12-ին նորընտիր ավագանու առաջին նիստում համայնքի ղեկավար էր ընտրվել ՔՊ ներկայացուցիչ Արմեն Հակոբջանյանը: Հոկտեմբերի 15-ին և 18-ին նշանակված ավագանու արտահերթ նիստերը՝ համայնքի ղեկավարի երդման արարողություն անցկացնելու օրակարգով, քվորում չլինելու պատճառով չէին կայացել, և Արմեն Հակոբջանյանը չէր ստանձնել համայնքի ղեկավարի լիազորությունները:
Ավելի ուշ ավագանու ընդդիմադիր խմբակցությունների անդամները հրաժարվել էին մանդատներից, ու Սիսիանի ավագանու 21 անդամներից ավագանու կազմում մնացել էին միայն ՔՊ–ի 10 անդամները, որոնք չէին կարող քվորում ապահովել ու նիստ անցկացնել: Արդյունքում` դեկտեմբերի 14-ին Սիսիանի ղեկավար ընտրված, բայց իր լիազորություններն այդպես էլ չստանձնած Արմեն Հակոբջանյանը հրաժարականի դիմում էր ներկայացրել, իսկ դեկտեմբերի 30-ին` ՀՀ վարչապետ Նիկոլ Փաշինյանի որոշմամբ, Հակոբջանյանը նշանակվել է Սյունիքի մարզի Սիսիան համայնքի ղեկավարի պաշտոնակատար:

2022 թ. դեկտեմբերի 29-ին, կառավարության` չզեկուցվող հարցերի փաթեթով որոշում էր կայացվել Սյունիքի մարզի Սիսիան համայնքի ավագանու լիազորությունները վաղաժամկետ դադարեցնելու, և նոր ընտրություններ անցկացնելու մասին:

Աղբյուր` Փաստինֆո